1 ATɛsaloni 1

Kiyif

1Ina Pol, Silwɛŋ kɔ Timote, səncicɛ aka kəloŋkanɛ ka alaŋ a Tɛsaloni aŋɛ aloŋka kɔ Kanu kas kosu kɔ Mariki Yesu Krist mɔ. Kəmar kifəli kɔ pəforu peyi nu kəroŋ!

Kiyi wəyeŋ kɔ kəgbɛkər kəlaŋ ka aka Tɛsaloni

2Tɛm fəp səŋyif Kanu barka teta fəp fonu, səfɔcəmbərəs kəbonc mewe monu kətola kosu disrɛ few. 3Səncɛm-cɛmnɛ nu tɛm fəp: Fɔr ya Kas kosu Kanu kiriŋ, kəgbɛkər kəlaŋ konu kəyi kəbəc, kəbɔtərɛnɛ konu kəyeŋk, kɔ kəgbɛkər amera konu Mariki Yesu Krist kəncəp. 4Awɛnc im aŋa alaŋ, səncərɛ a Kanu kəmbɔtər nu kɔ kəyɛk-yɛk nu nəyɔnɛ akɔn. 5Ti disrɛ Kibaru Kətɔt kosu kənader fɛ nu dəmoloku gbəcərəm de, mba kənaderɛnɛ sɔ dəfənɔntər kɔ dəAmera Ŋecempi, səncərɛ ti belbel. Ntɛ tendeŋərnɛ ti mɔ, nəncərɛ tɔkɔ sənayi nu dacɔ teta pətɔt ponu mɔ. 6Kɔ nəna yati nəntubucnɛ səna kɔ Mariki kəbaŋ ka Toloku Tɔtɔt pəcucanɛ pɛlarəm kɔ pəbotu pa Amera Ŋecempi disrɛ. 7Ti disrɛ nəyɔnɛ alaŋ aŋɛ pəmar patubucnɛ tɔf ya Masedon kɔ Akaya fəp mɔ. 8Nde ndoronu Toloku ta Mariki tɛyɛfɛ a k'andene ti tɔf ya Masedon kɔ Akaya. Mba kəgbɛkər konu Kanu kəlaŋ sɔ kəsamsər mofo fəp, ali səloku fɛ ti. 9Bawo ayi kəloku tetosu tɔkɔ nənabaŋ su ndoronu, ntɛ nənasak mɛrəŋka, kɔ nəŋkafəlɛ kəbəcɛ oŋ Kanu kəyi wəyeŋ nkɛ kəyɔnɛ ka kance mɔ, 10kɔ kəkar kəder ka Wan kɔn Yesu kəyɛfɛ ka dəKɔm, nwɛ ɛnayekti afi dacɔ mɔ. Nkɔn endeyac su mɛtɛlɛ mɛwɛy-wɛy ma kiti ka Kanu nkɛ kəlɔtərnɛ mɔ.