Kulvi Outer Seraji Bible
लुआह 9
पांज़ूई आफ़त-डागै-धणे मौत
बिधाता छ़ाडअ तेखअ मोसा मिसर देशे माहा राज़ै सेटा, संघा दैनअ इहअ समाद, “इब्रानी लोगो परमेशर बिधाता दैआ ताल्है इहअ हुकम, ‘मेरै लोगा दै डेऊणैं ताकि तिंयां मेरी च़ाकरी करी सके।
“‘ज़ै तूह अज़ी बी मेरी गल्ला नांईं शुणें, तेरै डागै-चैणैं, गाधै-घोल़ै, ऊँटे ज़ेतरै बी हेल़्ही आसा तिन्नां लै एछणी हेरे मरी।
“‘पर मुंह बिधाता करनी इज़राईलीए डागै-चैणें फाज़त, तिन्नां मांझ़ै निं एक बी मरनअ। सह बगत हणअ काल्ला ज़ेभै मुंह बिधाता आप्पै इहअ करनअ।’”
ज़िहअ बिधाता बोलअ त, दुजै धैल़ै हुअ तिहअ ई, मिसर देशे लोगे खास्सै डागै-धअण अर चैणैं मूंऐं, पर इज़राईलीए डागै-चैणैं लै निं किछ़ै हान्नी हुई।
मिसर देशे माहा राज़ै छ़ाडै भाल़ै अर तेऊ का ज़ांऊं थोघ लागअ कि इज़राईलीए डागै-चैणैं मांझ़ै निं एक बी मूंअ, सह हुअ तेखअ होर बी काठअ अर तेऊ निं इज़राईली मणछा मिसर देशा का डेऊणैं दैनअ।
छ़हुई आफ़त-दुखणैं
तेखअ बोलअ बिधाता मोसा अर हारणा लै, “तम्हैं दुहै निंयां गेठै का एक-एक मुठ भरी छ़ार। मोसा शोटै तेऊ छ़ारा मिसर देशे माहा राज़ै नदरी सरगा बाखा लै।
“सह छ़ार छिंघणअ सारै मिसर देशै अर सोभी मिसर देशे मणछा अर डागै-चैणैं निखल़णैं दुखणैं।”
तिन्नैं दुही निंयं मुठी भितरी छ़ार संघा डेऊऐ मिसर देशे माहा राज़ै सेटा लै। मोसा शोटअ सह छ़ार सरगा बाखा लै, हेरा-हेरी निखल़ै मिसर देशे मणछा अर डागै-चैणैं दुखणैं।1
मिसर देशे तिंयां ज़ादू करनै आल़ै निं मोसा अर हारणा सेटा मुंह रहैऊई सकै किल्हैकि तिन्नां बी निखल़ै होरी मिसर देशे लोगा ज़िहै सारी घेरी दुखणैं।
ज़िहअ बिधाता मोसा का पैहलै त डाहअ द बोली सह हुअ तिहअ ई, मिसर देशो माहा राज़अ हुअ होर बी काठअ अर तेऊ निं मोसा अर हारणे गल्ल मनी।2
सातुई आफ़त-शरू
तेखअ बोलअ बिधाता मोसा लै भिई इहअ, “काल्ला दोत्ती डेओऐ मिसर देशे माहा राज़ै सेटा लै संघा बोलै तेऊ लै इहअ, ‘इब्रानी लोगो परमेशर बिधाता बोला इहअ कि मेरै लोगा दै डेऊणैं ताकि तिंयां मेरी च़ाकरी करी सके।
“‘ज़ै तूह इहअ नांईं करे, बिधाता पाणीं ताल्है, तेरै कार-करिंदै अर तेरै देशे लोगा लै ऐबै होर बी खास्सी आफ़त। तेखअ लागणअ ताखा थोघ कि मुंह बिधाता ज़िहअ निं सारै संसारै कोहै आथी।
“‘हुंह सका त ताल्है अर तेरै लोगा एही घोर बमारी लाई ऐहा धरती का खतम करी। पर मंऐं निं इहअ करनअ च़ाहअ। पर मंऐं डाहअ तूह अर तेरै लोग एते तैणीं ज़िऊंदै कि ताह दी हुंह आपणीं शगती रहैऊं अर होर मेरअ नाअं सारी पृथूई दी खोज़े।3
“‘तंऐं आसा डाही दी कबल्ली हठ ढाकी अर तूह निस्सअ मेरै लोगा डेऊणैं दैई!
“‘ऐबै भाल़, ऐहा ई बगती बरशाऊंणै मुंह काल्ला सरगा का इहै शरू कि आझ़ा का पैहलै निं कधू मिसर देशै इहै शरू पल़दै भाल़ै।
“‘ऐबै आसा ताल्है इहअ करनअ भलअ कि तूह दै आपणैं लोगा लै इहअ हुकम कि ज़ुंण थारै डागै-चैणैं अर मणछ बागै आसा तिंयां लुक्का भितरी, नांईं ता तिंयां मरनै शरू करै।’”
मिसर देशे माहा राज़ेए कार-करिंदै मांझ़ै किअ कई बिधातो अदर, तिन्नैं किअ ज़िहअ बिधाता बोलअ तिहअ ई। तिन्नैं डाहै आपणैं डागै-चैणैं अर मणछ भितरी गोटी। पर ज़ुंणी तिन्नां गल्ला दी धैन निं दैनअ कि बिधाता किज़ै बोलअ, तिन्नैं दैनअ आपणैं डागै-चैणैं अर मणछा बागै रहणैं।
तेखअ बोलअ बिधाता मोसा लै, “आपणअ हाथ कर सरगा बाखा लै, ताकि मिसर देशे मणछ, डागै-चैणैं अर खेचे पज़ैआ दी शरू पल़े।”
मोसा किई आपणीं बाता हांढणे शोठी सरगा बाखा लै, हेरा-हेरी लागअ गुल़ूबिज़ल़ू अर सारै मिसर देशै लागै बडै-बडै शरू पल़दै। शरू जैंदरी ती आग बी लागी दी बरशदी। तिंयां शरू तै एतरै बडै-बडै कि ज़धा ओर्ही मिसर देश बस्सअ तधा ओर्ही निं इहै शरू कधि हुऐ तै।4
सारै मिसर देशै मणछ, डागै-चैणैं, खेचे पज़ैआ ज़ुंण बी बागै थिऐ तिंयां हुऐ खतम। शरू करै हुऐ डाल़-बूट बी खतम।
मिसर देशे गोशेन मुल्खै ज़िधी इज़राईली रहा तै, तिधी निं शरू पल़ै आथी।
मिसर देशे माहा राज़ै शादै मोसा अर हारण संघा बोलअ तिन्नां लै इहअ, “सच्च़ी हुअ मेरै भलै ऐहा बारी पाप, हुंह अर मेरै लोग आसा पापी अर बिधाता आसा धर्मीं।
“ऐबै निस्सअ म्हारै गुल़ूबिज़ल़ू अर शरू ज़िर्हुई। ज़ीबाण, बिधाता का कर अरज़ कि सरग लोल़ी ऐबै कुआशुअ। तम्हैं सोभै लागा ऐबै डेऊंदै, हुंह निं तम्हां ऐबै मिसर देशै रोक्कदअ।”
मोसा दैनअ ज़बाब, “नगरी बागै निखल़दी करनी मुंह आपणअ हाथ सरगा बाखा च़की बिधाता का अरज़, तेखअ जाणअ गुल़ूबिज़ल़ू मुक्की अर सरग बी कुआशणअ। तेखअ लागणअ ताखा थोघ कि ऐहा पृथूईओ मालक आसा बिधाता।
“तज़ी बी आसा मुखा थोघ कि तूह अर तेरै कार-करिंदै निं परमेशर बिधातो डरा हेठै रहणैं आल़ै आथी।
“अल़सी अर ज़ौए पज़ैआ ता हुई शरू करै खतम, किल्हैकि ज़ौआ दी गऐ तै सील लागी अर शल़ूई दी थिऐ फूल लागै दै। कणक अर मडणक5 थिऐ होछ़ै, तिंयां गऐ बरैबाद हणैं का बच़ी।”
मिसर देशे माहा राज़ेए मैहलै अर नगरी बागै डेऊई किअ मोसा आपणअ हाथ सरगा बाखा लै, संघा किई बिधाता का अरज़। हेरा-हेरी मुक्कअ गुल़ूबिज़ल़ू अर शरू, अर सरग कुआशुअ।
ज़ांऊं मिसर देशे माहा राज़ै भाल़अ कि सरग कुआशुअ अर गुल़ूबिज़ल़ू मुक्कअ, सह हुधूअ तेखअ भिई। मिसर देशे माहा राज़ै अर तेऊए कार-करिंदै पल़ी होर बी खास्सी हठ। तिन्नैं निं तेखअ इज़राईली डेऊणैं दैनअ। अह हुअ तिहअ ई, ज़िहअ मोसा का बिधाता पैहलै ई त हेरअ द बोली कि इहअ हणअ।
Source notes (5)
- Cross-reference प्रका. 16:21
- Cross-reference रोम. 9:18
- Cross-reference रोम. 9:17
- Cross-reference प्रका. 8:7; 11:19
- Footnote कणक अर मडणक इब्रानी दी आसा दूई रंगे कणके बारै लिखअ द
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.