Kulvi Outer Seraji Bible
गणांई 9
ऊवार्णैओ थैर
इज़राईलीए मिसर देशा का निखल़णैं का बाद दुजी साले च़ैत्रै बोलअ बिधाता सीनाई धारे शुन्नैं रेगीस्तानै मोसा लै, “इज़राईली मनाऊंऐं ऊवार्णैओ1 थैर च़ौदा च़ैत्रे धैल़ै उडै एते सोभी बिधी-बधाने साबै।” ज़िहअ बिधाता बोलअ त मोसा खोज़अ इज़राईली का तिहअ ई अर तिन्नैं मनाऊंअ तेऊ ई भिन्नें च़ौदुऐ धैल़ै सीनाई धारे रेगीस्तानै ऊवार्णैओ थैर।2
पर कई मणछ तै इहै कि तिंयां थिऐ मरगा करै छ़ोतलै हुऐ दै, तिंयां निं ऊवार्णैओ थैर मनाऊंईं सकै, तिंयां आऐ मोसा अर हारणा सेटा संघा लागै बोल्दै, “हाम्हैं आसा मुल्दै करै छ़ोतलै हुऐ दै, तै हाम्हैं किल्है रहूं होरी इज़राईली संघै ऊवार्णे थैरा मनाऊंणै अर बिधाता लै पज़ाया दैणैं का पिछ़ू?”
मोसा बोलअ तिन्नां लै, “धिरअ हआ, हुंह लऊं पैहलै बिधाता का पुछ़ी कि सह एते बारै किज़ै बोला।”
बिधाता बोलअ मोसा का, “सोभी इज़राईली लै बोल कि च़ाऐ थारी आद-लुआदा दी कोहै बी कहा मुल्दै करै छ़ोतलै होए या बाता किधी दूर होए डेऊंदै लागै दै, तैबी बी मनाऊंऐं मुंह बिधाता लै ऊवार्णे थैरा। तम्हां लै आसा एऊ थैरा मनाऊंणे ज़ाज़त च़ौदा बशाहे धैल़ी उडै, ऊवार्णे पज़ाकरु अर आखरी रोटी अर कल़ुऐ शागे भाज़ी संघै। पर खाणअ-पिणअ निं दुजै धैल़ै लै बच़ाऊई अर नां पज़ाकरुओ निं एक हाडकअ बी लोल़ी चुटअ अर ऊवार्णे थैरा मनाऊंऐं बिधी-बधाने साबै।3
“पर ज़ुंण मणछ शुचअ आसा अर किधी दूर नांईं होए डेऊअ द, पर सह ऊवार्णैओ थैर नांईं मनाओए, सह निं आजू मेरअ रहणअ। तेऊ दोशा लै भेटणीं तेऊ मणछा सज़ा किल्हैकि तेऊ निं तैहा तिथी दी मुंह बिधाता लै बल़ीदान दैनअ।
“ज़ै कुंण परदेसी तम्हां संघै बिधाता लै ऊवार्णैओ थैर मनाऊंणअ च़ाहे, सह मनै एते बिधी बधाने साबै, देसी अर परदेसी दुही लै लोल़ी एऊ थैरा मनाऊंणे थारी एक्कै बिधी हुई।”
मेल़-ज़ोल़े खिम्भा फेर घणअ बादल़ अर आग
(लुआह 40:34-38)
ज़धू मेल़-ज़ोल़ो खिम्भ, ज़ेता लै शाजतीओ खिम्भ बी बोला, खल़अ किअ, तधू घोर्हुऐ हेरा-हेरी तेथ प्रैंदै घणैं बादल़। सारी राची शुझुअ सह बादल़ आगी ज़िहअ।
हर धैल़ै हआ त इहअ ई, धैल़ी घोर्हिआ त बादल़ अर राची शुझिआ त सह आगी ज़िहअ। ज़ेभै-ज़ेभै सह बादल़ उझै डेओआ त, तेभै लागा तै इज़राईली आजू हांढदै, अर ज़ांऊं सह बादल़ भिई घोर्हिआ त, तेभै पाआ तै इज़राईली तिधी डेरअ।
ज़ांऊं बिधाता तिन्नां लै हुकम करा त, तेखअ लागा तै इज़राईली आजू हांढदै अर ज़िधी बिधाता तिन्नां लै बशैघ करना लै बोला त, तिधी करा तै तिंयां आपणैं डेरै खल़ै। ज़ेतरै धैल़ै खिम्भा फेर बादल़ रहा त घोर्हुई तेतरै धैल़ै रहा तै तिंयां आपणैं डेरै खल़ै करी तिधी पल़ी।
ज़ै बादल़ खास्सै धैल़ै बी रहे घोर्हुई, इज़राईली मना बिधातो हुकम अर तिंयां निं तिधा का आजू हांढदै तै। केभै रहा त सह बादल़ थोल़ै ई धैल़ै, तेभै बी लागा तै तिंयां बिधातो हुकम मनी आजू हांढदै। केभै रहा त बादल़ सान्हां पोर्ही दुजै धैल़ै दोत्ती तैणीं अर ज़ांऊं दोत्ती सह उझै उझ़िआ त, तेभै लागा तै तिंयां आजू हांढदै।
खिम्भा दी सह बादल़ च़ाऐ एकी धैल़ी, च़ाऐ एकी भिन्नैं, च़ाऐ साला तैणीं घोर्हुई रहे, तेभै तैणीं रहा तै इज़राईली डेरै दी तिधी पल़ी, तिंयां निं आजू हांढदै तै, पर बादल़ उझ़णै का बाद लागा तै तिंयां आजू हांढदै। बिधातो हुकम मनी करा तै तिंयां आपणैं डेरै खल़ै, आजू हांढदै। ज़ुंण हुकम बिधाता मोसा लै दैआ त, तिंयां मना तै तेता।
Source notes (3)
- Footnote ऊवार्णैओ अह आसा इज़राईलीओ खास चिई थैरा मांझ़ै एक थैर, एऊ थैरा मनाऊंआं तै तिंयां मिसर देशे गलामी का छ़ुटणे आदगारी दी, ऐहा धैल़ी करा इज़राईली बिधाते तेऊ दूता आद ज़ुंण तिन्नें घअरा प्रैंदी डेऊअ त अर मिसर देशे लोगे सोभै ज़ेठै पाऐ तै तेऊ मारी।
- Cross-reference लुआ. 12:1-13
- Cross-reference लुआ. 12:46; जोह. 19:36
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.