ARom 3

Ali fum olomp fɛ

1Dəkəcəmɛ dɔpɔŋ dere dɔ wəSuyif ɔyɔ pətas atɔyɔnɛ aSuyif-ɛ? Ake dəkəcəmɛ dɔ kəkənc kəyɔ-ɛ? 2Mes mamɔkɔ mɔsɔŋ aSuyif dəkəcəmɛ dɔpɔŋ dəmɔyɔ mɛlarəm disrɛ! Tɔcɔkɔ-cɔkɔ, aSuyif ŋ'anasɔŋ moloku ma Kanu. 3Mba kɔ aSuyif alɔma ŋantɔsektərnɛ kəlaŋ Kanu-ɛ, tendeyamsɛ Kanu sɔ kəsektərnɛ danapa daŋan ba? 4Tɔbɔlɛ! Pacərɛ a Kanu kəŋloku kance, afum fəp ayemɛ ŋɔ ŋayɔnɛ.1 It'ancic dəYecicəs Yosoku disrɛ:

«Məna Kanu, pəmar pacər'am wəlompu dəmoloku mam.

Məcsɔtɔ kance dəŋkiti tɛm fəp.»2

5Mba kɔ tɔyɔnɛ mes mɔtɔlomp mmɛ aŋyɔ mɔ mementər su a Kanu kəlomp, cəke c'antam kəloku-ɛ? Kanu kəfɔyɔnɛ wətɔlomp, a kəcsutɛ su mɛtɛlɛ mɛwɛy-wɛy ma kiti kɔn teta kiciya kosu ba? (Awa, cəfum c'iyi kəlok-loku.) 6Tɔbɔlɛ! Kɔ Kanu kəyɔnɛ wətɔlomp-ɛ, cəke cɔ kəntam kəboc kiti k'afum a doru-ɛ? 7Mba kɔ tɔyɔnɛ dəyem ya ina disrɛ, kance ka Kanu kəwur gbasŋa kəmentər nɔrɔ da debeki dɔn-ɛ, ta ake tɔ Kanu kəndekitin'em pəmɔ wəciya-ɛ? 8Ta ake t'antɔlokɛ: «Payɔ pəlɛc ntɛ tɔŋsɔŋɛ pətɔt powur ti mɔ?» Alɔma ŋaŋfor su ŋambaŋɛnɛ a it'antəksɛ yati. Mba afum akakɔ pəmar Kanu kəkiti ŋa.

9Mba teta ake? Səna aSuyif səyi alpəs akɔ kəroŋ ba? Ala! Imentər tes tin: Kiciya kəntam afum fəp, aSuyif kɔ atɔyɔnɛ aSuyif sɔ. 10DəYecicəs Yosoku ancic:

«Ali fum olomp fɛ, ali wəkin!

11Ali fum eyi fɛ nwɛ ɔsɔk domp,

nwɛ eŋsiməs kətɛn Kanu mɔ.

12Afum fəp ŋasɔlɛ, ŋaŋkafəlɛ kɔrkɔr,

ali fum eyi fɛ nwɛ ɔŋyɔ pətɔt mɔ,

ali wəkin!»3

13«Moloku mmɛ moŋwur ŋa dəcusu mɔ mɛŋsɛn pəmɔ ambɔnc nŋɛ ŋoŋwur dəkufu nkɛ kəbuncɛ mɔ,

memer maŋan mɔ ŋantiŋkərɛ akɔ,»4

«Moloku maŋan mɔyɔ wɛywɛy pəmɔ mɔkɔn ma aŋkisin.»5

14«Cusu cəŋan cəlarɛ kətolanɛ pəlɛc, kɔ moloku modokət.»6

15«Afum fəp ŋafəfərɛnɛ wɛcək kəkɔloŋ mecir.

16Kələsər kɔ pəlɛc kɔ ŋaŋsak mofo mmɛ ŋancepər mɔ fəp,

17ali ŋancərɛ fɛ dɔpɔ da pəforu.»7

18«Kənesɛ ka Kanu kəyi fɛ ŋa.»8

19Səncərɛ a mes mmɛ Sariyɛ sa Kanu səŋloku mɔ fəp, aŋɛ ŋayi si dəntɔf mɔ, ŋɔ səŋloku mi, ntɛ tɔŋsɔŋɛ cusu cəcaŋk, afum a doru fəp ŋacərɛ a ŋasarɛ kiciya Kanu fɔr kiriŋ mɔ. 20Kəyɔ ka mes mmɛ Sariyɛ səloku mɔ kəfɔsɔŋɛ Kanu kəlɔm ali fum wəkin wəlompu. Sariyɛ səŋmar afum kəcərɛ gbəcərəm a ŋanciya.

Cəke cɔ Kanu kəndeyac afum kiciya kəŋan-ɛ

21Mba ndɛkəl oŋ Kanu kəmentər su ntɛ kəlɔm su alompu fɔr yɔn kiriŋ ta Sariyɛ sənɔŋkəl ti mɔ. Dəsede sa Sariyɛ sa Musa yati kɔ sa Sayibɛ səmentər ntɛ: 22Kanu kəŋlɔm afum alompu dəkəlaŋ kəŋan nkɛ ŋaŋgbɛkər Yesu Krist mɔ. Kəŋyɔnɛ ti afum fəp aŋɛ ŋaŋgbɛkər kəlaŋ kəŋan Krist mɔ, bawo afum fəp ŋanciyanɛ fɛ: 23Afum fəp ŋanciya kɔ tɔsɔŋɛ ŋa kəbut kəsɔtɔ nɔrɔ da debeki da Kanu. 24Mba dobotu dɔn amera, Kanu kəŋlɔm afum kifəli alompu. Kɔ kəyɔnɛ ŋa ti dəYesu Krist nwɛ owurus ŋa kiciya mɔ. 25-26Kanu kənawurɛ Yesu Krist doru a pədeyɔnɛ poloŋnɛ teta kəsɔkəs ka kiciya k'afum, ntɛ tɔŋsɔŋɛ Krist, kəfi kɔn, pəsɔtɔ kəŋaŋnɛnɛ kiciya ka aŋɛ ŋaŋgbɛkər kɔ kəlaŋ mɔ. Ti disrɛ, Kanu kəfaŋ kəmentər a kəlomp tɛm fəp: Kənalomp tɔcɔkɔcɔkɔ, ntɛ kənaŋaŋnɛ ta kəntɔrsɛ afum teta kiciya kəŋan mɔ. Kanu kəlomp sɔ mɔkɔ, kɔ kəfaŋ kəlɔm akɔ ŋaŋgbɛkər Yesu kəlaŋ mɔ alompu.

27Awa, pəmar sɔ padot banca ba? Tɔbɔlɛ! Teta ake? Bawo kəgbɛkər kəlaŋ yati kəyɔ dəkəcəmɛ, bafɔ kəleləs ka Sariyɛ. 28Ntɛ tɔ səncɛm-cɛmnɛ: Kanu kəŋlɔm afum alompu bawo ŋaŋgbɛkər Yesu Krist kəlaŋ, bafɔ a ŋaŋyɔ tɔkɔ Sariyɛ səloku mɔ. 29Kanu, ka aSuyif gbəcərəm kɔ ba? Ala! Kəyɔnɛ fɛ sɔ ka atɔyɔnɛ aSuyif ba? Ɛy, atɔyɔnɛ aSuyif kɔ aSuyif fəp faŋan, ŋampaŋnɛ ki. 30Kance: Kanu kin gboŋ kɔ. Nkɔn ɔŋkɔlɔm aSuyif kɔ atɔyɔnɛ aSuyif alompu teta kəgbɛkər kəŋan kəlaŋ. 31Kəgbɛkər kəlaŋ kosu kaŋkɔ kəŋsɔŋɛ ta Sariyɛ səyɔ dəkəcəmɛ ba? Tɔbɔlɛ! Kɔ səŋgbɛkər Yesu Krist kəlaŋ-ɛ, səleləs Sariyɛ pəmɔ tɔkɔ pəmar payɔ ti yati mɔ.