1 ATɛsaloni 2

Mosumpər ma Pol nde Tɛsaloni

1Awɛnc im aŋa alaŋ, nəncərɛ belbel a kəder kosu ndoronu kənayɔ dəkəcəmɛ dɔpɔŋ. 2Mba nəncərɛ belbel a anatɔrəs k'alɔməs su dəndo dare da Filipi, mba Kanu kənacəpəs su bəkəc kəloku nu Kibaru Kətɔt kɔn ali ntɛ anacaŋ su kəyɛfərɛnɛ kəpɔŋ mɔ. 3Ti disrɛ, kəwe nkɛ səloku afum fəp mɔ kəŋgbaymɛ fɛ kance, kəyɔ fɛ pətɔsɔk. Sətɛn fɛ kətiŋkər fum o fum. 4Mba ntɛ Kanu kənagbɛkərɛ su, kɔ kəncərɛ a səntam ti mɔ, kɔ kəsom su a səsamsər Kibaru kɔn Kətɔt. Ndɛkəl oŋ, bafɔ səlok-loku ntɛ tɔŋsɔŋɛ afum ŋabɔtər su mɔ de, mba sətɛn kəbɔt kɔ Kanu nkɛ kəŋkiti su bəkəc mɔ. 5Nəncərɛ ali katin a səloku fɛ toloku tokor-korɛ afum, bafɔ tɛfaŋ tosu tɔyɔnɛ kəsɔtɔ ka daka, Kanu kəyɔnɛ ti sede. 6Səntɛn fɛ sɔ nwɛ o nwɛ kəpolɛ su waca, tɔyɔnɛ nəna, tɔyɔnɛ alɔma. 7Awa, səna Asom a Krist, sənatam kədeŋər nu kətam kosu, mba ntɛ sənayi kɔ nəna mɔ, sənatɔmpər kəfɛŋət-fɛŋət kəpɔŋ nnɔ nəyi mɔ, pəmɔ kɛrɛ nkɛ kəndekɛkəs awut ɔn mɔ. 8Kəbɔt kosu mera disrɛ nnɔ nəyi mɔ, sənafaŋ fɛ kəsɔŋ nu Kibaru Kətɔt ka Kanu gbəcərəm, mba kɔ kiyi wəyeŋ kosu sɔ yati, bawo nənanaŋkanɛ kəbɔt su. 9Awɛnc im aŋa alaŋ, nəcɛm-cɛmnɛ yɛbəc yeyeŋki yosu. Səncbəc daŋ kɔ pibi ntɛ tɔŋsɔŋɛ ta nwɛ o nwɛ pəcəmɛ su dəntɔf mɔ. Tatɔkɔ tɔ səncam Kibaru Kətɔt ka Kanu nnɔ nəyi mɔ.

10Nəyɔnɛ ti sede kɔ Kanu, a pəsoku kɔ pəlompu pɔ sənckɔtɛnɛ nnɔ nəna alaŋ nəyi mɔ, tes o tes teyi fɛ ntɛ antam kənalɛ su mɔ. 11Nəncərɛ sɔ a nnɔ nwɛ o nwɛ eyi mɔ, sənayi nu dacɔ pəmɔ papa kɔ awut ɔn. 12Sənalok-lokər nu, sənacəpəs nu bəkəc, sənapɛnɛ nu bəkəc ntɛ tɔŋsɔŋɛ nəyi doru pəmɔ tɔkɔ Kanu kəfaŋ ti mɔ, nkɔn nwɛ ewe nu kəbɛrɛ ka akip ŋa dɛbɛ dɔn kəkɔtəŋnɛ ka nɔrɔ da debeki dɔn mɔ.

13It'ɔsɔŋɛ ntɛ səna sɔ səfɔcəmbərəs kəyif Kanu barka: Ntɛ nənenɛ su Toloku ta Kanu mɔ, kɔ nəmbaŋ ti belbel. Nənabaŋ fɛ ti pəmɔ toloku ta afum de, mba pəmɔ Toloku ta Kanu yati, ntɛ teyi kəbəc nəna aŋɛ nəŋgbɛkər kɔ kəlaŋ konu mɔ. 14Nəmentər ti awɛnc im aŋa alaŋ, kətubucnɛ konu aŋɛ aloŋka kɔ Yesu Krist kəloŋkanɛ ka Kanu nkɛ o nkɛ nde atɔf ŋa Yude mɔ. Afum a atɔf ŋonu yati ŋanatɔrəs nu pəmɔ ntɛ aSuyif ŋanatɔrəs awɛnc anu teta kəlaŋ kəŋan nde Yude mɔ. 15Ŋa ŋanadif Mariki Yesu kɔ sayibɛ alarəm, kɔ ŋantɔrəs sɔ səna. Ŋambɔt fɛ Kanu, aterɛnɛ a afum fəp ŋɔ ŋayɔnɛ. 16Ŋaŋyamsɛ su kəloku akɔ ŋantɔyɔnɛ aSuyif mɔ Toloku ta Kanu ntɛ tendeyac ŋa mɔ. Ti disrɛ, ŋayi kəlas kiciya kəŋan nkɛ ŋayɔ tɛm fəp mɔ. Mba tɛlpəs oŋ, kɔ mɛtɛlɛ mɛwɛy-wɛy ma kiti ka Kanu mɛntɛmpɛnɛ ŋa kəroŋ.

Pəmbas Pol kəkɔnəŋk sɔ alaŋ a Tɛsaloni

17Awɛnc im aŋa alaŋ, sənader səgbɛyɛnɛ kɔ nəna tɛm tɔlɔma, pabɔlɛnɛ dəfɔr, mba ta ambɔlɛnɛ dəbəkəc-ɛ! Səŋsɛp kəkɔnəŋk nu sɔ, bawo nəmbas su haŋ. 18Itɔ sənafaŋ kəkɔnəŋk nu, ina Pol inawakəs ti katin haŋ kəmɛrəŋ, mba kɔ Sentani səyamsɛ su ti. 19Bafɔ nəyɔnɛ wəgbɛkər kosu amera, pəbotu posu kɔ aŋgbɔŋkəlɔ ŋosu ŋa kəyekti domp fɔr ya Mariki mosu Yesu kiriŋ k'endeder-ɛ? 20Kance kɔ, a nən'ɔyɔnɛ pəbotu kɔ kəyekti domp kosu!