ARom 5

Pəforu mpɛ peyi afum kɔ Kanu dacɔ mɔ

1Ntɛ Kanu kəlɔm su alompu teta kəgbɛkər kəlaŋ kosu, ndɛkəl oŋ səyi pəforu disrɛ kɔ Kanu teta tɔkɔ Mariki mosu Yesu Krist ɔyɔnɛ su mɔ. 2Kəlaŋ disrɛ səntam kəsɔtər Kanu kəmar kifəli nkɛ səyi disrɛ belbel mɔ. Ayaŋkəra ŋeyi su bawo səŋgbɛkər amera kəyinɛ nɔrɔ da debeki da Kanu disrɛ. 3Ntɛ tendeŋərnɛ ti mɔ, ayaŋkəra ŋeyi su ali ntɛ səyi pəcuca disrɛ mɔ. Bawo səncərɛ a pəcuca pɔŋsɔŋɛ fum kəbər, 4kəbər kəŋsɔŋɛ fum kəsektərnɛ amera ŋɔn. Nwɛ o nwɛ eŋsektərnɛ amera ŋɔn mɔ tɔŋsɔŋɛ kɔ kəgbɛkər amera. 5Kəgbɛkər amera kaŋkɔ kəfɔlapəs, bawo Amera Ŋecempi nŋɛ Kanu kənasɔŋ su mɔ, ŋɛnalas su kəbɔtər kɔn dəbəkəc.

6Awa, tɛm ntɛ Kanu kənafaŋ kəyac su ntɛ sənayi ta səyɔ sɔkət səyacnɛnɛ mɔ, itɔ Krist ɛnafinɛ teta aciya. 7Alasnɛ fɛ kəfinɛ teta fum wəlompu. Tɔlɔma fum wəlɔma ɛntam kəsɔtɔ abəkəc kəfinɛ teta pətɔt. 8Mba Kanu nkɔn ɛnamentər su a ɔmbɔtər su pəmɔ ntɛ: Tɛnatəŋnɛ səsɔrɔyɔnɛ aciya, kɔ Krist efinɛ tetosu. 9Awa, ndɛkəl oŋ Kanu kəlɔm su alompu teta kəloŋ mecir ma Krist, kɔ tencepər-ɛ, pəfɔdecuca kɔ kədeyacɛ su mɛtɛlɛ mɛwɛy-wɛy ma Kanu dɔsɔk dɔn da kiti. 10Ntɛ tɔyɔnɛ oŋ aterɛnɛ a Kanu ŋ'ayɔnɛ mɔ, Kanu kəlompəs su dacɔ kɔ nkɔn nnɔ defi da wan kɔn deyi mɔ. Kɔ tencepər-ɛ, ndɛkəl oŋ ntɛ Kanu kəlompəs su dacɔ kɔ nkɔn mɔ, kiyi wəyeŋ ka wan kɔn k'endeyacɛ su. 11Mba telip fɛ tatɔkɔ, ayaŋkəra ŋeyi su nnɔ Kanu kəyi mɔ teta Mariki mosu Yesu Krist: Nkɔn səsɔtər kəlompəs dacɔ kɔ Kanu.

Adama kɔ Krist

12Teta wərkun wəkin Adama tɔ kiciya kəmbɛrɛnɛ doru, kɔ teta kiciya tɔ defi dɛmbɛrɛnɛ sɔ doru. Defi dɛmbəp afum fəp, bawo fəp fənciya. 13Ta Kanu kəntasɔŋ Musa sariyɛ-ɛ, kiciya kənayi doru. Mba Kanu kəfɔlɔm kiciya kɔ sariyɛ səntɔyi-ɛ. 14Awa defi dɛnayɔ kətam kəyɛfɛ tɛm ta Adama haŋ kəbəp tɛm ta Musa, ali nnɔ aŋɛ ŋanatɔciya kəgbɛkəl disrɛ pəmɔ Adama mɔ. Adama ɛnawurɛnɛ kɔ fum nwɛ ɛnadeder mɔ.

15Kəpocɛ ka kəmar kifəli ka Kanu kənciyanɛ kɔ kiciya ka Adama. Ɛy, teta kiciya ka wərkun wəkin, Adama, kənader kəsɔŋɛ afum alarəm kəfi. Mba kəmar kifəli ka Kanu kəyɔ dəkəcəmɛ kəcepərər, kəpocɛ ka kəmar kaŋkɔ, Kanu kəsɔŋ ki teta fum wəkin nwɛ ɔyɔnɛ Yesu Krist mɔ, ti disrɛ kəmar kifəli kaŋkɔ kəsamsər pətɔt papɔkɔ afum alarəm. 16Mes mmɛ kəpocɛ ka kəmar kifəli ka Kanu kəsɔŋ su mɔ mɛnciyanɛ kɔ mmɛ kiciya ka wəkin kəsɔŋ mɔ. Ntɛ kiciya ka wərkun wəkin Adama kəncepər mɔ, kɔ kiti ka Kanu kəsɔŋ kətɔrəs ka afum. Teciyanɛ ta ti, kəpocɛ ka kəmar kifəli ka Kanu kəyɔnɛ, Kanu kəlɔm afum alompu ali ntɛ kiciya kəŋan kəla mɔ. 17Bawo, kɔ pəyɔnɛ kiciya nkɛ fum sona gboŋ ɔyɔ mɔ, kəsɔŋɛ kɔ defi dɔntɔmpər kətam tetɔn-ɛ, pənaŋkanɛ aŋɛ ŋaŋsɔtɔ kəpocɛ ka kəmar kifəli mɔ, teta Yesu Krist sona gboŋ ŋandetɔmpər kətam kiyi wəyeŋ. Kəpocɛ ka Kanu kaŋkɔ kəndeyɔnɛ kəlɔm afum kəlomp.

18Tɛlpəs oŋ, kiciya ka fum wəkin Adama kəsɔŋɛ kətɔrəs ka afum fəp. Tɔyɔ tolompu ta fum wəkin Yesu tɔsɔŋɛ afum kəsɔtɔ kəyi yɛŋən kɔ tɔsɔŋ ŋa kiyi wəyeŋ. 19Awa, kətɔleləs ka fum wəkin Adama kəsɔŋɛ Kanu kəlɔm afum alarəm aciya, mba teta kəleləs ka fum wəkin Yesu kəsɔŋɛ Kanu kəlɔm sɔ afum alarəm alompu. 20Sariyɛ sənder doru kɔ kiciya kənaŋkanɛ oŋ kəla. Mba tɛm ntɛ kiciya kəŋnaŋkanɛ kəla mɔ, kəmar kifəli ka Kanu kəncepərər kəla. 21Awa cɔkɔ-cɔkɔ, ntɛ kiciya kənatɔmpər kətam nnɔ defi deyi mɔ, itɔ kəmar kifəli ka Kanu kəntɔmpər sɔ kətam nkɛ kəŋsɔŋɛ Kanu kəlɔm afum alompu mɔ, kəkekərɛ su kiyi wəyeŋ ka doru o doru. Mamɔkɔ fəp teta Yesu Krist Mariki mosu tɔ meŋyinɛ.