ARom

Areka nŋɛ ŋɔ Pol ɛnacicɛ

ARom

Kɛbɛrɛ ka moloku ma areka ŋaŋɛ

Pol, wəsom ka Yesu ɛnacicɛ alaŋ a Rom areka ŋaŋɛ. Ɛnacic ŋi kəkom ka Yesu kəcepər meren wəco kəcamət kɔ maŋkəlɛ haŋ meren wəco kəcamət kɔ camət-maas (54-58). Tɛnatəŋnɛ ta Pol ɛntacərɛ Rom-ɛ. Ɛnasɔŋ areka ŋaŋɛ pakenɛ aka Rom ntɛ tɔŋsɔŋɛ patəksɛ alaŋ a Yesu aSuyif kɔ atɔyɔnɛ aSuyif aŋɛ ŋanayi di mɔ. Pol ɛnacicɛ aRom areka ŋaŋɛ pəyi tɛm tatɔkɔ dare da Korɛnt, ntɛ tɔŋsɔŋɛ afum a doru kɔrkɔr ŋagbɛkər Yesu Krist kəlaŋ kəŋan, ŋaleləs kɔ sɔ mɔ (Arom 16.26).

Areka ŋɔ nŋɛ ŋɔyɔ dəkəcəmɛ dɔpɔŋ nnɔ agbɛkər a Yesu kəlaŋ ŋayi mɔ, mofo kɔ tɛm fəp, bawo Pol ɔsɔkəs belbel haŋ tedisrɛ ta kəŋaŋnɛnɛ nkɛ antam kəsɔtər Yesu Krist mɔ. Pol ementər sɔ tɔkɔ Kədɛm kəkur kɔ Kibaru Kətɔt ka Yesu yoŋkotərɛnɛ mɔ. Acərɛ mes alarəm ŋawosɛ moloku ma Pol, dəndo 1.16, mɔyɔ dəkəcəmɛ: «Ifɔlapərnɛ kədəŋk Kibaru Kətɔt ka Yesu Krist, bawo Kibaru Kətɔt fənɔntər fa Kanu fɔ nfɛ kəŋyacɛ nwɛ o nwɛ ɛŋgbɛkər kɔ kəlaŋ mɔ, aSuyif krɛsna kɔ tɛyɛfɛ day-ɛ, atɔyɔnɛ aSuyif sɔ.» Teta Kanu tɔ moloku mɔcɔkɔ-cɔkɔ ma areka ŋaŋɛ (1-12) mɔsɔkəs belbel, kɔ tɛyɛfɛ day-ɛ (13-15), kɔ ŋoloku tɔkɔ pəmar wəgbɛkər Yesu kəlaŋ pəcepərɛnɛ doru mɔ.

Teyerəs ta moloku ma Areka ŋaŋɛ

1.1-15: Pəmɔ ntɛ ɔncyɔ ti mɔ, Pol oncop krɛsna kəmentərnɛ, a pədecicəs areka ŋɔn, pəcloku afum aŋɛ encicɛ ŋi mɔ.

1.16-11.36: Ntɛ tencepər mɔ, kɔ Pol oloku teyi ta afum a doru kɔ kəŋaŋnɛnɛ nkɛ antam kəsɔtɔ teta kəgbɛkər Yesu kəlaŋ mɔ.

12.1-15.13: Kɔ Pol ɔlɔm mɛtəksɛ mɔyɔ mɛlarəm mmɛ pəmar wəlaŋ Krist pəcəmɛ darəŋ mɔ.

16: Pol elip areka ŋɔn nŋɛ ecicsɛ aRom mɔ pəcyif afum a kəloŋkanɛ ka alaŋ a Rom.