ARom 14

Ta məkiti wɛnc əm

1Nəbaŋ nwɛ ɔntɔyɔ kəlaŋ kəyeŋki, ta nəcgbɛkəl tɛm fəp tɔkɔ ende kəccɛm-cɛmnɛ mɔ. 2Wəlɔma pəcɛm-cɛmnɛ a antam kədi yeri fəp, mba wək'ɔntɔyɔ kəlaŋ kəyeŋki mɔ pəcsɔm yokom ya yɔbɔf gbəcərəm. 3Nwɛ endi yeri fəp mɔ pəmar fɛ pəfani nwɛ ɔntɔsɔm sɛm mɔ, nwɛ ɔntɔsɔm sɛm mɔ pəmar fɛ pəkiti nwɛ endi yeri fəp mɔ, bawo Kanu kəmbaŋ sɔ nkɔn. 4An'ɔ məyɔnɛ ntɛ məŋkɔkiti wəmarəs ka wəkɔ mɔ? K'ɛncəmɛ, kɔ pəyɔnɛ fɛ ti pətɛmpɛnɛ-ɛ, wək'ɔyɔ kɔ mɔ tɔmɔmən. Wəmarəs wəkakɔ endecəmɛ bawo Mariki ɛntam kəsoc kɔ.

5Afum alɔma ŋancɛm-cɛmnɛ a dəkəcəmɛ da dɔsɔk dɔlɔma dencepər dɔlɔma, alɔma ŋacɛm-cɛmnɛ a dɔsɔk fəp dɛntəŋnɛnɛ. Pəmar nwɛ o nwɛ pəlaŋ a tɔkɔ ɛncɛm-cɛmnɛ dɛbəkəc mɔ tolomp. 6Məna nwɛ mənde kəcgbɛyəs mataka mɔ, Mariki məŋlelsɛ mi. Kɔ nwɛ endi yeri fəp mɔ, Mariki məŋlelsɛ yi, bawo məŋyif Kanu barka. Kɔ məna nwɛ mənde kəcyɛk-yɛk yeri yedi mɔ, Mariki məŋlelsɛ yi, bawo məŋyif kɔ barka. 7Ntɛ tɔyɔnɛ kance mɔ, nwɛ o nwɛ eyinɛ fɛ doru kəyi kɔn, nwɛ o nwɛ ɔfɔfinɛ kəfi kɔn. 8Bawo kɔ səyi doru-ɛ, teta Mariki t'ayinɛ doru, k'afi-ɛ, teta Mariki t'afinɛ. Tɔyɔnɛ payi doru wəyeŋ kɔ pəyɔnɛ fɛ ti pafi, Mariki ɔyɔ su. 9Bawo ntɛ Krist efi k'oluksərnɛ sɔ kiyi wəyeŋ mɔ, teta kəyɔnɛ ka Mariki ma afi kɔ ayi wəyeŋ tɔ.

10Mba məna, ta ake tɔ məŋkiti wɛnc əm wəlaŋ-ɛ? Ta ake tɔ məfanɛ oŋ wɛnc əm-ɛ? Fəp fosu andekɔcepər amɛsa ŋa kiti ŋa Kanu kiriŋ. 11Bawo Yecicəs Yosoku yoloku:

«Ina Mariki, indɛrmɛ kiyi wəyeŋ kem, afum fəp ŋandecəp em suwu.

Afum a doru fəp ŋandekor-koru debeki da ina Kanu.»1

12Ti disrɛ, nwɛ o nwɛ endekɔlɔmər Kanu tecepərɛnɛ tɔn doru.

Ta məcɔŋəs wɛnc əm wəlaŋ kəciya

13Ta pakitinɛnɛ sɔ aŋɛ kɔ akɔ. Mba ntɛ tɔ pəmar pakɛmbərnɛ: Ta məbocɛ wɛnc əm paka mpɛ o mpɛ pɛntam kəsɔŋɛ kɔ kəciya, kɔ pəyɔnɛ fɛ ti məcɔŋəs kɔ kəbɛrɛ pəlɛc mɔ. 14Incərɛ ti belbel kətəŋnɛ disrɛ kɔ tɛcɛmcɛmnɛ ta Mariki Yesu a daka o daka dɔsɔk fɛ disərka. Mba kɔ fum ɛncɛm-cɛmnɛ a daka ndɛ dɔsɔk fɛ-ɛ, daka dadɔkɔ dɔŋyɔnɛ dɔtɔsɔk nnɔ eyi mɔ. 15Kɔ teta peri tɔsɔŋ'am mətɔrəs wɛnc əm wəlaŋ-ɛ, məncəmɛ fɛ kəbɔtər darəŋ. Ta məsɔŋɛ wɛnc əm nwɛ Krist efinɛ tetɔn mɔ kəsimɛ dəkəlaŋ teta peri! 16Paka mpɛ pentesɛ məna mɔ, peri kɔ pəyɔnɛ fɛ ti yomunəs, pəmar fɛ yɔyɔnɛ daka ndɛ wəlɔma ɛntam kəfor'am teta di mɔ. 17Kədi yeri kɔ kəmunəs kəyɔ fɛ dəkəcəmɛ nnɔ dɛbɛ da Kanu deyi mɔ. Mba pəlompu, pəforu, kɔ pəbotu mpɛ Amera Ŋecempi ŋɔŋsɔŋ mɔ, yi yɔyɔ dəkəcəmɛ nnɔ dɛbɛ da Kanu deyi mɔ. 18Məna nwɛ məmbəcɛ Krist tatɔkɔ mɔ, tɔmbɔt Kanu, afum ŋasɔŋ am sɔ ti kance.

19Awa, patɛn ntɛ tɔŋsɔŋ pəforu kɔ ntɛ tɛncəpəs kəgbɛkər kəlaŋ ka kəloŋkanɛ mɔ. 20Ta mələsər dəfum yɛbəc ya Kanu teta peri. Kance kɔ a yeri fəp yɔsɔk. Mba ta mədi peri mpɛ pɛntam kəcɔŋəs wɛnc əm kəciya mɔ. 21Mba ntɛ pəmar pakɛmbərnɛ mɔ, ta məsɔŋɛ wɛnc əm kəloŋɛ dəkiciya teta kəsɔm sɛm, teta kəmunəs, kɔ pəyɔnɛ fɛ ti teta mpɛ o mpɛ. 22Ntɛ məncɛm-cɛmnɛ dɛbəkəc kəyɔnɛ tolompu mɔ, məmɛŋkərnɛ ti məna kɔ Kanu dacɔ. Pəbɔt fum nwɛ mɛcɛmcɛmnɛ mɔn mɔntɔsɔŋɛ kɔ kəsarɛ kiciya mɔ. 23Mba kɔ fum endedinɛ peri kənesər-nesər disrɛ-ɛ, wəkayi ɛlɛcərnɛ kiti, bawo kəgbɛkər kɔn kəlaŋ kəsɔŋɛ fɛ kɔ kədi peri papɔkɔ. Tes ntɛ o ntɛ fum ɔŋyɔ ta ɛŋgbɛkər ti kəlaŋ kɔn mɔ, tɔŋyɔnɛ kɔ kiciya.