ARom 7

Kəloŋka kɔ Krist kəŋgbɛy alaŋ kɔ Sariyɛ

1Awɛnc im aŋa alaŋ, afum ŋ'iŋlok-lokər aŋɛ ŋancərɛ Sariyɛ mɔ. Sariyɛ səntasərnɛ su gbəcərəm k'ayi doru-ɛ. Nəncərɛ ti belbel. 2Isɔksər nu totubcɛnɛ tantɛ: Sariyɛ sa kənɛncɛnɛ səŋsɔŋɛ wəran wəlɔ kəsektərɛnɛ kɔ wos k'ɔsɔrɔyi doru-ɛ. Mba kɔ wos efi-ɛ, sariyɛ səncəmɛ fɛ sɔ wəran wəkakɔ darəŋ. 3Kɔ tɔyɔnɛ wəran wəkakɔ pəyɔnɛ sɔ wəran ka wərkun wəlɔma wos wəcɔkɔ-cɔkɔ pəsɔrɔyi doru-ɛ, wəran wəkakɔ endesɔtɔ tewe ta dalakɔ. Mba kɔ wos wəcɔkɔ-cɔkɔ efi-ɛ, sariyɛ səncəmɛ fɛ sɔ wəran wəkakɔ darəŋ. Wərkun wəcuru ɛntam kənɛncɛ kɔ ta tɔyɔnɛ dalakɔ-ɛ.

4Awɛnc im aŋa alaŋ, tin tayi tɔ ntɛ aloŋka nu Krist nwɛ efinɛ tetosu dətɔk yɛpəmpəl mɔ, Sariyɛ səncəmɛ fɛ nu sɔ darəŋ few. Fum wəlɔma ɔyɔ nu oŋ, nwɛ ɛnafɔtɛ afi dacɔ mɔ, ntɛ tɔŋsɔŋɛ pabəcɛ Kanu ntɛ tentesɛ kɔ fɔr kiriŋ mɔ. 5Awa, tɔcɔkɔcɔkɔ, ntɛ ancyɔ mes yamayama mɔ, kɔ sariyɛ sənder səyi su fɔr kiriŋ kɔ tɔsɔŋɛ dis dosu məlməl kəcyɔ ka mɛfaŋ mosu mɛlɛc, kɔ tɛləpsər ta mi toŋkomɛ su defi. 6Mba ndɛkəl oŋ aŋgbɛy su fɛw kɔ Sariyɛ, bawo pəyi pəmɔ ntɛ anafi mɔ, sariyɛ səfɔsɔtasərnɛ su. Ti disrɛ, antam kəbəcɛ Kanu tɔyɔ tofu ta Amera, bafɔ tɛcəmɛ Sariyɛ darəŋ tokur.

Sariyɛ kɔ kiciya

7Cəke cɔ tantɛ toloku-ɛ? Sariyɛ səyɔnɛ kiciya ba? Tɔbɔlɛ! Mba Sariyɛ səsɔŋ'em kəcərɛ daka ndɛ kiciya kəyɔnɛ mɔ. Inatam fɛ kəcərɛ tes ntɛ kəyɔ fɔr gban-gban kəyɔnɛ mɔ, mɛnɛ ntɛ Sariyɛ sənaloku: «Ta məyɔ fɔr gban-gban.»1 8Difɔ kiciya kəsɛp haŋ kɔ kəsɔtɔ kəbəcɛ tosom ntɛ tɔŋsɔŋɛ kəsɔtər'im kɔyɔ fɔr gban-gban fəp mɔ. Kɔ Sariyɛ səntɔyi-ɛ, kiciya, paka pɔ mpɛ pefi mɔ. 9Tɔcɔkɔcɔkɔ ntɛ Sariyɛ sənatɔyi mɔ, inayi wəyeŋ. Mba ntɛ tosom tender mɔ, kiciya kəyi oŋ wəyeŋ, 10kɔ ina, ifi. Ti tɔsɔŋɛ tosom ntɛ tɛnamar tekekər'em kiyi wəyeŋ mɔ, teŋkekər'em dədefi. 11Bawo kiciya kəsɛp kɔ kəsɔtɔ kəbəcɛ tosom ntɛ tɔŋsɔŋɛ tetiŋkər im mɔ, kɔ tɔsɔŋ'em kəfi. 12Mba Sariyɛ səncemp, kɔ tosom ta Kanu sɔ tencemp, tolomp, kɔ tentesɛ.

13Mba tes ntɛ tentesɛ mɔ tɔŋsɔŋɛ kəfi ba? Ala! Mba kiciya kəmbəcɛ tes ntɛ tentesɛ mɔ kɔ tɔsɔŋ'em kəfi. Ntɛ tɔ towurɛnɛ: Tosom tɔsɔŋɛ kəcərɛ ntɛ kiciya kənaŋkanɛ kəlɛcɛ mɔ kɔ tementər dɛlɛc da ki.

Kiciya kəntasərnɛ afum

14Ɛy, səncərɛ ti a dəKanu Sariyɛ səyɛfɛ, mba ina wəfan iyɔnɛ, ancamsər im kiciya pəmɔ ntɛ ancamsər fum wəcar mɔ. 15Kance, ntɛ iŋyɔ mɔ, incərɛ fɛ ti: Ntɛ iŋfaŋ mɔ, ifɔyɔ ti. Kɔ ntɛ inter mɔ, it'iŋyɔ. 16Kɔ tɔyɔnɛ icyɔ tɔkɔ intɔfaŋ mɔ-ɛ, iŋwosɛ a Sariyɛ səntesɛ. 17Ti disrɛ bafɔ in'ɛmbəc, mba kiciya nkɛ kəy'im dəris mɔ ki kəmbəc. 18Incərɛ ti belbel a pətɔt peyi fɛ ina, itɔ tatɔkɔ dofum dem disrɛ dɔ teyi. Iŋfaŋ kəyɔ pətɔt, mba ifɔtam kəyɔ ka pi. 19Pətɔt mpɛ ifaŋ mɔ, ifɔyɔ pi, mba pəlɛc mpɛ intɔfaŋ mɔ, ip'iŋyɔ. 20Kɔ tɔyɔnɛ icyɔ tɔkɔ intɔfaŋ mɔ-ɛ, bafɔ in'eyi kəbəc de, mba kiciya nkɛ kəy'im dəris mɔ kəyi kəbəc.

21Ti disrɛ sariyɛ nsɛ s'inəŋknɛ dis dem: Ina nwɛ ifaŋ kəyɔ pətɔt mɔ, pəlɛc pender im. 22Tedisrɛ tem, Sariyɛ sa Kanu səmbɔt im. 23Mba imbəp nde dis dem disrɛ sariyɛ səlɔma nsɛ səyi kəsiməs kɔ sariyɛ nsɛ dosoku domp dem dɛlɛk mɔ. Sariyɛ nsɛ səsɔŋ'em kəyɔnɛ wəcar ka sariyɛ sa kiciya nsɛ səyi'm dəris mɔ. 24Iyi oŋ dəpəlɛc! An'endebaŋər im dis dandɛ dendesɔŋ'em kəfi mɔ-ɛ? 25Mɛnɛ Yesu Krist Mariki mosu, nwɛ pəmar payif Kanu barka mɔ! Awa, dosoku domp dem disrɛ, wəcar ka Sariyɛ sa Kanu, kɔ mɛfaŋ ma dis dem mɔsɔŋ'em kəyɔnɛ wəcar ka sariyɛ sa kiciya.