Kulvi Outer Seraji Bible
गणांई 34
कनान देशै इज़राईलीए सिअं
तेखअ बोलअ बिधाता मोसा लै इहअ, इज़राईली का डाह इहअ खोज़ी कि ज़ेभै तम्हैं कनान देशै डेओए, तेऊ देशै ज़ेतरी ज़ैगा मुंह तम्हां लै दैणीं, तेते सिअं हणीं दखणा बाखा सीन रेगीस्ताना पोर्ही उतर-पछ़म एदोम तैणीं। अह बान्नअ हणअ लाल समुंदरे दखण खार समुंदरे दखण पुंझ़ा का शुरू। तिधा का पछ़मा बाखा फिरी डेऊणीं थारी सिअं दखणा बाखा अक्रबीम ज़ोता बाखा अर तिधा का आजू सिधी सीन गराऊंऐं अर कादेश-बर्ना नगरी तैणीं। तिधा का फिरनी उतर-पछ़मा बाखा हजरदार अर आजू अस्मोन तैणीं। तिधा का डेऊणीं थारी सिअं मिसर देशे बान्नै दी गाडा बाती माहा समुंदरै तैणीं।
“पछ़मा बाखा बी हणीं थारी सिअं माहा समुंदरै तैणीं।
“उतर दिशा बाखा बी हणअ थारअ बान्नअ माहा समुंदरा का शुरू। तिधा का हणीं थारी सिअं पुर्बा बाखा हूर धारा तैणीं। तिधा का आजू हमात ज़ोता बाती सिधी सदाद तैणीं उतरा बाखा तेऊ पुंझ़ै हणअ थारै देशो बान्नअ। तिधा का आजू डेऊणीं थारी सिअं पुर्बा बाखा सिधी जिप्रोन अर हसेरनान तैणीं। हसेरनान ज़ैगा का हणीं थारी पुर्बा बाखा सिअं शुरू तेखअ होथणी दखणा बाखा शपाम तैणीं। तिधा का उंधै रिबला ज़ुंण एने पुर्बा बाखा आसा। तिधा का दखणा बाखा गलील समुंदरे बाढै पुर्बा बाखा धारा तैणीं। तिधा आजू दखणा बाखा जरदण नदीए बाता खार समुंदरा तैणीं।
“थारै देशे सिअं हणीं अह ई।”
तेखअ बोलअ मोसा इज़राईली लै भिई इहअ, “ज़ुंण ज़ैगा तम्हां आप्पू मांझ़ै परच़ी पाई बांडणी, तेता का भेटणअ तम्हां इना सिऊंआं भितरी हेस्सअ। अह ज़ैगा आसा थारी, पर बिधाता बोला इहअ कि ऐहा ज़ैगा बांडै साढै नौ गोत्रा लै।1 किल्हैकि रूबेन, गाद गोत्रा आसा गई दी आपणैं हेस्से ज़ैगा भेटी अर मनिश्शे गोत्रा मांझ़ै बी आसा आधै लोगा लै बांड दैई हेरी दी। इना ढाई गोत्रा लै आसा जेरिहो नगरी सम्हनै जरदण नदीए पुर्बा बाखा मुल्खै सारी नगरी अर गराअं।”
बांडणी करनै आल़ै सैणैं
बिधाता बोलअ मोसा लै इहअ, “एलीआजर प्रोहत अर नूनो शोहरू ज़ैहसू दैऐ सोभी इज़राईली लै एऊ देशे सारी ज़ैगा बांडी।
“इज़राईली हर गोत्रा का हणअ एक-सैणअ ज़हा एऊ कामां लै तिन्नें मज़त करनी, तिन्नें नाअं आसा ईंयां:
यहूदा गोत्रा बाखा यपुन्नेंओ शोहरू कालेब सैणअ,
शमौने गोत्रा बाखा अमीहूदो शोहरू शमूएल,
बिन्यामीन गोत्रा बाखा कसलोनो शोहरू एलदाद,
दान गोत्रा बाखा जोगलीओ शोहरू बऊकी,
युसुफे खिंबा बाखा मनिश्शे गोत्रा का एपोदो शोहरू हनीएल
अर एप्रैम गोत्रा बाखा हणअ शिप्तानो शोहरू कमूएल सैणअ,
ज़बलून गोत्रा बाखा पर्णाको शोहरू एलीसापान,
इस्साकार गोत्रा बाखा अजानो शोहरू पलतीएल,
आशेर गोत्रा बाखा शलोमीओ शोहरू अहीहूद
अर नप्ताली गोत्रा बाखा हणअ अमीहूदो शोहरू पदहेल सैणअ।”
ईंयां मणछ हणैं एलीआजर प्रोहत अर ज़ैहसू संघै इज़राईली लै कनान देशे हेस्सै बांडणै आल़ै ज़हा लै बिधाता आप्पै हुकम किअ कि तिंयां एऊ कामां करे।
Source notes (1)
- Cross-reference गण. 26:52-56; ज़ैह. 14:1-15
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.