Kulvi Outer Seraji Bible
गणांई 24
बलाम गूरा का थिअ थोघ कि बिधाता निं लाअ इहअ बोली कि तूह दै इज़राईली लै फिटक। एभकी बारी निं तेखअ बलाम बिधाता पुछ़दअ दूर ज़िहअ डेऊई। पर तेऊ फरेऊअ आपणअ मुंह शुन्नैं रेगीस्ताना बाखा।
तेऊ का शुझुअ कि उंधै आसा इज़राईली आपणैं-आपणैं गोत्र अर टोलीए साबै डेरै पाऐ दै। तेखअ किअ बलाम गूर परमेशरे आत्मां आपणैं बशै, संघा लागअ बलाम गूर आजू हणैं आल़ी गल्लो इहअ भेद प्रगट करदअ,
“हुंह बोरो शोहरू बलाम बोला इहअ,
हुंह खोज़ा शुची गल्ला अर ऐबै शूणां तम्हैं ज़ुंण हुंह बोला!
मंऐं शूणैं ईंयां बैण परमेशरे
ज़हा का सारअ बल आसा।
मंऐं टेक्कअ तेऊ सेटा माथअ अर
तेऊ किई धैनै मुखा इज़राईले बारै एही गल्ला प्रगट,
‘याकबे आद-लुआद इज़राईलीओ,
थारै डेरै आसा लोभणैं आल़ै।
ईंयां ज़ाण्हिंआं एकी लगैगा दी लागै दै
खज़ूरे बूट अर दरैऊए बाढै लागै दै बागा ज़िहै।
तिंयां ज़ाण्हिंआं बिधाता आप्पी रोहै दै अगरे बूटा ज़िहै
अर गाडे बाढै लागै दै केल़ुईए बणां ज़िहै।
तिन्नें आद-लुआद फल़णीं-फूल़णीं एही,
ज़िहै खास्सै पाणींए सोबल़ा नेल़ बेज़अ बझ़ा।
तिन्नें राज़ैओ राज़ हणअ खास्सअ बडअ अर
सह हणअ अमोलकीए राज़ै आगागा का बी महान।
परमेशरै आणै तिंयां बणें बल्दा ज़िहै
जुझुई करै मिसर देशा का काढी।
इज़राईला करनै आपणैं दुशमण खतम,
तिंयां करनै तेऊ आपणैं कतीरा करै छ़िन्ह-बिन्ह अर
तिन्नें हाडकै करनै तेऊ चोल़ी भींन।
इज़राईल आसा सिह-सिहणीं ज़िहअ
शकार करी सुत्ती रहअ द,
ऐबै निं तेऊ कुंण छ़ेल़ी सकदअ।
ज़ुंण इज़राईला लै बर्गत दैए,
तेऊ लै बी दैणीं बिधाता बर्गत,
ज़ुंण फिटक दैए तेऊ लागणअ आप्पू ई फिटक।’”1
ज़ांऊं बलाक राज़ै ईंयां गल्ला शूणीं, सह हुअ रोश्शै लाल-पिंऊंल़अ अर तेऊ बाटी आपणीं मुठी संघा बोलअ बलाम गूरा लै इहअ, “मंऐं शादअ तूह आपणैं दुशमणा लै फिटक दैंदअ पर तंऐं दैनी चिई बारी तिन्नां लै बर्गत ई बर्गत। एभी लाग आपणैं घअरा लै हांढदअ! मंऐं ता सोठअ त इहअ कि मुंह दैणअ ताल्है ऐहा गल्ला पिछ़ू खास्सअ पुआज़अ, पर ज़िहअ हुंह च़ाहा त, बिधाता निं ताल्है तिहअ करनै दैनअ अर ताह निं सह पुआज़अ बी फाभणअ।”
बलाम गूरै दैनअ बलाक राज़ै लै इहअ ज़बाब, “ज़ुंण दूत तंऐं मुंह सेटा छ़ाडै तै, मंऐं हेरअ त पैहलै ई तिन्नां का बोली, ‘राज़अ बलाक ज़ै मुल्है आपणैं मैहला का सारअ सुन्नअ-च़ंदी बी दैए, तैबी बी करनअ मुंह तिहअ ई ज़िहअ मुल्है मेरअ परमेशर बिधाता हुकम करे, हुंह निं आपणीं बाखा किछ़ै करदअ।’ शुण, हुंह ता च़ाल्लअ ऐबै आपणैं घअरा लै डेऊई, पर डेऊंदी-डेऊंदी लऊं हुंह ताखा खोज़ी कि ताह अर तेरै देशे लोगा संघै आजू इज़राईली किज़ै करनअ।”
खिरी बोलै बलाम गूरै इज़राईले बारै ईंयां बोल
तेखअ लागअ बलाम गूर आजू हणैं आल़ी गल्लो भेद प्रगट करी इहअ बोल्दअ,
“हुंह बोरो शोहरू बलाम बोला इहअ,
हुंह खोज़ा शुची गल्ला अर ऐबै शूणां तम्हैं ज़ुंण हुंह बोला!
मंऐं शूणैं ईंयां बैण परम प्रधान परमेशर बिधाता
ज़हा का सारअ बल अर समझ़ आसा।
मंऐं टेक्कअ तेऊ सेटा माथअ अर
तेऊ किई धैनै मुखा इज़राईले बारै एही गल्ला प्रगट,
मुखा आसा लागी दी आजू हणैं आल़ी गल्ला शुझदी,
याकबे आद-लुआद इज़राईली मांझ़ै निखल़णअ भैणूं तारै ज़िहअ एक राज़अ।
तेऊ करनै मोआबी2 बरैबाद अर शेते आद-लुआद खतम3।
इज़राईला करनै आपणैं दुशमण एदोम अर सेईर कैद,
इज़राईला गिम्मणी तिन्नें ज़ैगा आप्पू लै अर
इज़राईले हणीं ज़ीत ई ज़ीत।
याकबे आद-लुआदा का निखल़ै दै राज़ै करनअ सारै दी राज़ अर
ज़ुंण नगरी तिधी अज़ी रही दी होए,
तिंयां बी करनी तेऊ खतम।
मुखा आसा शुझदअ लागअ द कि
अमोलकी लोगा लै आजू किज़ै च़ाल्लअ हई,
अमोलकी आसा एभै सोभी ज़ाती का बलबान,
पर तिन्नों राज़ हणअ आजू सदा लै खतम।
कैनीए4 आद-लुआदे बारै आसा मुखा इहअ शुझदअ लागअ द,
तिंयां ता ज़ाणा इहअ कि ज़िधी तिंयां रहा,
तिधी आसा तिंयां राज्ज़ी-राम्बल़ै,
ज़िहअ कि तिन्नों कोल्ह आसा उछ़टी भिल़ी दी!
पर तिंयां बी हणैं खिरी खतम
ज़ांऊं अश्शूरी लोगा तिंयां कैद करनै।
ज़ै परमेशरे मन्नैं प्रल़या करने बेठी गई,
तेभै निं कोहै ज़िऊंदअ बच़ी सकदअ!
कित्ती टापू बाखा एछणैं ज़हाज़,
ज़ुंण लोग तेथ एछणैं तिन्नां गिम्मणी अश्शूर
अर एबेरा देशे ज़ैगा।
पर खिरी हणैं कित्ती टापू बाखा आऐ दै तिंयां लोग आप्पू खतम।”
इहअ बोली लागअ बलाम तिधा का आपणैं घअरा लै हांढदअ अर राज़अ बलाक बी डेऊअ आपणीं बाता।
Source notes (4)
- Cross-reference मूल. 12:3; 39:9
- Footnote मोआबी मोआबे माथै
- Footnote लुआद खतम सोभी घमंडी अर उपद्रभ करनै आल़ै
- Footnote कैनी ईंयां आसा कैन खिंबा दी आजू आद-लुआद। ईंयां थिऐ मोआब नेल़ इज़राईले दखणा बाखा रेगीस्तानै बस्सै दै
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.