ARom 9

Kanu kɔ afum aŋɛ ɛyɛk-yɛk mɔ

1Iloku nu kance, ina nwɛ aloŋka kɔ Krist mɔ, ifɔyemɛ. Amera ŋem kɔ Amera Ŋecempi yɛtəŋnɛ kəsɔŋ sede sa ti: 2Ilarɛ kəmɔncnɛ kəpɔŋ nkɛ k'iyi kətɔrəs im tɛm fəp nnɔ abəkəc ŋem disrɛ mɔ. 3Kɔ tɔyɔnɛ tɛctam kəyi-ɛ, ina Pol iwosɛ kətola inasərka Kanu kəwɛnəs im, səgbɛyɛnɛ kɔ Krist teta pətɔt pa awɛnc im aŋa. Afum akin ayi ŋɔ səyɔnɛ, 4aYisrayel. Ŋa ŋɔ Kanu kəsɔŋ kəyɔnɛ awut adusum, kɔ kəyi kɔn yati kəmentər ŋa nɔrɔ da debeki dɔn. Ŋa ŋɔ Kanu kəsek danapa, kɔ kəsɔŋ ŋa Sariyɛ, kəsali, kɔ layidi, 5kɔ kəsɔŋ ŋa sɔ atem atɔt. Dokom da aYisrayel dacɔ yati d'anakom Krist cəfum, wəbɛ nwɛ Kanu kəyɛk-yɛk pəyi afum kɔ ca ya doru fəp kəroŋ mɔ. Pəmar pakor-koru Kanu doru o doru! Amina!

6Bafɔ teyi pəmɔ ntɛ toloku ta Kanu tombut tɛfaŋ tɔn mɔ. Aŋɛ aŋkom atɔf ŋa Yisrayel mɔ, ŋayɔnɛ fɛ aYisrayel fəp. 7Nənəŋk ntɛ: Afum aŋɛ aŋkom kəlɔ disrɛ ka Abraham mɔ, bafɔ fəp fəyɔnɛ yuruya ya Abraham de. Bawo Kanu kənaloku Abraham ntɛ: «Yuruya nyɛ inalɛk'am temer kədesɔŋ mɔ, dəSiyaka məndesɔtɔ ŋa.»1 8Tedisrɛ ta moloku mamɛ tɛntɛ: Mba yuruya nyɛ aŋkomɛ Abraham mɔ fəp ŋayɔnɛ fɛ awut a Kanu. Mba awut aŋɛ aŋkom layidi disrɛ mɔ, ŋa gbəcərəm ŋayɔnɛ yuruya ya Abraham. 9Moloku ma layidi da Kanu mɛmɛ: «Inder dok tɛm tantɛ, Sara endekom wan wərkun.»2

10Pəlip fɛ tatɔkɔ: Pacɛm-cɛmnɛ sɔ Rebeka, nwɛ ɛnasɔtɔ cəberi mɔ, wos pəyɔnɛ wətem kosu Siyaka. 11Mba Kanu kəyɔ dɔpɔ dɔn kəyɛk-yɛk ka afum: Kəyɛk-yɛk kaŋkɔ kəyɔnɛ kəwe nkɛ eŋwe ŋa mɔ, bafɔ teta mɔyɔ maŋan. Kəmentər a esektərnɛ teta dɔpɔ dadɔkɔ, kɔ Kanu kəloku Rebeka ta ɛntakom awut ɔn-ɛ aŋɛ ŋanatɔyɔ pətɔt ta ŋayɔ pəlɛc mɔ: «Wəbeki endeyi wəfɛt tantɔf,» 12kɔ Kanu kəloku Rebeka ta ɛntakom awut ɔn-ɛ, aŋɛ ŋanatɔyɔ pətɔt ta ŋayɔ pəlɛc mɔ: «Wəbeki endeyi wəfɛt tantɔf.»3 13Ancic ti dəYecicəs Yosoku: «Imbɔtər Yakuba, k'ifən Esayu.»4

14Awa cəke cɔ tantɛ toloku-ɛ? Kanu kəlomp fɛ ba? Tɔbɔlɛ! 15Bawo Kanu kənaloku Musa: «Indebɔt amera nnɔ nwɛ ifaŋ kəbɔtɛ amera eyi mɔ, indeyɔnɛ nɔnɔfɔr nwɛ indefaŋ kəyɔnɛ nɔnɔfɔr mɔ.»5 16Dobotu amera da Kanu dɔfɔyɛfɛ nnɔ mɛfaŋ ma afum meyi mɔ, dɔfɔyɛfɛ nnɔ kəsɛp kəŋan kəyi mɔ, mba nnɔ Kanu nkɛ kəŋyɔnɛ nɔnɔfɔr mɔ dɛŋyɛfɛ. 17Nde dəYecicəs Yosoku disrɛ, kɔ Kanu kəloku firawona wəbɛ wəka Misira: «Isɔŋ'am kəyɔnɛ ka wəbɛ ntɛ tɔŋsɔŋɛ imentər əm fənɔntər fem mɔ, isɔŋɛ sɔ tewe tem tɛsamsər doru fəp.»6 18Awa, Kanu kəŋyɔnɛ nɔnɔfɔr nwɛ kəŋfaŋ kəyɔnɛ nɔnɔfɔr mɔ, kəŋyeŋkəs abəkəc nwɛ kəŋfaŋ mɔ.

Mɛtɛlɛ kɔ nɔnɔfɔr da Kanu

19Tɔlɔma məndetam kəcyif'im: «Ta ake tɔ Kanu kəndesɔnalɛ su-ɛ? Bawo ali fum ɔfɔtam kəfati tɛfaŋ tɔn.» 20An'ɔ məyɔnɛ, məna fum, kədegbɛkəlɛnɛ kɔ Kanu-ɛ? Paka polompəs pɛntam kəyif wəlompəs ka pi: «Ta ake tɔ məlompəs em tantɛ-ɛ?»7 21Wəsɛl ɔfɔtam kəsɛlɛ dos dɔn tɛfaŋ tɔn ba? Dədos din dadɔkɔ ɛntam kəsɛlɛ tɔbɔl pɔtɔt pa wəbɛ kɔ pəyɔnɛ fɛ ti-ɛ kəbɛ ka dɔsɔk o dɔsɔk. 22Kanu kənafaŋ kəmentər mɛtɛlɛ mɔn kəsɔŋɛ afum kəcərɛ fənɔntər fɔn. Mba kɔ kəwosɛ kəkar kəbol-bolu nnɔ aŋɛ pənamar oŋ kəwɛkər mɛtɛlɛ mɔn aŋɛ ŋanabəp kələsər mɔ. 23Akɔ ɛnamentər nɔnɔfɔr dɔn mɔ ɛnafaŋ kəsɔŋɛ ŋa kəcərɛ debeki da nɔrɔ dɔn, k'olompəs ŋa kəsɔtɔ ka nɔrɔ dadɔkɔ. 24Afum akakɔ, sən'ɔfɔ. K'ewe aSuyif, mba k'ewe sɔ atɔyɔnɛ aSuyif. 25Kanu kəloku ti nde buk ba sayibɛ Hose:

«Aŋɛ ŋantɔyɔnɛ afum em mɔ,

iŋwe ŋa ‹afum em›.

Afum aŋɛ intɔbɔtər mɔ, indewe ŋa ‹afum aŋɛ imbɔtər mɔ.›»8 26Nnɔ analoku afum:

«‹Bafɔ afum em ŋɔ nəyɔnɛ,› andewe nu: ‹Awut a Kanu nkɛ kəyi wəyeŋ mɔ.›»9

27Nnɔ Esayi eyi mɔ, teta Yisrayel t'onckul-kulɛnɛ: «Kɔ dɛlay da aka Yisrayel dendeyi pəmɔ kəsənc ka dəkəba-ɛ, apic gbəcərəm ŋa dacɔ ŋɔ Kanu kəndeyac, 28Mariki endelas katəna nnɔ doru dandɛ tɔkɔ ɛnaloku mɔ.»10 29Pəmɔ tɔkɔ Esayi ɛnanuŋkɛnɛ ti kəloku mɔ:

«Kɔ pənayɔnɛ a Mariki ma asɔdar a darenc fəp mɛnasakərɛ fɛ su yuruya-ɛ,

kɔ pəyi su pəmɔ dare da Sodom,

pəmɔ dare da Komora.»11

Kanu kəŋlɔm fum wəlompu ntɛ ɛŋgbɛkər kɔ kəlaŋ mɔ

30Cəke cɔ tantɛ toloku-ɛ? Atɔyɔnɛ aSuyif aŋɛ ŋanatɔtɛn dolompu mɔ, kɔ Kanu kəlɔm ŋa alompu teta kəgbɛkər kəlaŋ kəŋan. 31Mba aka Yisrayel aŋɛ ŋanatɛn a Kanu kəlɔm ŋa alompu teta kəleləs kəŋan sariyɛ mɔ, ŋancepər kəsək ka sariyɛ sasɔkɔ. 32Ake'sɔŋɛ ti-ɛ? Bawo aSuyif ŋanatɛn fɛ a Kanu kəlɔm ŋa alompu teta kəgbɛkər kəlaŋ kəŋan, mba ŋanacɛm-cɛmnɛ a teta mɔyɔ maŋan mɔtɔt mɛntam kəsɔŋɛ ŋa kəyɔnɛ alompu. Kɔ ŋampət tasar mpɛ pɔsɔŋɛ ŋa kətɛmpɛnɛ mɔ. 33Awa dəYecicəs Yosoku Kanu kəloku:

«Imboc dare da Siyɔŋ tasar mpɛ pɔsɔŋɛ afum kəpət mɔ, tasar peyeŋki mpɛ pɔŋsɔŋɛ fum kətɛmpɛnɛ mɔ.

Məna nwɛ məŋgbɛkər pi kəlaŋ mɔ, məfɔlapərnɛ few.»12