ARom 1

Pol eyif alaŋ a Yesu nde Rom

1Ina, Pol wəmarəs wəka Yesu Krist, incicɛ nu. Kanu kəw'em kədeyɔnɛ wəsom ka Yesu, k'ɛncəmbər im taciŋa teta kəsamsər Kibaru Kətɔt ka Kanu. 2Kanu kənalɛk temer kəyɛfɛ tɛm tobolu kəsɔŋ Kibaru Kətɔt kaŋkɔ. Sayibɛ ɔn ŋanaloku ti dəYecicəs Yosoku. 3Kəlɛk ka Kanu temer kaŋkɔ kəyɔnɛ teta Wan kɔn: Yecicəs Yosoku yɛnaloku a Wan nwɛ endewur dokom da Dawuda mɔ, cəfum c'endeyi. 4Mba nnɔ decempi da Kanu deyi mɔ, Kanu kənamentərɛ wan nwɛ fənɔntər fɔn Wan ka Kanu ntɛ kənayekti kɔ afi dacɔ mɔ. Wan wəkayi, Yesu Krist Mariki mosu ɔfɔ. 5Dəŋkɔn Yesu, isɔtɔ kəmar kifəli kəlɛk dəkəcəmɛ da wəsom kɔn, ti tɔŋsɔŋɛ kəkekərɛ afum a tɔf ya doru fəp kəgbɛkər Yesu kəlaŋ kɔ kəleləs. 6Nəna aka kəloŋkanɛ ka alaŋ a Rom, afum akakɔ ŋɔ nəyi dacɔ, aŋɛ Yesu Krist ewe kədeyɔnɛ akɔn mɔ.

7Incicɛ nəna aŋɛ nəyi dare da Rom, nəna fəp aŋɛ Kanu kəmbɔtər belbel, aŋɛ ewe taciŋa k'ampusɛ kɔ ŋa mɔ. Intola Kanu Kas kosu kɔ Mariki Yesu Krist a ŋasɔŋ nu kəmar kifəli kɔ pəforu!

Pəmbas Pol kəkɔnəŋk alaŋ a Yesu aka Rom

8Tɔcɔkɔ-cɔkɔ, iyif Kanu kem barka kəmar ka Yesu Krist disrɛ teta nəna fəp, bawo teta kəgbɛkər konu kəlaŋ t'ayi kəloku doru kɔrkɔr. 9Kanu kəyɔn'em sede a kance kɔ k'indetola ki-ɛ, imbonc mewe monu tɛm fəp. Abəkəc ŋem fəp ŋ'iyi kəbəcɛ Kanu k'indesamsər Kibaru Kətɔt teta Wan kɔn-ɛ. 10Intola Kanu tɛm o tɛm pəsɔŋ'em kəsɔtɔ tɛm tɔtɔt kəkɔnəŋk nu, kɔ tɔyɔnɛ tɛfaŋ tɔn-ɛ. 11Bawo pəmbas im pəpɔŋ kədenəŋk nu, ntɛ tɔŋsɔŋɛ ider payerɛnɛ kəmar kifəli nkɛ kəntam kəcəpəs bəkəc yonu mɔ. 12Awa it'ɔyɔnɛ, k'indeyi nu kəsək-ɛ, kəlaŋ nkɛ nəmpaŋnɛ kɔ ina mɔ kəndecəpəs fəp fosu. 13Awɛnc im aŋa alaŋ, ifaŋ a nəcərɛ ntɛ: Tɛm tɛlarəm iŋlompəsnɛ kəder nde ndoronu, mba haŋ ndɛkəl intam fɛ ti. Ifaŋ a yɛbəc yem yɔsɔŋɛ nu kəbɛrɛnɛ kəlaŋ pəmɔ tɔkɔ yɛnasɔŋɛ atɔyɔnɛ aSuyif a tɔf ya doru yɔlɔma kəlaŋ mɔ. 14Pəmar ikɔtər atɔyɔnɛ aSuyif fəp idəŋkər ŋa Kibaru Kətɔt: Afum aŋɛ ŋayɔ sariyɛ kɔ aŋɛ ŋatɔyɔ si mɔ, aŋɛ ŋantəkəs kɔ aŋɛ ŋantɔtəkəs mɔ. 15Ti tɔsɔŋɛ ntɛ pəmbas im pəpɔŋ kəkɔdəŋkər nu Kibaru Kətɔt nəna aŋɛ nəyi dare da Rom mɔ.

Kibaru Kətɔt kəyɔnɛ fənɔntər fa Kanu

16Ifɔlapərnɛ kəsamsər Kibaru Kətɔt teta Yesu Krist, bawo Kibaru Kətɔt, fənɔntər fa Kanu fɔ nfɛ ɛŋyacɛ aŋɛ o aŋɛ ŋaŋgbɛkər Krist kəlaŋ mɔ, aSuyif krɛsna mba kɔ atɔyɔnɛ aSuyif sɔ. 17Ntɛ tɔ Kibaru Kətɔt kəmentər: Kanu kəŋlɔm afum alompu fɔr yɔn kiriŋ, kɔ tɔyɔnɛ a ŋaŋgbɛkər kəlaŋ kəŋan Kanu-ɛ. Kəlaŋ kaŋkɔ gbəcərəm kəntəŋnɛ. Ɛy, aloku ti pəsoku pɛs disrɛ dəYecicəs Yosoku: «Nwɛ ɛŋgbɛkər Kanu kəlaŋ mɔ, olomp. Kəlaŋ disrɛ kɔ wəlompu eŋyinɛ doru.»1

Afum ŋafɔdeyɔ toloku ta kətɔcərɛ Kanu

18Ti disrɛ, mɛtɛlɛ mɛwɛy-wɛy ma kiti ka Kanu, dəkɔm mɛŋyɛfɛ kəder nnɔ atɔleləs Kanu kɔ nnɔ atɔlomp ŋayi mɔ. Dəmɔyɔ maŋan mɔtɔlomp, ŋaŋyamsər kance kəkɔ kiriŋ. 19Ntɛ antam kəcərɛ teta Kanu mɔ, tɔsɔkər ŋa, bawo Kanu kisərka kəmentər ŋa ti pəsoku disrɛ. 20Kance kɔ: Fənɔntər fa Kanu kɔ debeki dɔn yɔfɔlip, mɔyɔ mɔ mmɛ antɔtam kənəŋk mɔ. Mba kəyɛfɛ kəwurɛ ka fum doru, dosoku domp dɛntam mi kəcərɛ dəmes mɔyɔ ma Kanu. Afum a doru ŋafɔdeyɔ tɔlɔm o tɔlɔm toloku ta kətɔcərɛ Kanu ntɛ tendesɔŋɛ paŋaŋnɛnɛ ŋa kiti kɔn mɔ. 21Bawo ŋancərɛ mɔyɔ ma Kanu, mba ŋafɔkor-koru ki, ŋafɔyif ki barka teta mɔyɔ mɔn mɔtɔt, kɔ ŋasɔlɛ dəmɛcɛm-cɛmnɛ mɔtɔyɔ dəkəcəmɛ, kɔ kətɔsɔk domp kəŋan kəntorɛnɛ ŋa dəkubump. 22Ŋabaŋɛnɛ kəcərɛ kəkɔtɛnɛ mes, mba ŋayɔnɛ atoŋkulu. 23Kɔ ŋasak kəkor-koru Kanu nkɛ kəntɔfi mɔ, ŋackor-koru mɛrəŋka mmɛ mowurɛnɛ kɔ afum aŋɛ ŋandefi mɔ, kɔ pəyɔnɛ fɛ ti-ɛ bɛmp, kɔ pəyɔnɛ fɛ ti-ɛ sɛm ya wɛcək maŋkəlɛ kɔ yeliŋɛ-liŋɛ.

24Ti tɔsɔŋɛ ntɛ Kanu kəsak ŋa kəyɔ mes mɛyamayama mmɛ bəkəc yaŋan yɛŋfaŋ mɔ, ti disrɛ ŋasərka ŋaleləsnɛ fɛ dis kəyɔ ka mes ma malap. 25Ŋa ŋasak kance ka Kanu, ŋacəmɛ yem darəŋ. Kɔ ŋayek-yekəs ŋacsalɛnɛ ca nyɛ Kanu kəlompəs, ŋacsak Kanu nkɛ kəlompəs yi fəp mɔ. Mba pəmar pakor-koru Kanu doru o doru! Amina!

26Itɔ Kanu kəsakɛ ŋa ŋacəmɛ mɛfaŋ maŋan darəŋ mmɛ mɛŋlapəs ŋa mɔ. Ti disrɛ aran aŋan ŋasak kəfəntərɛ kɔ arkun, kɔ ŋalɛk kəfəntərɛ taŋan t'aran. Mɔyɔ mamɔkɔ, doru dowosɛ fɛ mi. 27Itɔ arkun sɔ ŋaŋyɔ: Ŋasak kəfəntərɛ kɔ aran, mba pəbas pa arkun peyi ŋa, ŋacfəntərɛ taŋan t'arkun, dəmɔyɔ ma malap mamɔkɔ ŋandesɔtɔ kətɔrəs teta kəfulusnɛ kəŋan.

28Ntɛ ŋantɔwosɛ a kəcərɛ ka Kanu kəyɔ dəkəcəmɛ mɔ, kɔ Kanu kəsak ŋa ŋacəmɛ mɛcɛmcɛmnɛ maŋan mɔtɔlomp darəŋ, itɔ ŋaŋyɔnɛ mes mmɛ pəntɔmar ŋa kəyɔ mɔ. 29Ŋalarɛ mes mɔtɔlomp mmɛ o mmɛ: Ŋaŋyɔ afum pəlɛc, ŋancɛlək ŋafaŋ yɔkɔ yɔyɔnɛ ya akɔ mɔ, ŋayeŋk bəkəc. Ŋalarɛ kəraca, kədif fum, kəgbɛkəlɛnɛ, kəyɔ akɔ cəmpənpən, kəyɔ mes yamayama. Ŋacfor akɔ, 30ŋacloku pəlɛc pa afum, aterɛnɛ a Kanu ŋɔ. Ŋaŋlɔmsɛnɛ, ŋacdot banca, ŋaclomɛnɛ, ŋancɛm-cɛmnɛ cəke cɔ ŋantam kəpər mes mɛlɛc-ɛ. Ŋafɔleləs akombəra aŋan. 31Ŋasɔk fɛ səbomp, ŋafɔlas sim saŋan, ayeŋki bəkəc kɔ atɔyɔnɛ nɔnɔfɔr ŋɔ. 32Ŋancərɛ belbel kiti ka Kanu nkɛ kəloku a nwɛ o nwɛ endeyɔ mes mamɔkɔ mɔ, pəmar pəfi. Ŋaŋyɔ mes mɛlɛc mamɔkɔ, ŋacyek-yekəs sɔ akɔ ŋaŋyɔ mi mɔ.