Kulvi Outer Seraji Bible
गणांई 23
बलाम गूरे पैहली बारी आजू हणैं आल़ी गल्ला प्रगट करनी
बलाम गूरै बोलअ तेखअ बलाक राज़ै लै, “इधी बणाऊं तूह सात बेदी, संघा आण तूह सात बाछ़ू अर सात गाभू।”
बलाक राज़ै किअ तिहअ ई, तेखअ किऐ बलाक राज़ै अर बलाम गूरै तिन्नां सोभी बेदी दी एक-एक गाभू अर एक-एक बाछ़ू बल़ीदान। तेखअ बोलअ बलाम गूरै बलाक राज़ै लै, “तूह रह इधी इना हूम बल़ी सेटा खल़्हुई, हुंह डेऊं किधी कांगनरांगै दी, तिधी झ़ाणीं बिधाता मुंह सम्हनै प्रगट होए, तेखअ ज़िहअ बिधाता मुल्है बोले, हुंह खोज़ूं तिन्नां सोभी गल्ला ताखा।” इहअ बोली डेऊअ बलाम उझै धारा प्रैंदा लै।
ज़ांऊं बिधाता प्रगट हुअ, बलाम लागअ बिधाता का इहअ खोज़दअ, “मंऐं बणाईं ताल्है सात बेदी अर तिन्नां सोभी बेदी दी किअ मंऐं एक-एक गाभू अर एक-एक बाछ़ू बल़ीदान।”
बिधाता खोज़ी बलाम गूरा का गल्ला, संघा बोलअ इहअ, “बलाक राज़ै सेटा डेऊ संघा खोज़ तेऊ का अह समाद।” ज़ांऊं बलाम बापस फिरअ, तेऊ भाल़ै कि राज़अ बलाक अर मोआब देशे सैणैं आसा तिन्नां हूम बल़ीदाना सेटा अज़ी तैणीं खल़्हुई रहै दै।
तेखअ लागअ बलाम गूर आजू हणैं आल़ी गल्ला खोज़दअ,
“मोआब देशे बलाक राज़ै शादअ हुंह
इहअ बोली सिरीया मुल्खै पुर्बा दिशा बाखा धारा का,
‘मेरी तैणीं एछ इधा लै कि
याकबे आद-लुआद इज़राईली लै दै फिटक अर तिन्नां डरैऊ!’
हुंह किहअ करै सका तिन्नां लै फिटक दैई
ज़हा लै परमेशर फिटक निं दैंदअ?
तिन्नां किल्है डरैऊं ज़हा बिधाता निं डरैऊंदअ?
उछ़टी धारे गल़ांखी का आसा
मुखा उंधै इज़राईली शुझदै लागै दै,
तिंयां आसा इहअ देश,
ज़ुंण कल्ही आसा बस्सअ द,
तिन्नां का आसा थोघ कि बिधाता आसा
तिंयां होरी ज़ाती का ज़ुदै करी
आपणीं परज़ा बणाईं दी!
याकबे आद-लुआद आसा
माट्टे कणीं ज़िहै खास्सै, ज़हा कुंण गणी निं सकदअ।
मुंह बी आसा आशा कि हुंह
इज़राईली ज़ेही ज़िन्दगी ज़िऊ अर धर्मीं मणछे मौता मरूं।”
इहअ शूणीं लागअ बलाक राज़अ बलाम गूरा लै बोल्दअ, “तंऐं मुल्है अह कै किअ? मंऐं शादअ तूह मेरै दुशमणा लै फिटक दैंदअ अर तंऐं दैणीं इना लै बर्गत ई बर्गत!”
बलाम गूरै दैनअ ज़बाब, “बिधाता ज़िहअ मुखा खोज़अ, मुंह ता तिंयां गल्ला तेही ई हुई बोल़णीं!”
बलाम गूरे किई दुजी बारी भिई गल्ला प्रगट
बलाक राज़ै बोलअ बलाम गूरा लै, “च़ाल्ल हाम्हां डेऊणअ किधी होर्ती, तेथ बाखा शुझणैं ताखा होर इज़राईली, सोभै ता निं ताखा शुझणैं पर ज़ेतरै ताखा बागी-बागी शुझिए तिन्नां लै दैऐ तूह मेरी तैणीं फिटक।”
तेऊ निंयं बलाम सपीम नाओंए सऊंऐं मुल्खा बाखा संघा पजैल़अ सह पिसगा नाओंए धारे गल़ांखी दी। तिधी बी बणाईं तिन्नैं सात बेदी अर तिन्नां सोभी बेदी दी किअ एक-एक गाभू अर एक-एक बाछ़ू बल़ीदान। तेखअ बोलअ बलाम गूरै बलाक राज़ै लै, “तूह रह इधी इना हूम बल़ी सेटा खल़्हुई, हुंह डेऊं पार उझै ज़िहअ संघा एछूं बिधाता संघै गल्ला करी।”
बिधाता खोज़ी बलाम गूरा का गल्ला, संघा बोलअ इहअ, “बलाक राज़ै सेटा डेऊ फिरी संघा खोज़ तेऊ का अह समाद।”
बलाम गूर डेऊअ बलाक राज़ै सेटा फिरी, तेऊ भाल़ै कि राज़अ बलाक अर मोआब देशे सैणैं आसा तिन्नां हूम बल़ीदाना सेटा खल़्हुई रहै दै।
बलाक राज़ै पुछ़अ बलाम गूरा का, “बिधाता किज़ै खोज़अ?”
तेखअ लागअ भिई बलाम गूर बलाक राज़ै का तिहअ ई आजू हणैं आल़ी गल्ला खोज़दअ,
“परमेशर निं मणछा ज़िहअ आथी
ज़ुंण झ़ुठअ बोला, अर तेभा-तेभी आपणीं गल्ल बदल़ा!
बिधाता ज़ै ज़बान दैई हेरी,
सह करा तेखअ तिहअ ई ज़िहअ तेऊ बोली हेरअ।
बिधाता आसा मुल्है इना लोगा लै
बर्गत दैणैंओ हुकम किअ द, तेऊ आसा इना लै
बर्गत दैई हेरी दी अर तेता निं हुंह बदल़ी सकदअ।
बिधाता निं याकबा दी किछ़ै खोट शुझदी अर
नां तेऊ तिन्नां दी पाप भाल़अ।
इज़राईलीओ परमेशर बिधाता रहा तिन्नां संघै,
तिंयां बोला ऐहा गल्ला सोभी सेटा कि तिन्नों राज़अ आसा बिधाता।
परमेशर जुझुअ मिसरी लोगा संघै बणें बल्दा ज़िहअ,
संघा आणै इज़राईली मिसर देशा का काढी।
याकबा निं ज़ादू-मत्र लागदअ,
इज़राईलीए बारै बोल़णअ लोगा इहअ,
‘भाल़ा, परमेशरै आपणैं इना लोगा लै
किहै-किहै नुआहरै काम किऐ!’
इज़राईली आसा शकारा लै ताखुऐ दै
सिह-सिहणीं ज़िहै, ज़ेभै तैणीं तिंयां
शकार खाई अर तेतो लोहू झुटी निं मुक्के,
तेभै तैणीं निं तिंयां पिछ़ू हटदै।”
बलाक राज़ै बोलअ ज़ोरै-ज़ोरै बलामा लै, “ज़ै तूह इज़राईली मणछा लै फिटक निं दैई सकदअ, तै निं इना लै बर्गत बी दैऐ आथी।”
बलाम गूरै दैनअ बलाक राज़ै लै ज़बाब, “मंऐं हेरअ त ताल्है पैहलै ई खोज़ी, ‘ज़िहअ बिधाता मुल्है बोले, मुंह हुअ तिहअ करनअ।’”
चिऊथी बारी बी निं बलाम गूरै इज़राईली लै फिटक दैनअ
बलाक राज़ै बोलअ तेखअ चिऊथी बारी बलाम गूरा लै, “च़ाल्ल हाम्हां डेऊणअ कहा होरी ज़ैगा लै, तिधा का झ़ाणीं बिधाता ताल्है इज़राईली मणछा लै फिटक दैणें ज़ाज़त दैए।”
तेखअ निंयं बलाक राज़ै बलाम, पोर नाओंए धारा लै, तिधा का शुझिआ त खार समुंदरो उतर दिशा बाखो रेगीस्तान।
बलाम गूरै बोलअ तिधी पुजी बलाक राज़ै लै इहअ, “इधी बी बणाऊं मुल्है सात बेदी संघा आण सात बाछ़ू अर सात गाभू होर।”
ज़िहअ बलाम गूरै बोलअ, बलाक राज़ै किअ तिहअ ई, संघा किऐ तिन्नां सोभी बेदी दी एक-एक गाभू अर एक-एक बाछ़ू बल़ीदान।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.