ARom 13

Pəmar paleləs abɛ a dɔtɔf

1Pəmar fum o fum pəleləs fənɔntər f'abɛ aŋɛ ŋayi nu kəroŋ mɔ. Ali dɛbɛ deyi fɛ doru ndɛ dɔntɔyɛfɛ nda Kanu mɔ. Nwɛ o nwɛ ɔyɔnɛ wəbɛ, tɛfaŋ ta Kanu tɛdəs kɔ. 2Kɔ fum endegbɛkəl toloku ta wəbɛ-ɛ, tosom ta Kanu t'eyi kəgbɛkəl. Afum aŋɛ ŋaŋfati kəleləs fənɔntər f'abɛ mɔ, kətɔrəs kɔ ŋaŋwernɛ. 3Kɔ mənde kəcyɔ pətɔt-ɛ, məfɔnesɛ fənɔntər f'abɛ, mba kɔ mənde kəcyɔ pəlɛc-ɛ, mɛnɛ mənesɛ fi. Məfaŋ fɛ kənesɛ fənɔntər fa wəbɛ ba? Awa, məcyɔ mes mɔtɔt, məŋsɔtɔ kəkorkoru kɔn. 4Bawo wəmar, yɛbəc ya Kanu yɔ eyi teta pətɔt pam. Mba kɔ məndeyɔ pəlɛc-ɛ, pəmar mənesɛ ŋa, bawo abɛ ŋantɔmpər fənɔntər fətɔrs'am. Bafɔ teta kifəli tɔ ŋandetɔrs'am, yɛbəc ya Kanu yɔ ŋayi, mɛtɛlɛ mɛwɛy-wɛy ma kiti ka Kanu mɔ ŋande kəcmentər nnɔ wəkɔ ɔŋyɔ pəlɛc eyi mɔ. 5Itɔ pəmar paleləs abɛ, bafɔ ntɛ tɔŋsɔŋɛ payay mɛtɛlɛ mɛwɛy-wɛy ma kiti ka Kanu gbəcərəm mɔ, mba teta tɔkɔ amera ŋosu ŋoloku su sɔ kəleləs kəŋan mɔ.

6Ti tɔsɔŋɛ sɔ ntɛ nəŋsɔŋ dut mɔ, afum akɔ ŋaŋwerəs di mɔ, ŋayeŋkɛ kətɔmpər yɛbəc nyɛ Kanu kəncəmbər ŋa mɔ. 7Nəsɔŋ nwɛ o nwɛ mpɛ nəntɔmpərɛ kɔ mɔ. Kɔ tɔyɔnɛ dut-ɛ, nəsɔŋ dut, kɔ tɔyɔnɛ kəfɛk kɔ-ɛ, nəfɛk. Mənesɛ nwɛ pəmar mənesɛ mɔ, məleləs nwɛ pəmar məleləs mɔ.

Kəbɔtər ka wɛnc əm

8Ta nətɔmpərɛ nwɛ o nwɛ debe, mɛnɛ debe da kəbɔtərɛnɛ ndɛ pəmar nətɔmpərɛnɛ mɔ. Nwɛ ɔmbɔtər wɛnc mɔ, osolnɛ yati mosom ma Sariyɛ darəŋ fəp. 9Nəncərɛ mosom ma Kanu: «Ta məsumpər dalakɔ. Ta mədif fum. Ta məkiyɛ. Ta məyɔ fɔr gban-gban.»1 Mosom mamɛ kɔ mɔlɔma fəp meyi tosom tantɛ disrɛ: «Məbɔtər wɛnc əm pəmɔ tɔkɔ məmbɔtərnɛ mɔ.»2 10Kɔ məmbɔtər wɛnc əm-ɛ, məfɔyɔ kɔ pəlɛc mpɛ o mpɛ. Kəbɔtər, kəleləs ka mosom ma Sariyɛ fəp yati kɔ.

Kəkar ka kəder ka Krist

11Nəncərɛ tɛm ntɛ ayi mɔ: Tɛm ta kəyɛfɛ konu dəmere tɔ, bawo kəyac kəlɔtərnɛ su pətas ntɛ anacop kəgbɛkər Krist kəlaŋ mɔ. 12Pəfɔsɔwon kubump kəlip, pəwaŋkəra pocop. Awa, pasak mes mɛlɛc mmɛ ayɔ kubump disrɛ mɔ, pabɛrɛ pəwaŋkəra pa Kanu disrɛ palɛk yosutnɛnɛ ya pi. 13Pasolnɛ pəlompu pəmɔ ntɛ aŋyi pəwaŋkəra mɔ. Pakɛmbərnɛ dɛcɛlək kɔ kəcis, ta payinɛ pəlɛc, ta payi yamayama. Pakɛmbərnɛ kəgbɛkəlɛnɛ kɔ kəter fum kəraca disrɛ. 14Nətubucnɛ kəyɔ mɔyɔ ma Mariki Yesu Krist, ta nəsaknɛ mɛfaŋ monu mɛlɛc mɛtasərnɛ nu.