ARom 10

1Awɛnc im aŋa alaŋ Krist, ifaŋ abəkəc ŋem fəp kətola kem Kanu a kəyac aSuyif. 2Bawo iyɔnɛ ti sede a ŋayi kəsiməs teta Kanu, mba kəcərɛ kəŋan kəsɔksər fɛ ŋa kəsiməs kaŋkɔ. 3Bawo ŋancərɛ fɛ tɔkɔ tɔŋsɔŋɛ Kanu kəlɔm afum alompu mɔ, ŋactɛn kəlɔmnɛ ŋasərka alompu, ŋawosɛ fɛ kəcəmɛ darəŋ tɔkɔ tɔŋsɔŋɛ Kanu kəlɔm su alompu mɔ. 4Ti disrɛ, Krist ɔyɔnɛ dəkələpsər da Sariyɛ sa Musa, ndɛkəl oŋ Kanu kəŋlɔm afum alompu aŋɛ o aŋɛ ŋaŋgbɛkər kəlaŋ kəŋan Yesu Krist mɔ.

Kanu kəndeyac nwɛ o nwɛ ɛŋgbɛkər Mariki Yesu kəlaŋ mɔ

5Kɔ Musa ɔsɔksər ntɛ Sariyɛ səŋlɔm fum wəlompu mɔ, ntɛ tɔ Yecicəs Yosoku yoloku: «Nwɛ ende kəcyɔ mosom ma si mɔ, eŋyinɛ mi doru.»1 6Ntɛ tɔ Yecicəs Yosoku yoloku teta dolompu ndɛ aŋsɔtɔ kəlaŋ disrɛ mɔ. Ancic ti: «Ta məyifnɛ dɛbəkəc: ‹An'endepɛ dəKɔm-ɛ?›2 Itɔ tatakɔ an'endetorɛnɛ Krist-ɛ?» 7«Kɔ pəyɔnɛ fɛ ti, ta məyifnɛ sɔ: ‹An'endetor dabiya3 pədepɛnɛ Krist afi dacɔ-ɛ?›» 8Ntɛ tɔ Yecicəs Yosoku yoloku teta dolompu da Kanu: «Toloku tantɛ tɔlɔtərn'am, tey'əm dəkusu kɔ dɛbəkəc.»4 Toloku tantɛ, tosom ta kəgbɛkər kəlaŋ tɔ ntɛ səyi kədəŋkər nu mɔ. 9Ti disrɛ, kɔ kusu kam kəwosɛ kəloku ti afum fəp fɔr kiriŋ a Yesu, Mariki ɔfɔ, kɔ abəkəc ŋam disrɛ məŋgbɛkər kəlaŋ kam a Kanu kənatimi kɔ dədefi-ɛ, Kanu kəndeyac əm. 10Bawo nwɛ ɛŋgbɛkər kəlaŋ kaŋkɔ dɛbəkəc mɔ, Kanu kəŋlɔm kɔ wəlompu, kɔ fum nwɛ oŋloku ti kusu kɔn mɔ, Kanu kəndeyac kɔ. 11Awa, Yecicəs Yosoku yoloku sɔ: «Nwɛ o nwɛ ɛŋgbɛkər Kanu kəlaŋ mɔ ɔfɔdelapərnɛ fɛw.»5 12Kəgbɛy kəyi fɛ aSuyif kɔ atɔyɔnɛ aSuyif dacɔ. Fəp faŋan Mariki min mɔ ŋampaŋnɛ, mmɛ mɔŋsɔŋ pətɔt pɔn afum fəp aŋɛ ŋaŋkornɛ kɔ mɔ. Itɔ ancic dəYecicəs Yosoku: 13«Nwɛ o nwɛ endekornɛ Mariki mɔ endefis.»

14Cəke c'antam kəkornɛ Mariki ta aŋgbɛkər kɔ kəlaŋ-ɛ? Cəke c'antam kəgbɛkər Mariki kəlaŋ ta ane pacdəŋk tetɔn-ɛ? Cəke c'antam kəne pacloku tetɔn kɔ fum o fum ɔntɔdəŋk ti-ɛ? 15Cəke c'antam ti kədəŋk kɔ tɔyɔnɛ asom fɛ ti fum-ɛ? Yecicəs Yosoku yoloku ti belbel: «Pətɔt pere peyi kənəŋk ka aŋɛ ŋayi kəkɛrɛ kibaru kətɔt mɔ.»6 16Mba bafɔ fəp fənaleləs Kibaru Kətɔt. Ɛy, sayibɛ Esayi ɛnayif ti: «Mariki, an'ɛgbɛkər kəlaŋ tosom tosu-ɛ?»7 17Ti disrɛ kawandi nkɛ fum ɛncəŋkəl mɔ ɔŋsɔtɔ kəlaŋ, kɔ Kibaru kaŋkɔ kəyɔnɛ kawandi ka moloku ma Krist.

18Awa iyif ma: ASuyif ŋane fɛ toloku tatɔkɔ ba? Ɛy, ŋane ti de! Ancic dəYecicəs Yosoku:

«Səne sim saŋan antɔf ŋaŋɛ fəp kəroŋ,

kɔ moloku maŋan mɔŋkɔ haŋ nde doru dɛləpsər mɔ.»8

19Awa iyif nu sɔ ma: Afum aka Yisrayel ŋancərɛ fɛ ti oŋ ba? Musa ɛnanuŋkɛnɛ kəloku ŋa ti:

«Indesɔŋɛ nu kəyɔ kəraca nnɔ afum aŋɛ atɔf ŋaŋan ŋɔntɔyɔ dəkəcəmɛ ŋayi mɔ.

Indesɔŋɛ pətɛlɛ nu nnɔ afum aŋɛ ŋantɔsɔk səbomp ŋayi mɔ.»9

20Sayibɛ Esayi ɔyɔ abəkəc kədəŋk teta Kanu:

«Aŋɛ ŋanatɔtɛn im mɔ, akakɔ ŋanəŋk im.

K'imentərnɛ nnɔ aŋɛ ŋantɔwer im ali paka mɔ.»10

21Mba teta aka Yisrayel, Kanu kəloku:

«Kəyɛfɛ tɛbətbət haŋ dɔfɔy incencər afum waca

aŋɛ ŋantɔleləs im kɔ ŋayeŋkər im səbomp mɔ.»11