ARom 16

Kəyif ka acərɛnɛ em

1Imentər nu delel da wəkirɛ kosu Febe, wəmar nwɛ ɛmbəcɛ kəloŋkanɛ ka alaŋ a Yesu aŋɛ ŋayi dare da Seŋkəre mɔ. 2Nəfaynɛ kɔ teta kəloŋka konu kɔ Mariki, pəmɔ ntɛ pəmar alaŋ aŋɛ ampusɛ Mariki ŋayɔ ti mɔ. Nəcmar kɔ tɛm fəp k'ɛfaŋər nu tes tɔlɔma-ɛ. Nkɔn wəran wəkakɔ ɛmar afum alarəm. Ina wəkawɛ yati, ɛnamar sɔ ina.

3Nəyif'em Pirsila kɔ wos Akila aŋɛ səyi kəmarɛnɛ kəbəcɛ Yesu Krist mɔ. 4Ŋambɛrɛ pəwɛy-wɛy disrɛ kəyac ka kiyi wəyeŋ ka ina, pəmar fɛ iyi sona kəyif ŋa barka. Kəloŋkanɛ ka alaŋ atɔyɔnɛ aSuyif fəp nde tɔf yɔlɔma ŋancərɛ ti. 5Nəyif'em sɔ kəloŋkanɛ nkɛ kəmbəpsɛnɛ nde kəlɔ kəŋan mɔ. Nəyif sɔ wanapa kem Epayinɛt. Nkɔn ɛnanuŋkɛnɛ kəgbɛkər kəlaŋ kɔn Krist atɔf ŋa Asi disrɛ. 6Nəyif'em Mari: Ɛmbəcɛ nu pəlarəm. 7Nəyif'em Andronikis kɔ Yuniyas. Awɛnc im aŋa ŋɔ, aŋɛ anabɛr su dəbili, aŋɛ fəp fəncərɛ a asom a Krist yati ŋɔ ŋayɔnɛ mɔ, ŋananuŋkɛnɛ kəloŋkanɛ kɔ Krist ŋatas im.

8Nəyif'em Ampaliyatis wanapa kem nwɛ analoŋka su kɔ Mariki mɔ. 9Nəyif'em Urbɛŋ, nwɛ səmarɛnɛ kəbəcɛ Krist mɔ, kɔ Stakis wanapa kem. 10Nəyif'em Apelɛs nwɛ mɔyɔ mɔn mementər a ɛŋgbɛkər Krist kəlaŋ yati mɔ. Nəyif'em aka kəlɔ ka Aristobil. 11Nəyif'em Herodiyɔŋ, wɛnc im ɔfɔ. Nəyif'em aka kəlɔ ka Narsis aŋɛ aloŋka su kɔ Mariki mɔ. 12Nəyif'em Trifɛn kɔ Trifos, kɔ wanapa kem Pɛrsida, aran akaŋɛ ŋanabəcɛ Mariki pəlarəm. 13Nəyif'em Rifis, nwɛ Mariki ɛyɛk-yɛk mɔ. Nəyif'em iya kɔn. Ina sɔ, iya kem ɔfɔ. 14Nəyif'em Asɛŋkərit, Fəlekɔŋ, Hɛrmɛs, Patrobas, Hɛrmas kəbəp awɛnc aŋa alaŋ akɔ ŋayi kɔ ŋa mɔ. 15Nəyif'em Filolok kɔ Yulis, Nere kɔ wəkirɛ kɔn, Olɛmpas kɔ alaŋ fəp aŋɛ ampusɛ Mariki ŋayi kɔ ŋa mɔ. 16Nəyifɛnɛ aŋɛ kɔ akɔ nəmakərɛnɛ pəmɔ dɛwɛnca. Kəloŋkanɛ ka alaŋ a Krist a tɔf ya doru fəp ŋayif nu.

Kəcɛm-cɛməs kəlpəs ka Pol

17Ntɛ t'ilɛtsɛnɛ nu awɛnc im aŋa alaŋ: Nəkɛmbərnɛ afum aŋɛ ŋaŋsɔŋɛ kəloŋkanɛ ka alaŋ kəgbɛyɛnɛ mɔ. Akakɔ ŋancəpɛ alaŋ towul ntɛ tɔŋsɔŋɛ ŋatɛmpɛnɛ kiciya disrɛ kɔ ŋandegbɛkəl kətəksɛ nkɛ nənasɔtɔ mɔ. Nəbɔlɛnɛ ŋa. 18Afum akakɔ ŋafɔbəcɛ Krist Mariki mosu, cor cəŋan cɔ ŋambəcɛ! Kɔ moloku maŋan mobotu kɔ meyek-yekəs mecepərər, ŋactiŋkər mera ya atɔcərɛ mes. 19Afum fəp ŋancərɛ a nəleləs Mariki. Awa, tetonu tɔsɔŋɛ k'iyi dəpəbotu. Mba ifaŋ a nəyɔnɛ afum aŋɛ ŋantam kəcərɛ mes mmɛ mɔmbɔt Kanu mɔ. Ifaŋ a nəyɔnɛ aŋɛ ŋancərɛ kəkɔtɛnɛ mes mɔ, nəyaynɛ sɔ kəyɔ pəlɛc. 20Pəfɔsɔwon Kanu ka pəforu kəputuk Sentani wɛcək wonu dəntɔf. Kəmar kifəli ka Mariki mosu Yesu kəyi nu!

21Timote nwɛ səyi kəmarɛnɛ kəbəcɛ Krist mɔ, eyif nu. Lusiyus, Yason kɔ Sosipatɛr, afum em ŋɔ, ŋayif nu sɔ.

22Ina Tɛrtiyus ecic areka ŋaŋɛ tewe ta Pol. Iyif nu sɔ tewe ta Mariki nwɛ oloŋka su mɔ.

23Kayus eyif nu. Nde ndɔrɔn iyi, aka kəloŋkanɛ ka alaŋ fəp nde kəlɔ kɔn ŋambəpsɛnɛ. Erasto, wəmɛŋk daka da dare, kɔ Kartis wɛnc kosu ŋayif nu. [241]

Kəkorkoru Kanu ka Pol kəlpəs

25Pakor-koru Kanu! Kəntam kəcəpsɛ kəlaŋ konu Kibaru Kətɔt nkɛ iyi kəkɛrɛ icdəŋk teta Yesu Krist mɔ. Teta Kibaru Kətɔt kaŋkɔ, tɔkɔtɛnɛ ta Kanu tɔsɔŋɛ afum kəcərɛ tes ntɛ tɛnagbɔpnɛ kəyɛfɛ ntɛ pənawon mɔ. 26Mba ndɛkəl oŋ, Yecicəs Yosoku ya sayibɛ yowurɛ ti pəwaŋkəra, pəmɔ tɔkɔ Kanu ka doru o doru kənasom ti mɔ, asɔŋɛ afum a tɔf ya doru fəp kəcərɛ ntɛ tɔŋsɔŋɛ ŋagbɛkər Kanu kəlaŋ, ŋaleləs kɔ sɔ mɔ. 27Kanu sona gboŋ ɔtɔmpər kəcərɛ kəkɔtɛnɛ mes, pəsɔtɔ doru o doru kəkorkoru teta Yesu Krist! Amina!