1 ATɛsaloni 4

Nəkɔtɛnɛ tɔkɔ tɔmbɔt Kanu mɔ

1Awɛnc asu alaŋ, səntəksɛ nu tɔkɔ pəmar nəkɔt a nəbɔt kɔ Kanu mɔ, itɔ nəyi kəyɔ. Mba tewe ta Mariki Yesu səntola kɔ səlɛtsɛnɛ nu: Nəbɛrɛnɛ sɔ, 2bawo nəncərɛ mɛtəksɛ mmɛ sənasɔŋ nu tewe ta Mariki Yesu mɔ. 3Tɔkɔ Kanu kəfaŋ mɔ, ti tɔyɔnɛ a papus nu tewe tɔn. Nənaŋkanɛ kəcemp, nəbɔlɛnɛ dalakɔ fəp. 4Teta kəpusɛ kosu Kanu, pəmar nwɛ o nwɛ nu dacɔ pəsumpərnɛ pəsoku kɔ pəlel disrɛ. 5Ta nəsaknɛ mɛfaŋ mɛlɛc ma dis mosolɛ nu, pəmɔ afum a tɔf yɔlɔma aŋɛ ŋantɔcərɛ Kanu mɔ. 6Mes mamɛ disrɛ, ta nwɛ o nwɛ pətiŋkər wɛnc, ta pədir kɔ sɔ. Mariki ɔntɔrsɛ mamɔkɔ fəp, sənaloku nu ti pəsoku pɛs, kɔ səŋgbɔkərɛ sɔ kəccɛm-cɛməs nu ti. 7Kanu kəwe fɛ su kəyinɛ dalakɔ, mba səyinɛ kəpus disrɛ kɔ pəcempi. 8Ti disrɛ, məna nwɛ mənce mɛtəksɛ mamɔkɔ mɔ, bafɔ fum mənce de, mba Kanu kɔ mənce nkɛ kəŋsɔŋ nu Amera ŋɔn Ŋecempi mɔ.

9Ntɛ tɔyɔnɛ ta kəbɔtərɛnɛ ka dɛwɛnca mɔ, ali ancicɛ fɛ nu ti areka, bawo nənasərka Kanu kəntəksɛ nu kəbɔtərɛnɛ. 10Tatɔkɔ yati tɔ nəyi kəyɔnɛ kəloŋkanɛ ka alaŋ a Kanu sədare sa Masedon fəp, mba səŋlɛtsɛnɛ nu kəbɛrɛnɛ ti. 11Nəyɔ mes fəp ntɛ tɔŋsɔŋɛ nəyinɛ pəforu mɔ, nwɛ o nwɛ pəcəmɛ mosumpər mɔn darəŋ, nəbəcɛ waca wonu pəmɔ tɔkɔ səsom nu ti mɔ. 12Awa, tɔkɔtɛnɛ tonu mes tendesɔŋɛ aŋɛ ŋantɔgbɛkər kəlaŋ kəŋan Krist mɔ ŋaleləs tɔkɔ nəyi kəyɔ mɔ. Ntɛ tendeŋərnɛ ti mɔ, ta nəyinɛ tɛm fəp kəmar ka nwɛ o nwɛ dəntɔf.

Kanu kəndeyekti akɔ ŋafi mɔ

13Awɛnc im aŋa alaŋ, səfaŋ kəsɔŋɛ nu kəcərɛ kance teta afi. Ti disrɛ nəfɔdemɔncnɛ pəmɔ akɔ ŋantɔyɔ dəkəgbɛkər mera nnɔ o nnɔ mɔ. 14Səncərɛ a Yesu efi k'ɛyɛfɛ dədefi. Tin tayi tɔ, aŋɛ ŋafi ŋaŋgbɛkər Yesu kəlaŋ mɔ, Kanu kəndeloŋka ŋa kɔ Yesu.

15Awa, ntɛ tɔ səloku, toloku ta Mariki tɔ: Səna aŋɛ səndeyi doru tɛm ntɛ Mariki endeder mɔ, afɔdenuŋkɛnɛ kəbəp Yesu patas afi. 16Awa, andene tegbɛkərɛ, dim da wəbɛ ka mɛlɛkɛ, dim da aluk ŋa Kanu. Mariki nkɔnsərka endetor kəyɛfɛ dəkɔm. Aŋɛ ŋanafi ŋagbɛkər Yesu kəlaŋ mɔ, ŋandenuŋkɛnɛ kəyɛfɛ dədefi. 17Kɔ tɛyɛfɛ day-ɛ, səna aŋɛ səyi wəyeŋ mɔ, andekɔ kɔ ŋa dəkəp, andepɛnɛ su kəkɔnəŋkɛnɛ kɔ Mariki. Payi kɔ nkɔn Mariki doru o doru. 18Ti disrɛ nəcəpsɛnɛ bəkəc moloku mamɛ.