Kulvi Outer Seraji Bible
गणांई 2
डेरै खल़ै करनैओ बधान
तेखअ बोलअ बिधाता मोसा अर हारणा का इहअ, “सोभै इज़राईली टोली करै मेल़-ज़ोल़े खिम्भा नेल़ आपणैं-आपणैं फ्रहरै अर आपणैं-आपणैं दादा-बाबे खिंबे नछ़ैणा नेल़ आपणैं खिम्भा खल़ै।
“पुर्बा दिशा बाखा ज़िधा का धैल़अ निखल़ा तेथ बाखा करै यहूदे खिम्भा आल़ै आपणअ फ्रहरअ खल़अ अर तिन्नें सारी टोलीओ सैणअ हणअ अमीनादाबो शोहरू नहशोन, तिन्नें टोलीए दला दी आसा पठी 74,600 मर्ध गणै दै। तिन्नां नेल़ करै इस्साकार गोत्रे लोग डेरै खल़ै अर तिन्नें सारी टोलीओ सैणअ हणअ सोहारो शोहरू नतनेल। तिन्नें सारी टोलीए दला दी ज़ुंण जुधा करनै आल़ै मर्ध आसा गणै दै, तिंयां आसा 54,400 मर्ध। तिन्नां नेल़ रहै ज़बलून गोत्रे लोग अर तिन्नें सोभी टोलीओ सैणअ हणअ हेलोनो शोहरू एलीआब तिन्नें टोलीए दला दी आसा 57,400 मर्ध गणै दै। एऊ साबै ज़ेतरै बी यहूदे खिम्भे दला दी ज़ेतरै बी आपणैं-आपणैं दले साबै गणै, तिंयां आसा 86,400 मर्ध। ईंयां डेओऐ जुधा लै सोभी का आजी।
“दखण दिशा बाखा रहै रूबेन गोत्रे खिम्भे फ्रहरै आल़ै आपणैं-आपणैं दले साबै। तिन्नों सैणअ हणअ शदेऊरो शोहरू एलीसूर अर तिन्नें दला दी ज़ुंण मर्ध आसा गणै दै, तिंयां आसा 46,500 मर्ध। तिन्नां नेल़ करै शमौने गोत्रा आल़ै आपणैं डेरै खल़ै, अर तिन्नों सैणअ हणअ शूरीशदाईओ शोहरू शलूमीएल। अर तिन्नें दला दी ज़ुंण मर्ध आसा गणै दै, तिंयां आसा 59,300 मर्ध। तेता बाद रहै तिन्नां नेल़ गाद गोत्रे लोग अर तिन्नों सैणअ हणअ रूएलो शोहरू एल्यासाप। अर तिन्नें दला दी ज़ुंण मर्ध आसा गणै दै, तिंयां आसा 35,650 मर्ध। रूबेने खिम्भा दी ज़ेतरै आपणैं-आपणैं दले साबै गणै तिंयां थिऐ सोभै 1,41450 मर्ध। ईंयां हांढै यहूदा बाद जुधा लै।
“इना पिछ़ू अर सोभी दले खिम्भे टोली मांझ़ा-मांझ़ी लोल़ी लेबी मेल़-ज़ोल़े खिम्भा संघै हांढदै लागै, ज़ेऊ साबै तिंयां एकी लगैगा दी डेरै खल़ै करा, तेऊ ई साबै लागै तिंयां आपणीं-आपणीं ज़ैगा आपणैं फ्रहरै संघै नेल़-नेल़ रही हांढदै।
“पछ़मा बाखा रहै एप्रैमे खिम्भे फ्रहरै आल़ै लोग आपणीं-आपणीं टोलीए साबै अर तिन्नों सैणअ हणअ अमीहूदो शोहरू एलीशामा। तिन्नें टोली दी आसा 40,500 मर्ध। तिन्नां नेल़ रहै मनिश्शे गोत्रा आल़ै अर तिन्नें सारी टोलीओ सैणअ हणअ पदासूरो शोहरू गमलिएल। तिन्नें टोलीए दला दी आसा 32,200 मर्ध गणै दै। तेता बाद रहै बिन्यामीन गोत्रा आल़ै अर तिन्नों सैणअ हणअ गिदोनीओ शोहरू अबीदान, तिन्नें टोली दी आसा 35,400 मर्ध गणै दै। एप्रैमे खिम्भे दला दी ज़ेतरै आपणीं-आपणीं टोलीए साबै गणै, तिंयां सोभै थिऐ 1,8100 मर्ध। चिऊथी हेल़्ही दी हांढै तिंयां जुधा लै।
“उतर दिशा बाखा रहै दाने खिम्भे फ्रहरै आल़ै आपणीं-आपणीं टोलीए साबै अर तिन्नों सैणअ हणअ अम्मीशदाईओ शोहरू आहीजेर, तिन्नें दला दी ज़ुंण मर्ध आसा गणै दै, तिंयां आसा 62,700 मर्ध। तिन्नां नेल़ पाऐ आशेर गोत्रा आल़ै डेरै अर तिन्नों सैणअ हणअ ओक्रानो शोहरू पगीएल। तिन्नें दला दी ज़ुंण मर्ध आसा गणै दै, तिंयां आसा 31,500 मर्ध। तेता बाद रहै नप्तालीए गोत्रा आल़ै अर तिन्नों सैणअ हणअ एनानो शोहरू अहीरा। तिन्नें दला दी ज़ुंण मर्ध आसा गणै दै, तिंयां आसा 53,400 मर्ध। दाने दला दी ज़ेतरै मर्ध गणै, तिंयां सोभै आसा 1,57600 अर ईंयां हांढा आपणैं फ्रहरै नेल़-नेल़ सोभी का पिछ़ू।”
इज़राईली मांझ़ै ज़ुंण आपणैं-आपणैं दादा-बाबे खिंबे साबै गणै, तिंयां आसा ईंयां ई। सोभी खिम्भे टोली ज़ेतरै मणछ गणै, तिंयां थिऐ सोभै ज़ोल़ी करै 6,3550 मर्ध। पर ज़िहअ बिधाता मोसा लै हुकम किअ त, तेते साबै निं लेबी खिंबे मर्ध इज़राईली मांझ़ै गणै आथी।
ज़िहअ हुकम बिधाता मोसा लै किअ त, इज़राईली पाआ तै तेते ई साबै आपणैं-आपणैं खिंब, अर दादा-बाबे टोलीए साबै आपणैं-आपणैं फ्रहरै नेल़ डेरै अर जुधा लै बी हांढा तै तिहै ई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.