ARom 6

Kiciya kəŋsɔŋ kəfi, mba Krist ɔŋsɔŋ kiyi wəyeŋ

1Awa, cəke cɔ tantɛ toloku-ɛ? Pacəmɛ kiciya darəŋ ntɛ tɔŋsɔŋɛ kəmar kifəli ka Kanu kəcla mɔ ba? 2Tɔbɔlɛ! Tɔsɔk pɛs səncepər defi ndɛ dɛŋgbɛy su kɔ kiciya mɔ. Awa, cəke c'antam kəyi sɔ kiciya disrɛ-ɛ? 3Nəncərɛ ti belbel, kəgbət kosu dəromun teta Kanu kəloŋka su kɔ Yesu Krist, kɔ kəloŋka su sɔ fəp kɔ defi dɔn. 4Kəgbət kosu dəromun kaŋkɔ kəmentər a awupɛnɛ su kɔ nkɔn. Mba fənɔntər fəpɔŋ fa Kas fəyekti nkɔn Krist afi dacɔ, ntɛ tɔŋsɔŋɛ səna sɔ səyinɛ kiyi wəyeŋ kəfu mɔ.

5K'analoŋka su kɔ nkɔn dədefi ndɛ dowurɛnɛ kɔ dɔn mɔ-ɛ, andesɔloŋka su kəyɛfɛ kosu afi dacɔ kəwurɛnɛ kɔ kɔn. 6Pacərɛ ntɛ belbel: Ntɛ anayi tɔcɔkɔ-cɔkɔ mɔ, anacaŋ ti dətɔk yɛpəmpəl kɔ Krist. Awa, kiciya nkɛ kənayi su mɔ, aləsər ki, səyɔnɛ fɛ sɔ acar a kiciya. 7Bawo nwɛ eŋfi mɔ, eŋyi yɛŋən, kiciya kəfɔsɔtasərnɛ kɔ. 8Mba səŋgbɛkər kəlaŋ a kɔ səfi kɔ Krist-ɛ, a səndeyi sɔ wəyeŋ kɔ nkɔn. 9Səncərɛ belbel: Kəyɛfɛ ntɛ Krist ɛyɛfɛ defi mɔ, ɔfɔfi sɔ, defi dɔfɔsɔtasərnɛ kɔ. 10Krist efi, kɔ defi dɔn dɛŋgbɛy kɔ katina few kɔ kiciya. Ndɛkəl oŋ eyi wəyeŋ, kiyi wəyeŋ kɔn məlməl kəyɔnɛ ka Kanu. 11Tin tayi tɔ, nəna sɔ pəmar nəccɛm-cɛmnɛ ntɛ: K'aloŋka nu kɔ Yesu Krist-ɛ, pəŋyi pəmɔ ntɛ nəŋfi, nəgbɛyɛnɛ fɛw kɔ kiciya mɔ, mba nəŋyi oŋ wəyeŋ teta Kanu.

12Ta kiciya kətɔmpər sɔ kətam nnɔ dis donu ndɛ dendefi dɔsɔk dɔlɔma mɔ, pəmar fɛ nu sɔ kəcəmɛ mɛfaŋ mɛlɛc ma dis donu darəŋ. 13Ta nəcəmbər dis donu tɔlɔm o tɔlɔm kəyɔ ka pəlɛc. Mba nəsɔŋ dis donu məlməl Kanu, nəyɔ pəmɔ ntɛ nənafi mɔ, mba ndɛkəl oŋ nəyi sɔ wəyeŋ, awa, nəcəmɛ oŋ Kanu darəŋ. Nəcəmbər dis donu mɔyɔ fəp kəyɔ ka pəlompu. 14Kiciya kəfɔdesɔtasərnɛ nu, bawo nəyi fɛ sɔ sariyɛ dəntɔf, mba kəmar kifəli ka Kanu kɔ nəyi oŋ dəntɔf.

Pabəcɛ dolompu

15Bafɔ sariyɛ s'ayi dəntɔf, mba kəmar kifəli ka Kanu kəyi su kəroŋ. Ti disrɛ, k'ayi kəmar dəntɔf-ɛ, ti tɔŋsɔŋɛ oŋ pacyɔ pəlɛc ba? Tɔbɔlɛ! 16Nəncərɛ ti belbel! Kɔ nəncəmɛ yɛbəc ya fum wəlɔma pəmɔ wəcar-ɛ, nəyɔnɛ acar a mariki mmɛ nəleləs mɔ. Kɔ nəyɔnɛ acar a kiciya-ɛ, ki kəŋkekərɛ nu dədefi. Mba kɔ nəyɔnɛ acar a kəleləs ka Kanu-ɛ, ki kəŋkekərɛ nu kiyi wəyeŋ kəlompu. 17Payif Kanu barka! Bawo tɔcɔkɔcɔkɔ, acar a kiciya ŋɔ nənayɔnɛ, mba ndɛkəl oŋ, bəkəc yonu fəp yɔ nəleləsɛ kətəksɛ pəmɔ kaŋkɔ anasɔŋ afum fəp, nkɛ nəna sɔ nənasɔtɔ mɔ. 18Kɔ Kanu kəyac nu kiciya, kɔ nəyɔnɛ oŋ acar a dolompu. 19Dacar d'indetubcɛnɛ toloku tantɛ ntɛ tɔŋsɔŋɛ nəncərɛ ti belbel mɔ, bawo mɛcɛmcɛmnɛ ma fum mɔmbɔl fɛ. Tɔcɔkɔcɔkɔ, nənacəmbər dis donu məlməl pəmɔ acar pəyamayama disrɛ kɔ kətɔleləs Sariyɛ sa Kanu. Mba ndɛkəl oŋ, nəcəmbər dis donu məlməl pəmɔ acar aŋɛ ŋambəcɛ dolompu ŋacəmɛ kəyi wəyeŋ kəpus darəŋ.

20Ntɛ nənayɔnɛ acar a kiciya mɔ, dolompu dɛnacəmɛ fɛ nu dɔpɔ. 21Tɛm tatɔkɔ, ake nənasɔtər mes mɛlɛc mamakɔ-ɛ? Mɔkɔ nəlapərnɛ, bawo dəkələpsər da mes mamɔkɔ defi dɔ. 22Mba ndɛkəl oŋ ntɛ Kanu kəyac nu kiciya, kɔ kəsɔŋɛ nu kəyɔnɛ acar aŋɛ ŋambəcɛ Kanu mɔ, tɔsɔŋɛ nu kəyɔnɛ oŋ afum apus ɔn. Dəkələpsər da ti dendeyɔnɛ nu kəyi wəyeŋ ka doru o doru. 23Kəway nkɛ aŋsɔtər kiciya mɔ, defi dɔ. Mba ntɛ aloŋka su kɔ Yesu Krist Mariki mosu mɔ, səndesɔtər Kanu kifəli kiyi wəyeŋ ka doru o doru.