Kulvi Outer Seraji Bible
गणांई 1
इज़राईलीए गणांई
इज़राईली निखल़ै मिसर देशा का, संघा लागै तिंयां तेऊ उज़र रेगीस्तानै रहंदै ज़िधी सीनाई धार आसा। मिसर देशा का निखल़णैं बाद दुजी साले साज़ै बशाहै ज़ांऊं मोसा मेल़-ज़ोल़े खिम्भा दी थिअ, बिधाता बोलअ तेऊ लै इहअ,1 “हुंह च़ाहा इहअ कि ऐहा गल्लो थोघ करा कि इज़राईलीए दादा-बाबे टोली अर खिंबा दी केतरै लोग आसा, अर हारण गण तिन्नां सोभी लोगा ज़ुंण इज़राईली बिहा साले या बिहा साला का खास्सी अमरे आसा अर ज़ुंण जुध सका करी।
“आप्पू संघै डाहै बारा गोत्रा का बारा मणछ, मतलब हरेकी गोत्रा का एक सैणअ मणछ, तिन्नां करनी तेरी मज़त। तेरै तिन्नां साथीए नाअं आसा ईंयां:
“रूबेने गोत्रा का शदेऊरो शोहरू एलीसूर, शमौने गोत्रा का शूरीशदाईओ शोहरू शलूमीएल, यहूदे गोत्रा का अमीनादाबो शोहरू नहशोन, इस्साकारे गोत्रा का सोहारो शोहरू नतनेल, ज़बलूने गोत्रा का हेलोनो शोहरू एलीआब, युसुफे खिंबा का आसा ईंयां, मतलब एप्रैमे गोत्रा का अमीहूदो शोहरू एलीशामा, मनिश्शे गोत्रा का पदासूरो शोहरू गमलिएल, बिन्यामीने गोत्रा का गिदोनीओ शोहरू अबीदान, दाने गोत्रा का अम्मीशदाईओ शोहरू आहीजेर आशेरे गोत्रा का ओक्रानो शोहरू पगीएल, गादे गोत्रा का दुएलो शोहरू एल्यासाप, नप्तालीए गोत्रा का एनानो शोहरू अहीरा।”
सोभी गोत्रे टोली का ज़ुंण मणछ मोसा अर हारणै तिन्नें टोली का सैणैं बणाऐं, ईंयां आसा ईंयां ई, अर ईंयां थिऐ इज़राईलीए बारा खिंबे सैणैं2 मणछ। ज़हा मणछे नाअं प्रैंदै आसा लिखै दै तिंयां हर गोत्रे सैणैं शादै मोसा अर हारणै तैहा ई साज़ै बशाहे धैल़ी। तेखअ ज़िहअ बिधाता मोसा लै हुकम किअ त, तेऊ ई साबै किअ मोसा बशाहे भिन्नैं साज़ै धैल़ै अर तेऊ संघै इनै इज़राईली सैणैं सोभी इज़राईली टोली दी ज़ेतरै बी बिहा या बिहा साला का बडी अमरे थिऐ, तिन्नां सोभी मर्धे सीनाई रेगीस्तानै गणांई।
ज़ुंण बिहा साले या बिहा साला का खास्सी अमरे बलबान मर्ध ज़ुंण इज़राईले सैना बणी जुध सका तै करी तिंयां आसा ईंयां अर तिंयां गणै तिन्नें गोत्र अर टोलीए साबै:
रूबेन त इज़राईलो ज़ेठअ शोहरू, रूबेन गोत्रे आद-लुआद निखल़ै सोभी टोली दी पठी गणी करै 46,500 मर्ध ज़ुंण बिहा साला का उझै अमरे अर जुधा करनै जोगी थिऐ।
शमौन गोत्रे आद-लुआद निखल़ै सोभी टोली दी पठी गणी करै 59,300 मर्ध ज़ुंण बिहा साला का उझै अमरे अर जुधा करनै जोगी थिऐ।
गाद गोत्रे आद-लुआद निखल़ै सोभी टोली दी पठी गणी करै 45,650 मर्ध ज़ुंण बिहा साला का उझै अमरे अर जुधा करनै जोगी थिऐ।
यहूदा गोत्रे आद-लुआद निखल़ै सोभी टोली दी पठी गणी करै 74,600 मर्ध ज़ुंण बिहा साला का उझै अमरे अर जुधा करनै जोगी थिऐ।
इस्साकार गोत्रे आद-लुआद निखल़ै सोभी टोली दी पठी गणी करै 54,400 मर्ध ज़ुंण बिहा साला का उझै अमरे अर जुधा करनै जोगी थिऐ।
ज़बलून गोत्रे आद-लुआद निखल़ै सोभी टोली दी पठी गणी करै 57,400 मर्ध ज़ुंण बिहा साला का उझै अमरे अर जुधा करनै जोगी थिऐ।
युसुफे खिंबा का एप्रैम गोत्रे आद-लुआद निखल़ै सोभी टोली दी पठी गणी करै 40,500 मर्ध ज़ुंण बिहा साला का उझै अमरे अर जुधा करनै जोगी थिऐ।
युसुफे खिंबा का मनिश्शे गोत्रे आद-लुआद निखल़ै सोभी टोली दी पठी गणी करै 32,200 मर्ध ज़ुंण बिहा साला का उझै अमरे अर जुधा करनै जोगी थिऐ।
बिन्यामीन गोत्रे आद-लुआद निखल़ै सोभी टोली दी पठी गणी करै 35,400 मर्ध ज़ुंण बिहा साला का उझै अमरे अर जुधा करनै जोगी थिऐ।
दान गोत्रे आद-लुआद निखल़ै सोभी टोली दी पठी गणी करै 62,700 मर्ध ज़ुंण बिहा साला का उझै अमरे अर जुधा करनै जोगी थिऐ।
आशेर गोत्रे आद-लुआद निखल़ै सोभी टोली दी पठी गणी करै 41,500 मर्ध ज़ुंण बिहा साला का उझै अमरे अर जुधा करनै जोगी थिऐ।
नप्ताली गोत्रे आद-लुआद निखल़ै सोभी टोली दी पठी गणी करै 53,400 मर्ध ज़ुंण बिहा साला का उझै अमरे अर जुधा करनै जोगी थिऐ।
इहअ करै मोसा, हारण अर इज़राईले बारा सैणैं ज़ुंण आपणैं-आपणैं दादा-बाबे टोली दी सैणैं थिऐ, तिन्नैं किई सोभिए गणांई। ज़ेतरै मर्ध तिन्नें टोली अर खिंबा का बिहा या बिहा साला का उझै अमरे अर ज़ुंण जुध सका तै करी तिंयां गणै सोभ। गैरा गोत्रे आद-लुआद निखल़ै सोभी टोली दी पठी गणी करै 603,550 मर्ध ज़ुंण जुधा करनै जोगी थिऐ।
लेबी गोत्रे आद-लुआद डाहै ज़ुदै
इना मांझ़ै निं लेबी गोत्रे कोही टोलीए का जुधा करना लै मणछ गणै। किल्हैकि बिधाता थिअ मोसा का इहअ डाहअ द बोली, “लेबी गोत्रे गणांई निं इज़राईली संघै करी, पर तूह बणाऐं लेबी शाजतीए खिम्भा अर तेते सोभी च़िज़े सैणैं अर तेते सारै समाना संघी दैऐ तेता तिन्नां ई का च़कणै अर खिम्भा फेर दैऐ तिन्नां ई डेरअ पाणै अर तेते च़ाकरी करने ज़िम्मैंबारी बी सभाल़ै तिन्नां ई लै।
“ज़ेभै-ज़ेभै खिम्भ आजू निंणअ, तेभै सका लेबी तेता ढोल़ी अर ज़ेभै-ज़ेभै सह बसेरअ खल़अ करनअ होए, तेभै करै लेबी तेता खल़ै। ज़ै कुंण होर तेता नेल़ डेओए, तेऊ पाऐ मारी। इज़राईली पाऐ आपणैं डेरै आपणीं टोलीए खिम्भा दी आपणैं-आपणैं फ्रहरे सेटा, पर लेबी पाऐ आपणैं डेरै शाजतीए खिम्भा फेर, किधी इहअ निं होए कि इज़राईलीए सोभी टोली लै मेरअ कोप पल़े। लेबी गोत्रे लोग करै शाजतीए खिम्भे फाज़त।”
ज़िहअ-ज़िहअ बिधाता मोसा का हुकम किअ, इज़राईली किई तिंयां गल्ला तेही ई।
Source notes (2)
- Cross-reference गण. 26:1-51
- Footnote सैणैं टोलीओ सैणअ
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.