ARom 4

Kanu kəlɔm Abraham wəlompu teta kəlaŋ kɔn

1Awa, cəke cɔ səndeloku teta Abraham, wətem kosu-ɛ? Dofum dɔn disrɛ, ake nkɔn Abraham ɛnasɔtɔ-ɛ? 2Panalɔm Abraham wəlompu teta tɔkɔ ɛnayɔ mɔ-ɛ, k'ɛnatam kədotɛ ti banca fɔr ya afum kiriŋ. Mba Kanu fɔr kiriŋ, ɔfɔtam kədotɛ ti banca de. 3Ntɛ tɔ Yecicəs Yosoku yoloku: «Abraham ɛnagbɛkər kəlaŋ kɔn Kanu, kɔ kəlɔm kɔ wəlompu teta kəgbɛkər kɔn kəlaŋ.»1 4Kɔ fum ɔyɔ tes tɔlɔma teta kəsɔtɔ ka kəway-ɛ, daka ndɛ aŋsɔŋ kɔ mɔ, bafɔ kəpocɛ kɔ de, mba kəway kɔn kɔ. 5Mba kɔ fum ɔntɔgbɛkər amera yɛbəc ya nkɔnsərka, mba pəgbɛkər kəlaŋ kɔn Kanu nkɛ kəŋlɔm ater ki alompu mɔ-ɛ, Kanu kəŋlɔm kɔ wəlompu teta kəgbɛkər kɔn kəlaŋ. 6Kɔ Dawuda oloku pəbotu peyi fum nwɛ Kanu kəlɔm wəlompu ta mɔyɔ mɔn mɔnɔŋkəl ti mɔ:

7«Pəbɔt aŋɛ Kanu kəŋaŋnɛnɛ mes mɛyamayama maŋan, kɔ kənim kiciya kəŋan mɔ.

8Pəbɔt fum nwɛ Mariki ɔntɔlɔm kiciya kɔn mɔ.»2

9ASuyif gbəcərəm ŋayɔ pəbotu papɔkɔ, ka atɔyɔnɛ aSuyif ŋa sɔ ŋayɔ pi ba? Awa, səntɛp kəcloku: Abraham ɛnagbɛkər kəlaŋ kɔn Kanu, kɔ Kanu kəlɔm kɔ wəlompu teta kəgbɛkər kɔn kəlaŋ. 10Tɛm tere tɔ Kanu kənalɔm Abraham wəlompu-ɛ? Anakənc kɔ tɛm tatɔkɔ ba, ka anakənc fɛ kɔ? Anakənc fɛ kɔ, wətɔkənc ɛnayi tɛm tatɔkɔ. 11Kanu kənalɔm Abraham wəlompu teta kəgbɛkər kɔn kəlaŋ ta antakənc kɔ tɛm tatɔkɔ-ɛ, ntɛ tencepər mɔ kɔ Abraham ɔsɔtɔ tɛgbɛkərɛ ta kəkənc. Tɛgbɛkərɛ tatɔkɔ tementər a Kanu kəlɔm Abraham wəlompu teta kəgbɛkər kɔn kəlaŋ. Tɔyɔ tatɔkɔ tɔsɔŋɛ Abraham kəyɔnɛ kas ka aŋɛ ŋaŋgbɛkər Kanu kəlaŋ kəŋan mɔ, ali tɔyɔnɛ a aŋkənc fɛ akayi. Akakɔ ŋɔ Kanu kəlɔm alompu. 12Kɔ Abraham ɔyɔnɛ sɔ kas ka aŋɛ aŋkənc, bafɔ afum aŋɛ aŋkənc dis gbəcərəm mɔ, mba aŋɛ ŋancəmɛ dɔpɔ da wətem kosu Abraham darəŋ mɔ, nkɔn nwɛ ɛnagbɛkər Kanu kəlaŋ ta antakənc kɔ mɔ.

Aŋsɔtɔ layidi da Kanu teta kəlaŋ nkɛ aŋgbɛkər kɔ mɔ

13Kanu kənasɔŋ Abraham kɔ yuruya yɔn layidi a ŋandesɔtɔ doru dɔyɔnɛ ŋa kɛ. Kanu kənasɔŋ fɛ Abraham layidi dadɔkɔ teta kəleləs kɔn Sariyɛ de. Mba Kanu kənasɔŋ di Abraham ntɛ kənalɔm kɔ wəlompu teta kəgbɛkər kɔn kəlaŋ mɔ. 14Pəcyɔnɛ a daka da kɛ ndɛ Kanu kənaloku kəsɔŋ mɔ, akɔ ŋaleləs Sariyɛ mɔ gbəcərəm ŋɔ pəmar ŋasɔtɔ di-ɛ, fənɔntər fəŋsɔlər kəlaŋ, layidi da Kanu dɔfɔyɔ dəkəcəmɛ tɛm tatɔkɔ. 15Sariyɛ səŋyekti mɛtɛlɛ mɛwɛy-wɛy ma kiti ka Kanu, mba kɔ Sariyɛ səntɔyi-ɛ, kətɔleləs ka si kəfɔyi.

16Ti tɔsɔŋɛ kəlaŋ disrɛ aŋsɔtɔ daka da kɛ ndɛ Kanu kəsɔŋ su dəlayidi mɔ. Kance, kəpocɛ kifəli kɔ. Awa layidi dadɔkɔ, yuruya ya Abraham fəp yɔyɔ di. Pəmar aŋɛ ŋancəmɛ Sariyɛ darəŋ mɔ ŋasɔtɔ layidi dadɔkɔ, mba akɔ ŋanagbɛkər kəlaŋ pəmɔ tɔkɔ Abraham papa ka fəp fosu ɛnayɔ ti mɔ, ŋa sɔ ŋasɔtɔ di. 17Ntɛ tɔ ancic dəYecicəs Yosoku: «Isɔŋ'am kəyɔnɛ kas ka kənay ka afum a tɔf yɛlarəm.»3 Abraham ɛnayɔnɛ kas ka kənay ka afum Kanu fɔr kiriŋ ntɛ ɛnagbɛkər kəlaŋ kɔn mɔ, Kanu nkɛ kəŋsɔŋɛ afi kəyi wəyeŋ, kəsɔŋɛ pətɔyi kəyi mɔ. 18Tɛm tatɔkɔ kəgbɛkər amera kənayi fɛ, mba Abraham ɛnagbɛkər amera, kəgbɛkər kɔn kəlaŋ kənasɔŋɛ kɔ kəyɔnɛ ka kas ka kənay ka afum a tɔf yɛlarəm, pəmɔ tɔkɔ Kanu kənaloku kɔ ti mɔ: «Yuruya yam yendela.»4 19Abraham ɛnalɔtəs kəsɔtɔ meren tasar tin (100), ta defi dɔmbɔlɛ kɔ sɔ-ɛ, kɔ Sara nkɔn sɔ ɛnatam fɛ kəsɔtɔ wan, mba ɛnasak fɛ kəgbɛkər Kanu kəlaŋ. 20Mba layidi da Kanu fɔr kiriŋ, Abraham ɛnanesərnɛ fɛ kəgbɛkər kəlaŋ kɔn Kanu, kɔ kəlaŋ kaŋkɔ kəlas kɔ sɔkət, k'oŋkor-koru Kanu. 21Abraham ɛnalaŋ yati a layidi ndɛ Kanu kənalɛkɛ kɔ mɔ, kəntam kəlas ka di. 22Ti tɔsɔŋɛ ntɛ Kanu kənalɔm Abraham wəlompu mɔ. 23Yecicəs Yosoku yoloku: «Kanu kəlɔm kɔ wəlompu.» Moloku mamɔkɔ, bafɔ ma Abraham gbəcərəm mɔ, 24mba teta fəp fosu tɔ. Kanu kəlɔm su alompu, səna aŋɛ səŋgbɛkər kɔ kəlaŋ mɔ, nwɛ ɛnayekti Yesu Mariki mosu afi dacɔ. 25Anasɔŋ Yesu padif teta kiciya kosu, mba kɔ Kanu kəyekti kɔ afi dacɔ ntɛ tɔŋsɔŋɛ kəlɔm su alompu mɔ.