ARom 12

Kiyi wəyeŋ kəfu nnɔ yɛbəc ya Kanu yeyi mɔ

1Ilɛtsɛnɛ nu, awɛnc im aŋa alaŋ, teta nɔnɔfɔr dɛlarəm ndɛ Kanu kəyɔnɛ su mɔ, a nəsɔŋ Kanu dis donu pəmɔ pəloŋnɛ peyi wəyeŋ, mpɛ ampusɛ Kanu, a kəbɔt kɔ mɔ. Kəsali kaŋkɔ yati kɔ pəmar nəcsalɛnɛ kɔ. 2Ta nəcəmɛ mɔyɔ ma doru dandɛ səyi mɔ darəŋ. Mba nəwosɛ Kanu kəsəkpər nu kəsɔŋ nu domp dosoku dofu. Ti disrɛ, nəntam kəyɛk-yɛk tɔkɔ Kanu kəfaŋ, tɔkɔ tentesɛ, tɔkɔ tɔmbɔt kɔ tolomp cər fɔr ya Kanu kiriŋ mɔ.

3Bawo Kanu kəsɔŋ im kəmar kifəli, icloku nwɛ o nwɛ nəna dacɔ: Ta nəcɛm-cɛmnɛ kəbocnɛ da nəntɔbəp mɔ, mba nwɛ o nwɛ pəkitinɛ ntɛ eyi mɔ, pəmɔ potubuc pa kəlaŋ kɔn nkɛ Kanu kəsɔŋ kɔ kəyer disrɛ mɔ. 4Dis dosu dɔyɔ ca yɛlarəm, pəmɔ waca, wɛcək, fɔr, ləŋəs kɔ pəyɔnɛ fɛ ti-ɛ kusu kɔ kor, mba ca nyɛ yenciyanɛ yɛbəc. 5Tin tayi tɔ, ali ntɛ səyɔnɛ alarəm mɔ, dis din d'ayɔ kəloŋka kosu disrɛ kɔ Krist. Anɔŋkəlɛnɛ aŋɛ kɔ akɔ, kəpocɛ ka nwɛ o nwɛ kəyɔ dəkəcəmɛ, pəmɔ tɔkɔ pəyi ca yɔkɔ yeyi su dəris mɔ. 6Asɔtər Kanu yopocɛ ya kəmar kifəli, kəpocɛ ka nwɛ o nwɛ kənciyanɛ kɔ ka wəkɔ. Kɔ fum ɔyɔ kəpocɛ ka kəlok-lokər afum tosom ta Kanu pəmɔ sayibɛ-ɛ, wəkayi pəloku tɔkɔ tosol kɔ kəgbɛkər kəlaŋ nkɛ ampaŋnɛ fəp mɔ. 7Kɔ fum ɔyɔ kəpocɛ ka kəmar-ɛ, pəmar alɔma. Nwɛ ɔyɔ kəpocɛ ka kətəksɛ mɔ, pətəksɛ, 8kɔ fum ɔyɔ kəpocɛ ka kəyeŋkəs abəkəc-ɛ, pəyeŋkəs alaŋ bəkəc. Nwɛ ende kəcpocɛ daka dɔn mɔ, pəsɔŋɛ di abəkəc ŋosoku, nwɛ ɔŋyɔnɛ wəkiriŋ ka alaŋ mɔ pəsolɛ ŋa kətam kɔn fəp disrɛ, nwɛ ɔŋyɔnɛ ayi dəpəcuca nɔnɔfɔr mɔ, pəmar ŋa pəbotu disrɛ.

9Pəmar kəbɔtər konu kəyɔnɛ kəsoku. Nəter dɛlɛc, nəsektərnɛ dɔtɔt. 10Nəbɔtərɛnɛ bəkəc yonu fəp pəmɔ ntɛ pəmar dɛwɛnca dɔbɔtərɛnɛ mɔ. Nənuŋkɛnɛ kəleləs akɔ. 11Nəyeŋkɛ kəbəcɛ Mariki pəpɔŋ ta dis dɔlɔl nu, dis desikəlɛ nu kəbəcɛ kɔ. 12Nəyi pəbotu disrɛ teta tɔkɔ nəŋgbɛkər mera mɔ. Nəbər dəpəcuca disrɛ. Nəsektərnɛ kətola Kanu. 13Nəsumpərɛnɛ kɔ aŋɛ ampusɛ Kanu ŋayi dəpucuca mɔ, nəbaŋ belbel aŋɛ ŋander nnɔ nəyi mɔ.

14Nətolanɛ pətɔt aŋɛ ŋantɔrəs nu mɔ, ta nətolanɛ ŋa pəlɛc. 15Nəyi pəbotu kɔ aŋɛ ŋaŋyi pəbotu disrɛ mɔ, nəbok kɔ akɔ ŋayi kəbok mɔ. 16Kətəŋnɛ kəyi nu dacɔ. Ta nətɛn kədot banca, mba nəwosɛ kətorɛ banca. Ta nəcəmbərnɛ kəyɔnɛ ka afum acərɛ mes.

17Ta nəluksɛ nwɛ o nwɛ pəlɛc mpɛ ɔyɔ nu mɔ, nətɛn kəyɔ pətɔt afum fəp kiriŋ. 18Kɔ məntam ti-ɛ, məsɛp ntɛ tɔŋsɔŋɛ pəforu kɔ kətəŋnɛ kəyi nu dacɔ kɔ afum fəp mɔ. 19Anapa em, ta nəluksɛ afum ayɛk ŋonu, nəce mɛtɛlɛ mɛwɛy-wɛy ma kiti ka Kanu moluksɛ ŋi. DəYecicəs Yosoku disrɛ Mariki oloku: «In'ɔtɔmpər kəluksɛ ayɛk! In'endeluksɛ nwɛ o nwɛ kəway nkɛ pəmar kɔ kəsɔtɔ mɔ!»1 20Mba oloku sɔ: «Kɔ dor dɔyɔ wəterɛnɛ kam-ɛ, məsɔŋ kɔ yeri pədi. Kɔ amera ŋowos kɔ-ɛ, məsɔŋ kɔ domun pəmun. Kɔ məyɔ tatɔkɔ-ɛ, məndesɔŋɛ wəterɛnɛ kam kəti domp.»2 21Ta məsaknɛ pəlɛc pɛtasərn'am, mba mətasərnɛ pəlɛc kəyɔ kam pətɔt disrɛ.