1 ATɛsaloni 3

1Ti tɔsɔŋɛ ntɛ səntɔtam sɔ kəbɛrɛnɛ kəkar mɔ, kɔ səntəŋnɛ kəyi sona dare da Atɛn. 2Kɔ səsom wɛnc kosu Timote, nwɛ səŋmarɛnɛ kəbəcɛ Kanu mɔ, pəkɔsamsər Kibaru Kətɔt teta Krist. Səsom Timote pəkɔcəpəs kəlaŋ kɔ bəkəc yonu. 3Ti disrɛ nwɛ o nwɛ ɔfɔsaknɛ sɔ pəcucanɛ pɔmɔkɔ pɔtɔrəs kɔ. Nəncərɛ nəna yati a tɔkɔtɛnɛ mes ma Kanu tɔ nnɔ ayi mɔ. 4Ntɛ sənayi ndoronu mɔ, səncloku nu a səŋkɔyi pəcucanɛ pəlarəm disrɛ. Ti tɛbəp su sɔ, nəncərɛ ti belbel. 5Ti tɔsɔŋɛ ntɛ inatɔtam sɔ kəkar mɔ, k'isak Timote kəkɔcərɛ teyi ta kəlaŋ konu. Tes tin t'inanesɛ: Tɔlɔma Ŋɔŋk Ŋɛlɛc ŋɛwakəs nu, tɔsɔŋɛ yɛbəc yosu yeyeŋki kətɔyɔ dəkəcəmɛ.

6Awa ndɛkəl oŋ, Timote ɛntɛp kəcder kəyɛfɛ nde ndoronu. Ɛŋkɛrɛ su kibaru konu kətɔt ka kəgbɛkər kəlaŋ kɔ kəbɔtərɛnɛ konu. Oloku su a nəmɛŋkərnɛ pətɔt posu tɛm fəp, a nəfaŋ sɔ kənəŋk su pəmɔ tɔkɔ səfaŋ kənəŋk nu mɔ. 7Awa, pəcucanɛ kɔ pəlɛc posu fəp dacɔ, nəna kɔ kəgbɛkər konu kəlaŋ kəncəpəs su bəkəc. 8Ndɛkəl oŋ dis dɛmpɛrkɛ su, bawo nəncəp kəloŋkanɛ disrɛ kɔ Mariki. 9Cəke c'antam sɔ kəyifɛ nu Kanu barka-ɛ, teta pəbotu pɔpɔŋ fəp mpɛ nəŋsɔŋ su fɔr yɔn kiriŋ mɔ? 10Daŋ kɔ pibi, ntɛ tɔ səntola Kanu pəpɔŋ: Kəwosɛ su kənəŋk nu sɔ, tɔsɔŋɛ su kəlas tɔkɔ tombut nu kəgbɛkər kəlaŋ konu disrɛ mɔ.

11Kanu Kas kosu kɔ Mariki mosu Yesu Krist ŋasolɛ su dɔpɔ haŋ nnɔ nəyi mɔ! 12Kanu kəcbɛrɛnɛ kəbɔtərɛnɛ konu aŋɛ kɔ akɔ kəbəp afum alpəs aŋɛ fəp haŋ kəpurər! Kəbɔtər kaŋkɔ kəwurɛnɛ kɔ nkɛ səmbɔtər nu mɔ! 13Kanu Kas kosu pəcəpəs bəkəc yonu ntɛ tɔŋsɔŋɛ nəcemp ta analɛ nu tɔlɔm o tɔlɔm fɔr yɔn kiriŋ, tɛm ntɛ Mariki mosu Yesu endeder kɔ akɔ ŋayɔnɛ akɔn mɔ.