गणांई

गणांई

इज़राईले सोभी टोलीए गणांई

भेत

लिखणैं आल़अ: मोसा

सन: 1446 का 1405 ईसा आजी

मिसर देशा का निखल़ी इज़राईली संघै च़ाल़्ही साला तैणीं केही-केही हुई-बिति, ऐहा कताबा दी आसा सीनाई धारा अर तिधा आजू कनान देशै पुजणैं तैणीं सारी गल्‍लो बखान। खासकर आसा एथ इज़राईलीए मिसर देशा का निखल़णैं बाद दुजी सालो अर खिरी तैहा साला हुई-बिति दी गल्‍लो बाढै बखान किअ द ज़ेभै इज़राईले आगली पोस्तीए लोग कनान देशै पुजणैं आल़ै तै, ठत्ती साला शुन्‍नैं रेगीस्तानै होर किज़ै-किज़ै हुअ, तेते बारै निं खास्सअ ऐहा कताबा दी आथी खोज़अ द।

ऐहा कताबा नाअं आसा “गणांई” किल्हैकि अह कताब हआ ऐहा गल्‍ले बारै खोज़ी शुरू कि बिधातो हुकम मनी गणै मोसा इज़राईली बारा गोत्र अर टोलीए सोभै लोग कि तिंयां पठी केतरै आसा।

ऐहा कताबा सका चिई बाखा बांडी, 1:1 का 10:10 दी बोलअ बिधाता मोसा लै कि सोभी लोगा गण, संघा बोलअ बिधाता कि इहअ कि इज़राईली लै खोज़ कि खिम्भे बसती केऊ साबै लोल़ी बाढै खल़ी हुई अर लेबी गोत्रे लोगा लै किज़ै खास काम आसा। अह भाग हआ मुक्‍का इज़राईलीए पैहली बारी ऊवार्णे थैरा मनाऊंणे बारै खोज़ी करै।

एतो दुजअ भाग 10:11 का 21:20 खोज़ा तिन्‍नां गल्‍ले बारै ज़ेभै इज़राईली मोआब देशा लै थिऐ हांढदै लागै दै, तिन्‍नैं थिऐ जरदण नदीए पुर्बा बाखा आपणैं डेरै पाऐ दै। अह हांढ ती तिन्‍नां लै शुन्‍नैं रेगीस्ताना बाती खास्सी कठण अर इज़राईली मणछ लागै मोसा अर बिधाते खलाफ हई बखर्दै बी। ज़ांऊं इज़राईली शूणअ कि कनान देशै किहै-किहै बलबान मणछ रहा, तिंयां लागै कनान देशै डेऊणैं का हुधदै अर बिधाता दैनी इज़राईली लै तेते सज़ा अर तिंयां रहै च़ाल़्ही साला तैणीं शुन्‍नैं रेगीस्तानै ठुल़्दै लागी। अह भाग हआ इज़राईलीए मोआब देशै नेल़ पिसगा नाओंए धारा नेल़ डेरै पाणै गल्‍ला खोज़ी खतम।

ऐहा कताबो चिऊथअ भाग आसा 21:21 का 36:13 तैणीं। एथ लागा हाम्हां का थोघ कि इज़राईली किहअ करै गिम्मी जरदण नदीए पुर्बा बाखा ज़ैगा, मोआब सिऊंआं पोर्ही गलील समुंदरे दखण दिशा तैणीं गिम्मअ तिन्‍नैं सारअ देश। तेखअ आणा मोआब देशो राज़अ बलाक एकी परदेसी बलाम गूरा इज़राईली लै फिटका दैंदअ। पर बिधाता बझ़ैल़अ बलाम गूरा का इज़राईली लै बर्गत दैणैं, अर बलाम गूरै किअ तिहअ ई ज़िहअ बिधाता तेऊ लै बोलअ।

तेखअ डेऊऐ इज़राईली जरदण नदी पार अर तिन्‍नैं गिम्मी कनान देशै ज़ैगा, पर कई इज़राईली बस्सै जरदण नदी पुर्बा बाखा तिधी। तेखअ हुई किई सोभी इज़राईलीए एकी बारी भिई गणांई अर आगली पोस्ती लै दैनी मोसा बाद ज़ैहसू लै इज़राईली सभाल़णें ज़िम्मैंबारी। ज़ैहसू बांडी ज़ैगा इज़राईले बारा गोत्रे साबै।

खिरी खोज़ै बिधाता इज़राईली लै होर बधान बी अर तेते बारै खोज़दी हआ अह कताब खतम।

ऐहा कताबा दी लागा हाम्हां का थोघ कि लोग किहै ठग अर विश्वास घाती हआ, तिन्‍नां लै बिधाता केतरी बडी-बडी गल्‍ला किई, तज़ी बी निं तिंयां इहअ विश्वास करदै कि बिधाता सका तिन्‍नें हर मज़त करी। ऐहा कताबा दी लागा हाम्हां का थोघ कि बिधाता किई तिन्‍नें हर ज़ैगा मज़त, तिन्‍नां लै दैनी इहै जुधा दी ज़ीत ज़ेता तिंयां ज़िती निं सकदै तै, शुन्‍नैं रेगीस्तानै दैनी लाखों लोगा लै रोटी अर पाणीं। बिधाता च़ाहा त इहअ कि इज़राईली ऐहा गल्‍ला समझ़े कि सह निं तिन्‍नां बरैबाद हणैं दैंदअ, सह च़ाहा इहअ कि तिन्‍नां खास्सी बर्गत भेटे, ज़िहअ हारण प्रोहत बिधाता का अरज़ बी करा:

हुंह करा बिधाता का एही अरज़ कि

सह दैए ताल्है बर्गत अर

तेऊ लोल़ी सदा तेरी फाज़त किई,

बिधाता लोल़ी ताल्है आपणीं झींण

अर किरपा रहैऊई।

ताह लोल़ी शांती भेटी अर

मेरी आसा बिधाता का एही अरज़ कि तेऊ निं लोल़ी

ताह बाखा कधि पिठ फरेऊई।

(6:24-26)

कताबे बांड

सोभी इज़राईली गोत्र अर टोलीए गणांई 1:1—4:49

बधान अर लेबी गोत्रो लै प्रोहतो संस्कार 5:1—8:26

ऊवार्णैओ थैर अर मेल़-ज़ोल़े खिम्भा फेर घोर्हुअ बादल़ 9:1-23

इज़राईली लागै आजू हांढदै 10:1-36

लोग लागै बखर्दै 11:1-35

मिर्याम अर हारणा लागी मोसा गूरे मिश 12:1-16

बारा मणछ छ़ाडै कनान देशे भेख लंदै 13:1-33

लोगै किअ विश्वास घात अर बिधाता दैनी तिन्‍नां लै सज़ा 14:1-45

बधान अर सज़ा 15:1-41

लोगै किअ भिई विश्वास घात 16:1—17:13

प्रोहत अर लेबी गोत्र 18:1-32

शुचै हणअ 19:1-22

मोआब देशा लै डेऊणअ 20:1—21:35

बलाम गूरे बोल 22:1—24:25

ठग लोग 25:1-18

इज़राईलीए दुजी बारी गणांई 26:1-65

ज़ालपुते शोहरी आपणैं बाबे ज़िम्मीं दी हेस्सअ 27:1-11

इज़राईलीए नऊंईं पोस्तीए ज़िम्मैंबारी सभाल़ी ज़ैहसू का 27:12-23

इज़राईलीए तिह-थैरो बधान अर बल़ीदान 28:1—30:16

इज़राईली ज़ितअ मिद्यानी लोगा का जुध संघा डेऊऐ जरदण नदी पार 31:1—36:13