Kulvi Outer Seraji Bible
गणांई 26
इज़राईलीए गणांई हुई दुजी बारी
ज़ांऊं बिधाता इज़राईली जैंदरा का तिन्नां मारनै आल़ी मरी दूर किई, तेखअ बोलअ बिधाता मोसा अर हारणे शोहरू एलीआजर प्रोहता लै,1 “सोभी इज़राईली टोलीए गणांई करी बणाआं तिन्नां लोगे बही ज़ुंण बिहा साला या तेता का उझै आसा अर ज़ुंण सैना दी सका काम करी।”
इज़राईली थिऐ मोआब जरदण नदीए बाढै अराबा रेगीस्तानै जेरिहो नगरी आपणैं डेरै पाऐ दै। मोसा अर एलीआजर प्रोहतै किअ ज़िहअ बिधाता बोलअ तिहअ ई, तिन्नैं झाल़ै सोभै लोग संघा बोलअ तिन्नां लै इहअ, “बिहा साले या तेता का उझै ज़ेतरै मणछ आसा तिन्नें करा तेही ई गणांई कि हर टोली दी केतरै आसा, ज़ेही मोसा मिसर देशा का निखल़ी सोभी इज़राईलीए गणांई किई ती।”
ज़ुंण इज़राईली मिसर देशा का निखल़ै तै, तिंयां आसा ईंयां:
इज़राईले ज़ेठै शोहरू रूबेने गोत्रा दी थिई आजू च़ार टोली, ज़ुंण तेऊए शोहरू हणोक, पालू, हिस्रोन अर कर्मींए खिंबा का हुई। इना सोभी टोली दी गणै पठी 43,730 मर्ध।
पालूओ शोहरू थिअ एलीआब अर एलीआबे हुऐ आजू चअन शोहरू नमूएल, दतान अर अबीराम। दतान अर अबीराम आसा तिंयां ई ज़ुंण लोगै छ़ांटै तै, पर तिंयां मिलै कोराह संघै अर ईंयां चअन तै तिन्नां लोगे टोली मांझ़ा का आजू बोल़णैं आल़ै सैणैं बणै दै ज़ुंण मोसा, हारण अर बिधातो बरोध करा तै। तिन्नें खूरा हेठा का दुहाशुई ती धरती दूई बाखा लै अर दतान, अबीराम अर कोराह डुबै तेथ आपणैं टबर अर ज़ैदाता संघी तैहा बडी द्रटा दी। तेखअ ज़ुंण दूई शौ पज़ाह मणछ तिन्नें संघी थिऐ, तिन्नां लै पल़ी सरगा का नढैऊऐ हेरा-हेरी बीज अर तिंयां बी हुऐ खतम अर अह त नछ़ैण कि होर इज़राईली टोली एता पोस्ती दर पोस्ती आद डाहे। पर कोराहे शोहरूए ती आजू आद-लुआद आसा ज़ुंण ज़िऊंदै रहै।
शमौने गोत्रा दी थिई आजू पांज़ टोली ज़ुंण तेऊए शोहरू नमूएल, ज़ामन, जाकीन, जेराह अर शाऊले खिंबा का हुई। इना सोभी टोली दी गणै पठी 22,200 मर्ध।
गादे गोत्रा का थिई सात टोली, तिंयां निखल़ी गादे शोहरू सपोन, हगाई, शूनी, ओजनी, एरी, अरोद अर अरेलीए खिंबा का। तिन्नां सोभी टोली दी गणै पठी 40,500 मर्ध।
यहूदा गोत्रा दी थिई पांज़ टोली ज़ुंण यहूदे शोहरू शेलाह, फिरिस, जेराह, अर फिरिसे शोहरू हिस्रोन अर हामले खिंबा का निखल़ी। इना सोभी टोली दी गणै पठी 76,500 मर्ध। यहूदे थिऐ दूई होर शोहरू बी, तिन्नां नाअं त एर अर ओनान अर तिंयां गऐ तै मिसर देशा लै डेऊणैं का आजी कनान देशै ई ज़ांऐं गछ़ी।
इस्साकारे गोत्रा दी थिई च़ार टोली, तिंयां निखल़ी इस्साकारे शोहरू तोला, पुबा, जशूब अर शिम्रोने खिंबा का। इना सोभी टोली दी गणै पठी 64,300 मर्ध।
ज़बलून गोत्रा दी थिई आजू चअन टोली, तिंयां हुई तेऊए शोहरू सेरेद, एलोन अर जहलेले खिंबा का। इना टोली दी गणै पठी 60,500 मर्ध।
युसुफे शोहरू थिऐ मनिश्शे अर एप्रैम। युसुफे शोहरू मनिश्शे गोत्रा दी आसा एक टोली मनिश्शे शोहरू माकीरा का, दुजी टोली माकीरे शोहरू गलादा का। गलादे थिऐ आजू छ़ह शोहरू ईएजेर, हेलेक, अजरीएल, शकेम, शमीदा अर हेपेर। इने खिंबा का हुई आजू आपणीं-आपणीं टोली। हेपेरे शोहरू सलफोदे निं आजू शोहरू हुऐ अर तेऊए ती आजू पांज़ शोहरी हुई दी, तिन्नां नाअं थिऐ मेहला, नोहा, होग्ला, मिल्का अर तिर्सा।
मनिश्शे गोत्रा दी इना सोभी टोली दी गणै पठी 52,700 मर्ध।
युसुफे शोहरू एप्रैमे गोत्रा का निखल़ी आजू च़ार टोली, एप्रैमे शोहरू शतूलेह, बेकेर अर ताहाने खिंबा का चअन टोली अर शतूलेहो त एक शोहरू एरान अर तेऊए नाओंऐं बणी एक होर टोली। इना सोभी टोली दी गणै पठी 32,000 मर्ध।
बिन्यामीन गोत्रा का निखल़ी आजू सात टोली, बिन्यामीने शोहरू बेला, अशबेल, आहीराम, शोपूपाम अर हुपामे खिंबा का हुई पांज़ टोली अर बेला का थिऐ आजू आर्द अर नामान दूई शोहरू, तिन्नें हुई आजू आपणीं-आपणीं टोली। इना सोभी टोली दी गणै पठी 45,600 मर्ध।
दान गोत्रा दी गणै पठी 64,400 मर्ध। ईंयां सोभै आसा दाने शोहरू शूहामे टोली का।
आशेरे गोत्रा का थिई आजू पांज़ टोली। बिन्यामीने शोहरू इमना, ईशबी अर बरीया का चअन टोली अर बरीये तै दूई शोहरू हेबेर अर मोल्कीएल तिन्नें नाओंऐं बणी दूई होर टोली। आशेरे ती एक शोहरी तैहा नाअं त सेराह। इना सोभी टोली दी गणै पठी 53,400 मर्ध।
नप्तालीए गोत्रा दी थिई च़ार टोली, तिंयां थिई नप्तालीए शोहरू जसेल, गूणी, ज़सेर अर शलेमे खिंबा का। इना सोभी टोली दी गणै 45,400 मर्ध।
लेबी गोत्रा छ़ाडी होरी इज़राईलीए गैरा गोत्रे सोभी टोली का ज़ेतरै मर्ध गणै, तिंयां निखल़ै पठी 6,01730 मर्ध।
तेखअ बोलअ बिधाता मोसा लै इहअ,2 “कनान देशे ज़ैगा दै इना सोभी गोत्रा लै इने गणांईए साबै बांडी, ज़हा गोत्रा दी खास्सै मणछ आसा, तिन्नां लै दैऐ खास्सी ज़ैगा अर थोल़ै मणछा आल़ै लै दैऐ थोल़ी। ज़ैगा बांडणां लै पाऐ तूह परच़ी, हुंह खोज़ूं ताखा आप्पै कि कुंण ज़ैगा कहा लै दैणीं। तेखअ ज़िहअ-ज़िहअ तिन्नें गोत्रो नाअं निखल़े, तेते साबै दैऐ खास्सै मणछा लै खास्सी अर थोल़ै लै थोल़ी ज़ैगा बांडी।”
लेबी गोत्रा संघै गणी गर्शोन, कहात अर मरारीए खिंबे नाओंऐं बणी दी टोली। इने आद-लुआदा का बणी आजू आपणैं-आपणैं दादा-बाबे नाओंए साबै होर टोली तिंयां ती लिब्ना, हेब्रोन, महली, मूशी अर कोराह। कहात थिअ अमरामो बाब। लेबी गोत्रा दी थिई अकबेदा नाओंए शोहरी, सह थिई मिसर देशै हुई दी, अमरामै किअ तैहा संघै बैह। अमराम अर अकबेदा का हुऐ दूई शोहरू हारण अर मोसा, एक हुई तिन्नें शोहरी तैहा नाअं त मिर्याम। हारणे हुऐ च़ार शोहरू नादाब, अबीहू, एलीआजर अर ईतामार।3 पर नादाब अर अबीहू गऐ तै तधू मरी ज़धू तिन्नैं धनैरै दी बिधाता लै एही आग पाई ज़ुंण शुची नांईं आथी ती।4
लेबी गोत्रे गणांई हुई होरी गोत्रा का ज़ुदी अर तिंयां निं होरी इज़राईली गोत्रा संघै गणै। किल्हैकि तिन्नां निं कनान देशे ज़िम्मीं-ज़ैगा किछ़ै बांड भेटी। लेबी गोत्रे सोभी टोली दी ज़ुंण एकी भिन्नैं का उझे अमरे सोभै शोहरू अर सोभै मर्ध थिऐ, तिंयां निखल़ै गणी करै पठी 23,000 मर्ध।
ज़धू मोसा अर एलीआजर प्रोहतै इज़राईलीए सोभी टोलीए गणांई किई, तधू थिऐ तिन्नैं मोआब जेरिहो नगरी नेल़ अराबा रेगीस्तानै जरदण नदीए बाढै डेरै पाऐ दै। सीनाई धारा रेगीस्ताने गणांई दी ज़ुंण इज़राईली मोसा अर हारण प्रोहतै गणै तै, तिन्नां मांझ़ै निं ऐहा दुजी गणांई लै यपुन्नें शोहरू कालेब अर नूने शोहरू ज़ैहसू छ़ाडी होर कोहै ज़िऊंदअ रहअ। किल्हैकि बिधाता हेरअ त बोली, “ईंयां मरनै शुन्नैं रेगीस्तानै सोभ।”5
Source notes (5)
- Cross-reference गण. 1:1-4
- Cross-reference गण. 34:13; ज़ैह. 14:1,2
- Cross-reference गण. 3:2
- Cross-reference लेब. 10:1,2; गण. 3:4
- Cross-reference गण. 14:26-35
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.