Kulvi Outer Seraji Bible
गणांई 10
च़ंदीए नर्शिंगै
तेखअ बोलअ बिधाता मोसा लै, “च़ंदीए बणाऐं तूह टिप्पी करै दूई नर्शिंगै, तिन्नां बाज़ै तेभै-तेभै ज़ेभै मेल़-ज़ोल़े खिम्भा आजू लोग झाल़ै लै शादणैं अर तेभै बी ज़ेभै सोभी इज़राईली टोलीओ दल आजू डेऊणा लै झ़ैऊंणअ।
“ज़ेभै दुही नर्शिंगै कठा बाज़े, तेभै हऐ सोभै कठा, संघा करै सोभै टोली मेल़-ज़ोल़े खिम्भा आजू झाल़अ।
“ज़ेभै एक्कै नर्शिंगअ बाज़े, तेभै हऐ इज़राईली बारा गोत्रे सैणैं कठा। ज़ेभै तम्हैं कोहरअ शाह फुकरी करै ज़ोरै नर्शिंगअ बाज़े, तेभै लागै पुर्बा दिशा आल़ै आपणैं खिम्भ च़की आजू हांढदै।
“ज़ेभै दुजी बारी कोहरअ शाह फुकरी ज़ोरै नर्शिंगअ बाज़े, तेभै लागै दखण दिशा आल़ै आपणैं खिम्भ च़की आजू हांढदै।
“ज़ेभै तम्हां लोगो झाल़अ करनअ होए, तेभै बी बाज़ै ज़ोरै नर्शिंगअ, पर तेभै निं कोहरअ शाह फुकरी करै बाज़ी।
“हारणे शोहरू ज़ुंण प्रोहत आसा, तिन्नां नर्शिंगै बाज़ै तिंयां। ऐहा गल्ला करै आजू पोस्ती दर पोस्ती एही ई।
“ज़ेभै तम्हैं आपणीं ज़ैगा आपणैं कहा दुशमणा संघै जुधा लै निखल़े तेभै बी बाज़ै नर्शिंगै कोहरअ शाह फुकरी, तेभै जाणअ मुंह थारै बिधाता थारअ धैन एछी अर मुंह हेरनी थारै दुशमणा का बच़ाऊंणा लै थारी मज़त करी।
“आपणैं खुशीए धैल़ै, हर तिह-थैरा दी अर भिन्नैं साला आपणीं हूम बल़ी अर मेल़-ज़ोल़े बल़ीए बगती बी बाज़ै तिन्नां नर्शिंगै, तेभै करूं हुंह थारी मज़त, हुंह आसा थारअ बिधाता।”
इज़राईली लागै सीनाई धारा का परान बाखा लै आजू हांढदै
मिसर देशा का निखल़णैं का बाद दुजी साला बिहा बशाहे धैल़ी उझ़ुअ बादल़ शाजतीए खिम्भा का उझै, तेखअ निखल़ै सोभै इज़राईली सीनाई धारे शुन्नैं रेगीस्ताना का आजू, संघा खल़्हुअ बादल़ परान नाओंए रेगीस्तानै। ज़िहअ बिधाता मोसा लै हुकम किअ त, तधू लागै तिंयां तेते साबै आजू हांढदै।
सोभी का आजी लागै यहूदी मणछे खिम्भे फ्रहरै आल़ै हांढदै, तिंयां लागै एक बडअ दल बणाईं आजू हांढदै अर तिन्नों सैनापति थिअ अमीनादाबो शोहरू नहशोन। इस्साकार गोत्रे दलो सैनापति थिअ सोहारो शोहरू नतनेल। ज़बलून गोत्रे दलो सैनापति थिअ हेलोनो शोहरू एलीआब।
तेखअ खोल्हअ मेल़-ज़ोल़ो खिम्भ। गर्शोनी अर मरारी ज़सरी खिम्भा च़कणें ज़िम्मैंबारी थिई, तिंयां लागै तेखअ तेता च़की आजू हांढदै।
तेता पिछ़ू लागै रूबेन गोत्रे खिम्भे फ्रहरै आल़ै आजू हांढदै, तिन्नैं बी बणाअं एक छ़ुंड अर तिन्नों सैनापति थिअ शदेऊरो शोहरू एलीसूर।
शमौने गोत्रो सैनापति थिअ शूरीशदाईओ शोहरू शलूमीएल।
गाद गोत्रो सैनापति थिअ दुएलो शोहरू एल्यासाप।
तेखअ लागै कहाती टोलीए पबित्र समाना च़की आजू हांढदै अर ज़ेभै तैणीं तिंयां पुजै, तेभा लै हेरअ डाही गर्शोनी अर मरारी आजू मेल़-ज़ोल़ो खिम्भ खल़अ करी।
तेता पिछ़ू लागअ एप्रैम गोत्रो फ्रहरअ अर तिन्नें सोभी टोली आजू हांढदै। तिन्नें दलो सैनापति थिअ अमीहूदो शोहरू एलीशामा। मनिश्शे गोत्रो सैनापति थिअ पदासूरो शोहरू गमलिएल।
बिन्यामीन गोत्रो सैनापति थिअ गिदोनीओ शोहरू अबीदान।
तेखअ दान गोत्रे खिम्भा आल़ै ज़ुंण सोभी का पिछ़ू थिऐ, तेखअ लागअ छ़ैहंकी तिन्नों फ्रहरअ हांढदअ अर तिंयां बी लागै एक दल बणाईं हांढदै। तिन्नों सैनापति थिअ अम्मीशदाईओ शोहरू आहीजेर।
आशेर गोत्रो सैनापति थिअ ओक्रानो शोहरू पगीएल।
नप्ताली गोत्रो सैनापति थिअ एनानो शोहरू अहीरा। इज़राईली लागा तै इहै ई आपणीं टोलीए साबै आजू हांढदै।
मोसा बोलअ आपणैं शौहरै मिद्यान देशे रूएले शोहरू होबाबा का, “हाम्हैं इज़राईली आसा तैहा ज़ैगा लै च़ाल्लै दै डेऊई ज़ेते बारै बिधाता इहअ आसा बोलअ द, ‘मुंह दैणीं सह ज़ैगा तम्हां लै,’ बिधाता आसा हाम्हां लै बोलअ द कि तम्हां लै हणीं सोभै गल्ला आजू भली, तैही बोला हुंह ताल्है बी कि तूह बी च़ाल हाम्हां संघै, हाम्हां करनी आपणीं ज़ैदात ताह संघै बी साझ़ू।”
होबाबै दैनअ मोसा लै ज़बाब, “हुंह निं च़ाल्लअ आथी, मुंह डेऊणअ आपणैं देश अर आपणैं टांडै-टबरा सेटा फिरी।”
तेखअ बोलअ मोसा, “हाम्हां छ़ाडी निं डेओऐ, किल्हैकि रेगीस्तानै एतरै लोगा लै डेरै खल़ै करना लै ज़ैगा किधी-किधी आसा, एतो थोघ आसा सिधअ ताखा ई, तूह कर हाम्हां लै आछिओ काम1। ज़ै तूह हाम्हां संघै एछे, हाम्हैं कर्मै तिन्नां सारी बर्गता ताह संघै साझ़ू ज़ुंण बिधाता हाम्हां लै दैणीं।”
तेखअ ज़ांऊं तिंयां परमेशरे सीनाई नाओंए धारा का आजू डेऊऐ, तिंयां रहै पैदल चिई धैल़ी तैणीं आजू हांढदै लागी। इना चिई धैल़ै रहअ बिधातो करारो मणशू तिन्नां सोभी का आजू बशैघ करना लै ज़ैगा लोल़अ आजू हांढदअ लागी।
ज़ांऊं तिंयां बशैघा बाद खिम्भ खोल्ही आजू लागा तै हांढदै, बिधातो एक बादल़ रहा त तिन्नां प्रैंदै घोर्हुई।
ज़ेभै-ज़ेभै मणशू आजू हांढणा लै तैर्हिआ त, तेभै-तेभै बोला त मोसा इहअ, “हे बिधाता, उझ़ू, तेरै दुशमण लोल़ी ओर्ही-पोर्ही छिंघुई ज़िहै आऐ तिहै ई बापस ठुर्है।”2
ज़ेभै करारो मणशू खल़्हिया त, तेभै-तेभै बोला त मोसा, “हे बिधाता, हज़ारो, लाखों इज़राईली मांझ़ा लै एछ फिरी।”
Source notes (2)
- Footnote आछिओ काम हाम्हां का खोज़दअ/बाता रहैऊंदअ
- Cross-reference भज. 68:1
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.