Kulvi Outer Seraji Bible
गणांई 27
सलफोदे शोहरीए अरज़
युसुफे शोहरू मनिश्शे खिंबा दी थिअ सलफोद नाओं मणछ, तेऊए बाबा नाअं त हेपेर, गलाद थिअ तेऊओ दादू अर माकीरो थिअ सह पल़पोचअ। सलफोदे थिई पांज़ शोहरी मेहला, नोहा, होग्ला, मिल्का अर तिर्सा।
एकी बारी हुअ इहअ कि तिंयां शोहरी डेऊई मेल़-ज़ोल़े खिम्भे प्रऊल़ी आजू मोसा, एलीआजर प्रोहत अर इज़राईली टोलीए सैणैं सेटा। होर बी थिऐ तिधी खास्सै इज़राईली। तिंयां ज़ुआन शोहरी लागी इहअ बोल्दी, “तम्हां का आसा ऐहा गल्लो थोघ कि म्हारअ बाब गअ इधा लै एछदी बाता शुन्नैं रेगीस्तानै ज़ांऐं। म्हारअ बाब निं कोराहे साथीए टोली संघै डेऊई मूंअ ज़ुंणी बिधाता लै विश्वास घात किअ। म्हारै बाबा ज़ांऐं हणैं पिछ़ू थिअ तेऊओ आपणअ किज़ै दोश।
“म्हारै बाबो निं शोहरू आथी हुअ द ज़हा करै आजू तेऊओ खिंब च़ले। ऐबै ज़ै तेऊओ शोहरू नांईं आथी हुअ द, सिधअ ऐहा गल्ला पिछ़ू निं लोल़ी तेऊए खिंबो नाअं खतम हुअ! हाम्हैं च़ाहा इहअ कि ज़ेही तम्हैं टोली दी सोभी लै ज़ैगा बांडी, तेही दैआ हाम्हां लै बी म्हारै च़ाच़ू-ताऊ संघै ज़िम्मीं-ज़ैगा, ताकि म्हारै बाबो नाअं पोस्ती दर पोस्ती रहे।”
मोसा डेऊअ बिधाता सेटा पुछ़दअ कि एता लै किज़ै करनअ।
बिधाता बोलअ मोसा लै इहअ, “सलफोदे शोहरी आसा ठीक लागी दी बोल्दी। ज़ेतरी ज़िम्मीं इने बाबे हेस्सै एछणी ती, तेतरी ज़िम्मीं दै तूह इने च़ाच़ू-ताऊए ज़िम्मीं-ज़ैगा जैंदरी इना शोहरी लै बी हेस्सअ।1
“होरी सोभी इज़राईली का बी डाह खोज़ी, ज़ै कुंण मणछ शोहरू हणैं बाझ़ी मरे, तेऊए सारी ज़ैदाते मालक हणीं आजू तेऊए शोहरी। ज़ै तेऊए एक शोहरी बी निं होए, तै हणैं तेऊए ज़ैदाते मालक तेऊए सक्कै भाई-भाऊ। पर ज़ै तेऊए सक्कै भाई-भाऊ बी निं होए तै हणैं तेऊए ज़िम्मीं-ज़ैगे मालक तेऊए सक्कै च़ाच़ू-ताऊ। पर ज़ै तेऊए च़ाच़ू-ताऊ बी नांईं होए, तै दैऐ तेऊए ज़िम्मीं-ज़ैगा तेऊए टोली दी टबरा मांझ़ै कहा इहै लै ज़ुंण तेऊओ सोभी का सक्कअ होए। अह बधान दैनअ तम्हां लै मंऐं बिधाता अर सोभै इज़राईली डाहै एतो धैन।”
सोभी इज़राईलीओ सैणअ बणाअं ज़ैहसू
(बधान 31:1-8)
बिधाता बोलअ मोसा लै इहअ, “एकी धैल़ै लऐ तूह अबरीम नाओंए धारा प्रैंदै डेऊई, तिधा का शुझणीं ताखा सह ज़ैगा ज़ुंण मंऐं इज़राईली मणछा लै दैनी।2 ज़ांऊं तूह तैहा ज़ैगा भाल़ी हेरे, तेता बाद हणीं तेरी मौत, ज़ेही तेरै भाई हारणा लै आई ती। किल्हैकि तम्हैं दुही भरैरै आसा इहअ कशूर किअ द कि ज़िहअ मंऐं हुकम किअ, तम्हैं निं तधू तिहअ किअ आथी। ईंयां गल्ला आसा तधू हुई दी ज़धू इज़राईली टोली सीन नाओंए रेगीस्तानै मरीबा ज़ैगा मुल्है बखर्दै लागै तै। तंऐं निं तधू मेरी पबित्र शगती दी विश्वास किअ त।”
इहअ शूणीं लागअ मोसा बिधाता लै इहअ बोल्दअ, “बिधाता, तूह आसा सोभिओ मालक अर तूह परखा सोभिओ मन्न। मेरी आसा ताखा एही अरज़ कि इज़राईली टोली लै छ़ांट एक सैणअ।3 ताकि तेऊ का सोभी गल्लो हक होए अर जुधा लै तिन्नों सैणअ होए, अर तेरै इज़राईली टोलीए सोभै लोग निं तै भेडा-बाकरीए एही हेल़्ही ज़िहै हणैं, ज़ेतो कोहै फुआल निं हंदअ।”4
बिधाता बोलअ मोसा लै इहअ, “नूनो शोहरू ज़ैहसू आसा एऊ कामां जोगी। ऐहा गल्ला प्रगट करना लै डाहै तूह तेऊए मुंडै हाथ कि तेरी पदबी दी बेशणअ आजू सह।5 तेखअ निंयैं तेऊ माहा प्रोहत एलीआजर अर इज़राईली टोली सम्हनै। संघा खोज़ै सोभी नदरी ऐहा गल्ला कि थारअ सैणअ आसा आजू ज़ैहसू। तेऊ लै दैऐ तिन्नां सोभी गल्लो हक ज़ुंण ताखा थिअ, ताकि इज़राईली टोली तिहअ ई करे ज़िहअ ज़ैहसू बोले।
“पर ज़ैहसू लागणअ मुंह बिधाता पुछ़दै एलीआजर माहा प्रोहता सेटा एछणअ, तेऊ पाणीं मुंह सेटा प्रशण6 अर तेथ खोज़णअ मुंह आप्पै कि हुंह इज़राईली टोली लै किज़ै च़ाहा।”7
ज़िहअ बिधाता मोसा लै हुकम किअ, तेऊ किअ तिहअ ई, संघा निंयं तेऊ ज़ैहसू एलीआजर प्रोहत अर इज़राईली टोली सेटा लै, तेखअ डाहअ मोसा आपणअ हाथ ज़ैहसूए मुंडै संघा दैनी तेऊ आपणीं पदबी तेऊ लै।8
Source notes (8)
- Cross-reference गण. 36:2
- Cross-reference बधा. 3:23-27; 32:48-52
- Cross-reference इब्रा. 12:9
- Cross-reference 1 राज़. 22:17; एज. 34:5; मोत्त. 9:36; मार्क. 6:34
- Cross-reference लुआ. 24:13
- Footnote प्रशण इब्रानी बोली दी आसा ऊरीम अर तूरीम, तेता करै मांगा त प्रोहत बिधाता का ज़ाज़त।
- Cross-reference लुआ. 28:30; 1 शमू. 14:41; 28:6
- Cross-reference बधा. 31:23
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.