ARom 11

Kanu kəfən fɛ aYisrayel

1Awa icyif ma: Kanu kəfən afum ɔn aYisrayel ba? Tɔbɔlɛ de! Ina wəkawɛ, bafɔ wəYisrayel iyɔnɛ ba? Yuruya ya Abraham yati y'iwur, wəka kusuŋka ka Bɛŋyamin. 2Kanu kəfən fɛ afum ɔn aŋɛ kənanuŋkɛnɛ kəyɛk-yɛk mɔ. DəYecicəs Yosoku Aŋnabi Eli ombokər Kanu teta aka Yisrayel. Nəncərɛ belbel tobokɛnɛ tɔn ntɛ: 3«Ah Mariki! Ŋandifət sayibɛ, kɔ ŋawuŋəs metek moloŋnɛ mam, sona sem gboŋ s'incəmɛ, ina ŋafaŋ sɔ kədif.»1 4Toloku tere tɔ Kanu kənaluksɛ kɔ-ɛ? «Imɛŋkərnɛ afum wul camət-mɛrəŋ (7.000), aŋɛ ŋanatɔtontnɛnɛ kanu kəcuru Bal suwu mɔ.»2 5Mɔkɔ sɔ tin tayi tɔ: Afum apic ŋacəmɛ aŋɛ Kanu kənayɛk-yɛk kəmar kifəli disrɛ mɔ. 6Kanu kənayɛk-yɛk ŋa kəmar kɔn kifəli disrɛ, mɔyɔ ma afum mɔfɔsɔŋɛ Kanu kəyɛk-yɛk ŋa, mba kəmar kifəli disrɛ yati kəŋsɔŋɛ Kanu kəyɔ ti.

7Cəke cɔ tantɛ toloku-ɛ? Ntɛ afum aka Yisrayel ŋantɛn mɔ, ŋanəŋk fɛ ti, mba aŋɛ Kanu kəyɛk-yɛk mɔ ŋa ŋanəŋk tɔkɔ ŋantɛn mɔ. Alpəs akɔ, Kanu kəsɔŋɛ ŋa kəyɔnɛ atɔtam kəcərɛ, 8pəmɔ tɔkɔ Yecicəs Yosoku yoloku ti mɔ:

«Haŋ ndɛkəl, Kanu kəyeŋkəs ŋa səbomp kətɔcərɛ mes mɔn,

kəyamsɛ fɔr yaŋan kənəŋk,

kɔ kəyamsɛ sɔ ləŋəs yaŋan kəne.»3

9Wəbɛ Dawuda nkɔn oloku sɔ:

«Kəpaŋnɛ kədi yeri kəŋan kəyɔnɛ ŋa towul, manta, kɔ paka mpɛ pɔŋsɔŋɛ ŋa kəpət mɔ,

a ŋadesɔtɔ mɔtɔrsɛ mmɛ pəmar ŋa mɔ,

10a ŋayɔnɛ atɔnəŋk, ta ŋanəŋk sɔ daka o daka!

Mariki, mənut ŋa cumunt tɛm o tɛm pəmɔ acar!»4

Teta kiciya ka aYisrayel tɔsɔŋɛ atɔyɔnɛ aSuyif kəsɔtɔ kəyac

11Icyif ma: ASuyif ŋantalɛ kɔ ŋantɛmpɛnɛ katina ba? Tɔbɔlɛ de! Mba teta kiciya ka aSuyif tɔsɔŋɛ atɔyɔnɛ aSuyif kəsɔtɔ kəyac ka Kanu. Itɔ aSuyif ŋayi kəyɔnɛ kəraca. 12Kɔ kiciya ka aSuyif kəsɔŋ afum a doru fəp pətɔt, kɔ kəbut ka aSuyif kəsɔŋɛ atɔyɔnɛ aSuyif kəsɔtɔ pətɔt, kɔ ŋaloŋkanɛ kəfis disrɛ kɔ atɔyɔnɛ aSuyif-ɛ, pətɔt pendenaŋkanɛ kəbɛk.

Kəyac ka atɔyɔnɛ aSuyif

13Ndɛkəl, icloku nu nəna aŋɛ nəntɔyɔnɛ aSuyif mɔ: Awa, ntɛ iyɔnɛ wəsom ka Yesu nde atɔyɔnɛ aSuyif ŋayi mɔ, yɛbəc yayɛ yeyekt'im domp. 14Incɛm-cɛmnɛ kədəktər awɛnc em aSuyif isɔŋɛ ŋa kəyɔ kəraca, ntɛ tɔŋsɔŋɛ alɔma ŋa dacɔ ŋafis mɔ. 15Ntɛ Kanu kənafən aSuyif kəsək mɔ, tɛnasɔŋɛ kəlompəs ka afum a doru fəp dacɔ kɔ nkɔn. Kɔ Kanu kəndebaŋ sɔ aSuyif-ɛ, pəyi pəmɔ ntɛ ŋaŋfɔtɛ afi dacɔ.

16Məwosɛ a isɔŋ əm totubcɛnɛ ta poloŋnɛ pa cəcom cəcɔkɔ-cɔkɔ: K'andepusɛ Kanu popoc pɔcɔkɔ-cɔkɔ pa poloŋnɛ pa kəcom-ɛ, ampus sɔ kəcom kəlpəs fəp. Tendeŋər ta ti, k'andepusɛ Kanu ntɛntəl ya kətɔk-ɛ, ampusɛ kɔ sɔ wara wa ki.

17AYisrayel ŋayi pəmɔ kətɔk nkɛ ambɔf mɔ, nkɛ ancɛp wara wɔlɔma mɔ. Məna, wətɔyɔnɛ wəSuyif, ndɛkəl oŋ, məyi pəmɔ kəra ka kətɔk ka dop nkɛ anatəpərɛnɛ wara wəlɔma dacɔ mɔ, məntam kəpaŋnɛ kəmun kəlɔl kətɔt nkɛ ntɛntəl ya kətɔk kəbɔf yɔŋsɔŋ əm mɔ. 18Itɔ pəntɔmarɛ, məna wətɔyɔnɛ wəSuyif, mədot banca bawo antubcɛn'am pəmɔ kəra kəcɛp! Ta mədot banca! Məcərɛ a bafɔ mən'osumpur kəntɛntəl, mba kəntɛntəl kəsumpər əm! 19Tɔlɔma məndeloku: Anacɛp wara wawɛ, ntɛ tɔŋsɔŋɛ patəpər ina mɔ. 20Kance kɔ, analiŋ aSuyif pəmɔ ntɛ ancɛp wara mɔ, bawo ŋanagbɛkər fɛ Kanu kəlaŋ. Kɔ məna kəgbɛkər kam kəlaŋ kəsɔŋ'am kəluksərnɛ di pəmɔ ntɛ kəra kəntəpərnɛ nde anacɛp ki mɔ. Ta tɔsɔŋ'am kədot banca, mba mətɔmpər kənesɛ Kanu fɔr kiriŋ. 21Bawo kɔ Kanu kəntɔsak aSuyif aŋɛ ŋanayi pəmɔ wara wa kətɔk kɔn mɔ-ɛ, a ɛntam kəliŋ məna wətɔyɔnɛ wəSuyif, məna nwɛ məyi pəmɔ kəra nkɛ antəpər nnɔ kətɔk ka Kanu kəyi mɔ. 22Awa, məgbɛkərɛ a Kanu kəmbɔt amera, mba kəyeŋk sɔ mes. Kanu kəyeŋk mes nnɔ afum akɔ ŋantɔcəmɛ dɔpɔ dɔn darəŋ mɔ, mba kəmbɔt sɔ amera nnɔ məyi mɔ, kɔ məncəmɛ kəbɔt amera kɔn kaŋkɔ darəŋ-ɛ. Kɔ pəyɔnɛ fɛ ti-ɛ, andesɔcɛp məna pəmɔ kəra. 23Ntɛ tɔyɔnɛ ta aYisrayel mɔ, kɔ ŋawosɛ kəgbɛkər Kanu kəlaŋ-ɛ, Kanu kəntam kəluksɛ ŋa kəbɔt kɔn amera disrɛ pəmɔ ntɛ antəpər kəra nkɛ anacɛp mɔ. 24Məna wətɔyɔnɛ Suyif, antubcɛn'am kəra ka kətɔk ka dop, nkɛ fum ɛncɛp pətəpər sɔ ki kətɔk kəbɔf mɔ. Kanu kənaliŋ əm nde mənayi mɔ ntɛ tɔŋsɔŋɛ kətam kəkotərɛn'am sɔ kəbɔt kɔn amera mɔ. Antubcɛnɛ aSuyif kɔ kətɔk kəbɔf nkɛ Kanu kəndegbɔkərɛ sɔ kətəpər kətɔk kəbɔf kaŋkɔ kəmpoŋ mɔ. Pəfɔdecuca Kanu kəyɔ ti yati!

Tɛlpəs, Kanu kəndeyac aka Yisrayel fəp

25Awɛnc im aŋa alaŋ, ifaŋ a nəcərɛ tes ta Kanu tɔkɔ tɔŋgbɔpnɛ nnɔ afum alɔma ŋayi mɔ. Ti disrɛ, ta nədot banca nəccɛm-cɛmnɛ a acərɛ kəkɔtɛnɛ mes ŋɔ nəyɔnɛ. Aka Yisrayel kəsək kin fəp ŋanafati kəcərɛ ti, kəfati kəŋan kəndewon haŋ kəloŋkanɛ ka atɔyɔnɛ aSuyif fəp ŋader nnɔ Kanu kəyi mɔ. 26Awa andeyac aka Yisrayel fəp pəmɔ tɔkɔ Yecicəs Yosoku yoloku ti mɔ:

«DəSiyɔŋ5 wəyac endeyɛfɛ,

endeliŋ kətɔleləs Kanu fəp ka yuruya ya Yakuba.

27Mənəŋk, danapa ndɛ d'indesek kɔ ŋa,

tɛm ntɛ indeliŋ kiciya kəŋan mɔ.»6

28ASuyif kəce kəŋan Kibaru Kətɔt kəsɔŋɛ ŋa kəyɔnɛ aterɛnɛ a Kanu, kɔ tɔyɔnɛ pətɔt pa nəna atɔyɔnɛ aSuyif. Mba kəyɛk-yɛk ka Kanu disrɛ, aSuyif ŋafɔsak kəyɔnɛ afum ɔn, kɔ kəmbɔtər ŋa teta atem aŋan. 29Ti disrɛ, Kanu kəfɔbaŋ yopocɛ ya kəmar kɔn kifəli, kəfɔwɛnəs sɔ aŋɛ kəlip kəwe ŋayɔnɛ akɔn mɔ. 30Cɔkɔ-cɔkɔ, nəna atɔyɔnɛ aSuyif, nənawosɛ fɛ kəleləs Kanu, mba ndɛkəl oŋ Kanu kəyɔnɛ nu nɔnɔfɔr, bawo aSuyif ŋawosɛ fɛ kəleləs ki. 31A tin tayi tɔ, kɔ kətɔleləs ka aSuyif kəmɔkɔ kəsɔŋɛ Kanu kəyɔnɛ atɔyɔnɛ aSuyif nɔnɔfɔr-ɛ, ŋa aSuyif sɔ ŋantam kəsɔtər Kanu nɔnɔfɔr. 32Kanu kəwosɛ afum fəp ŋayi kətɔleləs disrɛ ntɛ tɔŋsɔŋɛ pəmentər fəp nɔnɔfɔr dɔn mɔ.

Debeki kɔ dɔtɔt da Kanu dɛmbɛk

33Kanu kəmbɛk yati! Kəcərɛ kɔn kəkɔtɛnɛ mes kɔ mɛcərɛ mɔn montukmɛ! Ali fum ɔfɔtam kəcərɛ mes mosumpər ma Kanu, fum ɔfɔtam kəcərɛ tɔkɔtɛnɛ ta tɛfaŋ tɔn. Yecicəs Yosoku yoloku:

34«An'ɛcərɛ mɛcɛmcɛmnɛ ma Mariki-ɛ?

An'ɔyɔnɛ wətəksɛ kɔn tɔkɔt-ɛ?»7

35«An'onuŋkɛnɛ kəpocɛ Kanu paka,

ntɛ tɔŋsɔŋɛ a mɛnɛ Kanu sɔ kəluksɛ wəkayi kəway mɔ-ɛ?»8

36Bawo ca fəp, nda nkɔn Kanu yɛŋyɛfɛ. Nkɔn ɔsɔŋɛ ca fəp kəyi, tetɔn tɔsɔŋɛ kɔ ca fəp yeyi doru. Pakor-koru debeki da Kanu tɛm fəp! Amina.