ARom 2

Kiti nkɛ Kanu kəndebocər afum mɔ

1Afɔŋaŋnɛnɛ məna nwɛ o nwɛ məndekiti akɔ, mba məcyɔ mes mɛlɛc mamɔkɔ pəmɔ ŋa mɔ! Awa, kiti kam yati kɔ məyi kəbocərnɛ. 2Awa, səncərɛ a kiti nkɛ Kanu kəmbocɛ akɔ ŋaŋyɔ mes mamɔkɔ mɔ, kiti kəsurɛnɛ kance. 3Məna nwɛ məŋkiti akɔ ŋaŋyɔ mes mɛlɛc mamɔkɔ, mba məcyɔ mes min mayi pəmɔ ŋa mɔ, məncɛm-cɛmnɛ a məndeyaynɛ kiti ka Kanu ba? 4Kɔ pəyɔnɛ fɛ ti-ɛ, məndɛncəs debeki da dobotu amera da Kanu, kəŋaŋnɛ kɔn kɔ kətɔbɛlkər kɔn. Məncərɛ fɛ a dobotu amera da Kanu dɔŋsɔŋ'am kəsəkpər abəkəc məcəmɛ dolompu darəŋ ba? 5Dɛtaŋi dam aləŋəs kɔ kəfati kam kəsəkpər abəkəc kəsɔŋɛ Kanu kədetɔrəs əm pəpɔŋ pətas tɔcɔkɔ-cɔkɔ, dɔsɔk ndɛ kəndementər mɛtɛlɛ mɛwɛy-wɛy ma kiti kɔn kəlompu mɔ. 6Kanu kəndesɔŋ nwɛ o nwɛ kəway kətəŋnɛnɛ ka mes mɔn mɔyɔ: 7Kəca kətɔt, Kanu kəndesɔŋ kiyi wəyeŋ ka doru o doru aŋɛ ŋambər pəcucanɛ disrɛ kəcyɔ pətɔt ŋactɛn kəyekti kəŋan domp nkɛ kəyi kəder mɔ, delel, kɔ kətɔfi. 8Mba kəca kəmeriya, Kanu kəndesɔŋ mɛtɛlɛ mɛwɛy-wɛy ma kiti kɔn aŋɛ ŋaŋyɔ mɛfaŋ mɛlɛc maŋan, ŋasak kance kɔ pəlompu, ŋacəmɛ mes mɛlɛc darəŋ mɔ. 9Nwɛ o nwɛ ɔŋyɔ pɛlɛc mɔ, pəcuca kɔ kəlɛcɛ-lɛcɛ abəkəc kəndeyi kɔ, aSuyif ŋɔ kəndenuŋkɛnɛ, kɔ tɛyɛfɛ day-ɛ, atɔyɔnɛ aSuyif. 10Mba Kanu kəndesɔŋ kəyekti domp nkɛ kəyi kəder mɔ, delel kɔ doforu abəkəc akɔ ŋancyɔ mes mɔtɔt mɔ fəp, aSuyif ŋɔ kəndenuŋkɛnɛ sɔ, kɔ tɛyɛfɛ day-ɛ, atɔyɔnɛ aSuyif. 11Bawo kəcəmɛnɛ fum kəyi fɛ nnɔ Kanu kəyi mɔ.

12Afum aŋɛ ŋanciya kətɔcərɛ ka sariyɛ sa Musa mɔ, ŋandefi, mba afɔdekitinɛ ŋa Sariyɛ sasɔkɔ. Aŋɛ ŋanciya ŋacərɛ Sariyɛ mɔ, Sariyɛ s'andekitinɛ ŋa. 13Awa, bafɔ akɔ ŋaŋne gbəcərəm Sariyɛ mɔ ŋɔ Kanu kəlɔm alompu, mba aŋɛ ŋaŋkɔtɛnɛ si pəlompu disrɛ mɔ, ŋɔ kəndelɔm alompu. 14Aŋɛ ŋantɔyɔnɛ aSuyif mɔ, ŋancərɛ fɛ Sariyɛ sa Musa. Mba alɔma ŋaŋsurɛnɛ kəyɔ mes mɔkɔ Sariyɛ sasɔkɔ səloku mɔ pəmɔ ntɛ aŋkomɛnɛ ŋa si mɔ. Ali afum akakɔ ŋayɔ fɛ Sariyɛ nsɛ Kanu kəsɔŋ Musa mɔ, mba sariyɛ səŋan sɔ ŋayɔnɛ ŋasərka. 15Ŋaŋmentər a sariyɛ sa kəcəmɛ pəlompu darəŋ səyi ŋa dəbəkəc, mera yaŋan yɔyɔnɛ sede sa ti. Ntɛ ŋantam kəyemsɛnɛ ŋasərka kiciya kəŋan, kɔ ntɛ ŋantam kəyacnɛ ki mɔ, tementər sɔ ti. 16Andenəŋk ti belbel dɔsɔk dadɔkɔ Kanu kəndekitinɛ Yesu Krist mes mmɛ afum ŋamɛŋk mɔ fəp, pəmɔ tɔkɔ iloku ti Kibaru Kətɔt disrɛ mɔ.

ASuyif kɔ Sariyɛ

17Mba məna, məntɔmpərnɛ tewe ta wəSuyif kɔ məsocərnɛ Sariyɛ, kɔ məndot banca teta Kanu kam. 18Məncərɛ tɛfaŋ tɔn, kɔ Sariyɛ sɔn səntəks'am kətam kəyɛk-yɛk kəyɔ tes ntɛ tentesɛ mɔ. 19Məna wəSuyif, məncɛm-cɛmnɛ kəyɔnɛ wəsolɛ ka atɔnəŋk, kɔ pəwaŋkəra pa akɔ ŋayi kubump disrɛ mɔ, 20məncɛm-cɛmnɛ sɔ kəyɔnɛ wətəksɛ atɔcərɛ kɔ wədusum awut afɛt, bawo Sariyɛ disrɛ məncɛm-cɛmnɛ kəsɔtɔ ntɛ tɔyɔnɛ təŋkəm ta kəcərɛ kətɔt yati kɔ ta kance mɔ. 21Məna nwɛ məntəksɛ akɔ, t'ake tɔ məntɔtəksɛnɛ mənasərka-ɛ? Məna məckawandi akɔ a ta ŋakiyɛ, mba məna məckiyɛ! 22Məna məcloku a ta pasumpər dalakɔ, mba məna məcsumpər di! Məna nwɛ mənter mɛrəŋka pəmɔ ntɛ Kanu kənter mi mɔ, t'ake tɔ məŋkiyɛnɛ ca yɔkɔ yeyi mofo mɛsalɛnɛ maŋan mɔ-ɛ? 23Məna nwɛ məndot banca a məntɔmpər Sariyɛ mba ta məŋleləs Kanu-ɛ, ntende məcfər-fərəs tɔkɔ Sariyɛ səloku mɔ! 24Ti disrɛ Yecicəs Yosoku yoloku: «Bawo teta nəna aSuyif tɔsɔŋɛ ntɛ afum ŋafani tewe ta Kanu tɔf ya doru yɔlɔma mɔ.»1

25Kɔ tɔyɔnɛ məcəmɛ Sariyɛ darəŋ-ɛ, kance kɔ kəkənc kəyɔ dəkəcəmɛ nnɔ məyi mɔ. Mba kɔ mətɔcəmɛ Sariyɛ darəŋ-ɛ, kəkənc kam kəyɔ fɛ dəkəcəmɛ, kəyɔn'am pəmɔ wətɔkənc. 26Kɔ tɔyɔnɛ wətɔkənc pəcəmɛ dɔpɔ da Sariyɛ darəŋ cər-ɛ, afɔdelɔm wəkakɔ pəmɔ wəkənc ba? 27Wərkun nwɛ aŋkənc fɛ kɔ dəris, mba ɛncəmɛ Sariyɛ darəŋ. Awa, nkɔn endekit'əm, məna wəSuyif wəkakɔ məntɔleləs Sariyɛ mɔ, ali ntɛ məntɔmpər kəcərɛ ka Yecicəs Yosoku kɔ kəkənc yati mɔ! 28WəSuyif yati, bafɔ nwɛ dis dɔn dowurɛnɛ kɔ d'aSuyif mɔ de. Kɔ wəkənc yati, bafɔ nwɛ kəfat kəyi dəris mɔ gbəcərəm ɔfɔ. 29Mba wəSuyif yati, fum ɔfɔ nwɛ ɔyɔnɛ wəSuyif tedisrɛ tɔn mɔ, nwɛ aŋkənc dɛbəkəc, kəkənc nkɛ kəŋyɛfɛ dəAmera ŋa Kanu, bafɔ nkɛ kəŋyɛfɛ kəcəmɛ ka Sariyɛ səcicəs darəŋ mɔ. WəSuyif wəkakɔ ɔfɔsɔtɔ kəkor-koru nnɔ afum ŋayi mɔ, mba Kanu k'ɔŋsɔtər ki.