Kulvi Outer Seraji Bible
गणांई 25
इज़राईली लै कंज़रैई करने सज़ा
इज़राईली थिऐ शितीम1 खागै आपणैं डेरै पाऐ दै, तिधी घिझ़ुऐ तिन्नां मांझ़ै कई मर्ध अर शोहरू मोआबी बेटल़ी अर शोहरी संघै कंज़रैई करदै ज़ुंण तिधी रहा ती।2 तिन्नैं बेटल़ी शादै तिंयां आपणैं मोआबी देअए जाचा लै अर इज़राईली लागै तिन्नां संघै तिन्नें देअए हूम अर बल़ीदाना मांझ़ै खांदै अर तिन्नें देअआ सेटा माथै टेक्कदै।
इहअ करै लागै इज़राईली मांझ़ै कई मणछ तिन्नें बाल-पोर देअआ पूज़दै अर बिधातो कोप लागअ इज़राईली लै पल़दअ। बिधाता बोलअ तेखअ मोसा लै, “इज़राईली सैणैं मांझ़ै ज़ुंण ऐहा कंज़रैई लै ज़िम्मैंबार आसा, तिन्नां आण मेरै मेल़-ज़ोल़े खिम्भा सेटा संघा पा तिन्नां धैल़ी-दपहरै सोभी लोगा नदरी3 मारी, तेखअ झ़ाणीं इज़राईली लै मेरअ कोप फांभअ होए।”
इज़राईली मांझ़ै ज़ुंण आपणीं-आपणीं टोलीए पांच़ थिऐ, मोसा बोलअ तिन्नां लै इहअ, “थारी टोली दी ज़ुंण-ज़ुंण मणछ बाल-पोर देअआ पूज़दै डेऊऐ, तिन्नां सोभी पाआ मारी।”
तेखअ हुअ इहअ कि मोसा अर इज़राईली टोलीए खास्सै मणछ थिऐ मेल़-ज़ोल़े खिम्भा आजू बिधाता सम्हनै आऐ दै, लोग आसा लेरदै-पकारदै लागै दै, तिधी आअ एक इज़राईली मणछ अर तेऊ निंईं आप्पू संघै एक मिद्यानी बेटल़ी आपणैं डेरै भितरा लै। हारणो पोचअ पिनहास ज़ुंण एलीआजरो शोहरू थिअ, सह थिअ प्रोहत, तेऊ हेरै तिंयां डेऊंदै भाल़ी अर सह डेऊअ इज़राईली टोली मांझ़ा का बर्छ़ै पाई तिन्नां पिछ़ू, ज़ांऊं सह मर्ध अर मिद्यानी बेटल़ी तिन्नें खिम्भा भितरी डेऊऐ, पिछ़ू डेऊअ एलीआजर बी अर तेऊ फाल़ै तिन्नां दुहीए पेट बर्छ़ै करै। तेता बाद किई बिधाता सह मरी खतम ज़ुंण इज़राईली मांझ़ै ती लागी दी। पर च़ौबी हज़ार मणछ गऐ तै तेभै तैणीं तैहा मरी करै खतम हई।4
तेखअ बोलअ बिधाता मोसा लै इहअ, “ज़ुंण काम आझ़ एलीआजरे शोहरू, हारण प्रोहते पोचै पिनहासै किअ, तेता करै हुअ मेरअ इज़राईली लै पल़अ द कोप फांभअ, नांईं ता मंऐं हेरै तै रोश्शै सोभै इज़राईली खतम लाई करी। तेऊए निं अह गल्ल ज़िर्हुई कि मुंह छ़ाडी कुंण कहा होरी सेटा माथअ टेक्के। पिनहासै ज़ुंण दिल खोल्ही च़ाकरी मुंह बिधाता लै रहैऊई, तेता करै भेटी इज़राईली माफी अर तिंयां बच़ै सज़ा भुगतणै का, मेरी रही तेऊ लै अह ज़बान कि सह अर आजू तेऊए आद-लुआद हणीं सारी सदा लै मेरै प्रोहत। मेरी अह करार आसा अटल़।”
ज़ुंण इज़राईली मणछ मिद्यानी बेटल़ी संघै मारअ त, तेऊ नाअं थिअ ज़िम्री। सह थिअ सालूओ शोहरू अर शमौन गोत्रा मांझ़ै एकी टोलीओ सैणअ। ज़ुंण सह मिद्यानी बेटल़ी तेऊ संघै मारी पाई ती, तैहा नाअं थिअ कुंज़बी अर सह थिई मिद्यानी टोलीए प्रधान सूरे शोहरी।
तेखअ बोलअ बिधाता मोसा लै इहअ, “मिद्यानी हुऐ ऐबै थारै दुशमण तम्हैं चुटा तिन्नां मारदै! तिन्नैं पाऐ ठगी करै इज़राईली बाल-पोर देअए पूज़ा कराऊई कबाता अर मिद्यानी सैणें शोहरी कुंज़बीए हत्या हणें ज़िम्मैंबार बी आसा तिंयां।”
Source notes (4)
- Footnote शितीम अखाया खाग
- Cross-reference 1 करि. 10:8
- Footnote सोभी लोगा नदरी तैहा ज़ैगा ज़िधी सोभै लोग भाल़ा
- Cross-reference 1 करि. 10:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.