Kulvi Outer Seraji Bible
लुआह 24
लोग हुऐ बिधातो हुकम मनणा लै मज़ूर
बिधाता बोलअ मोसा लै इहअ, “उझै एछ मुंह सेटा धारा प्रैंदा लै, हारण अर तेऊए दूई शोहरू नादाब अर अबीहू अर इज़राईलीए सत्तर सैणैं बी आण आप्पू संघा इधा लै। तिन्नां लै बोल इधी धारा एछी दूर ज़िहै रही मुंह सेटा माथअ टेक्कणा लै। पर तूह एछै मुंह बिधाता नेल़ एक्कै अर होरी इज़राईली मणछा निं उझै दैई एछणैं।”
तेखअ डेऊअ मोसा लोगा सेटा, संघा खोज़ी लोगा का बिधाता बोली दी गल्ला अर बधान। मोसे गल्ला शूणीं बोलअ सोभी लोगै, “ज़िहअ बिधाता हुकम किअ, हाम्हां सोभी करनअ तिहअ ई।”
तेखअ ज़िहअ-ज़िहअ बिधाता बोलअ त, मोसा डाही तिंयां सारी गल्ला लिखी।
दुजै धैल़ै उझ़ुअ मोसा दोत्थी संघा बणाईं मोसा धारे गोधै बिधाता लै बेदी अर इज़राईली बारा गोत्रे साबै बारा पात्थरे बारा थाम्ह। तेखअ छ़ाडै तेऊ इज़राईली मांझ़ा का कई ज़ुआन मणछ अर तिन्नैं किअ बिधाता लै बाछ़ू हूम बल़ी अर मेल़-ज़ोल़ो बल़ीदान।
“बल़ीदान किऐ दै पशूओ आधअ लोधल़अ डाहअ मोसा डबरी दी अर बाकी आधअ छ़ल़िकअ बेदी प्रैंदै।”
तेखअ ढाकी मोसा करारे कताब, ज़ेथ बिधाते हुकम थिऐ लिखै दै, संघा पहल़ी लोगा सम्हनै ज़ोरै-ज़ोरै। तेता शूणीं बोलअ सोभी लोगै ज़ोरै-ज़ोरै इहअ, “ज़िहअ बिधाता बोला, हाम्हां करनअ तिहअ ई, हाम्हां मनणै तेऊए हर हुकम।”
तेखअ ज़ुंण लोधल़अ डबरी दी थिअ डाहअ द, सह छ़ल़िकअ मोसा लोगा प्रैंदै, तेखअ बोलअ लोगा लै इहअ, “अह आसा तैहा करारो लोहू ज़ुंण बिधाता इना गल्ले करार तम्हां संघै करा।”1
तेखअ डेऊऐ मोसा, हारण, नादाब, अबीहू अर इज़राईलीए सत्तर सैणैं उझै धारा प्रैंदा लै, तिधी भाल़अ तिन्नें इज़राईलो परमेशर। तेऊए खूरा हेठै शुझिआ ती नीलमणीं ज़ेही च़ौकी निलै सरगा ज़ेही निम्बल़ी।
इज़राईली सैणैं भाल़अ परमेशर आपणीं आछी, परमेशरै निं तिन्नें किछ़ै हान्नी दैनी हणैं। तेखअ खाअ-पिअ तिन्नैं तिधी कठा भोज़।
मोसा डेऊअ धारे च़ुंडी
तेखअ बोलअ बिधाता मोसा लै, “मुंह सेटा एछ उझै धारे च़ुंडी लै संघा रह इधी खल़्हुई। हुंह दैंऊं ताल्है दूई पात्थरे शिला, ज़ेथ लोगा लै मेरअ बधान अर हुकम आसा लिखै दै, तूह खोज़ै इना लोगा का।”
मोसा अर तेऊओ दास ज़ैहसू तैर्हुऐ उझै परमेशरे धारा प्रैंदै डेऊंणा लै। उझै डेऊंदी बारी डाहअ मोसा इज़राईली सैणैं का बोली, “ज़ेभै तैणीं हाम्हैं फिरी निं एछे, तेभै तैणीं रहै इधी हाम्हां न्हैल़ै लागी। हारण अर हूर आसा इधी तम्हां संघै, तिंयां सका हाम्हां पिछ़ू हर गल्ले पांच़ी करी ज़ै किज़ै होए, तम्हैं करै इना का गल्ला।”
तेखअ उखल़अ मोसा उझै धारा प्रैंदा लै अर धारा फेर घोर्हुअ घणअ बादल़। उझै का आअ बिधातो धुप्पअ सीनाई धारा प्रैंदा लै। छ़हा धैल़ै तैणीं रहअ बादल़ धारा प्रैंदै घोर्हुई अर बिधाता शादअ सातुऐ धैल़ै मोसा बादल़ा जैंदरा लै। मोसा डेऊअ बादल़ा जैंदरी, संघा रहअ च़ाल़्ही धैल़ै तैणीं धैल़-राच तिधी।2
बिधातो धुप्पअ शुझिआ त होरी इज़राईली मणछा का इहअ कि धारा प्रैंदै आसा आगीओ बडअ घैनअ ज़ल़अ द।
Source notes (2)
- Cross-reference मोत्त. 26:28; मार्क. 14:24; लूक. 22:20; 1 करि. 11:25; इब्रा. 9:19,20; 10:29
- Cross-reference बधा. 9:9
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.