गणांई 3

हारणे शोहरू

1ज़धू बिधाता सीनाई धारा1 मोसा संघै गल्‍ला किई, तधू थिऐ हारणे खिंबा दी एतरै ज़ण्हैं: 2हारणे थिऐ च़ार शोहरू, सोभी का ज़ेठअ थिअ नादाब अर तेऊ का कान्हैं थिऐ चअन भाऊ अबीहू, एलीआजर अर ईतामार।2 3हारणे शोहरू तै अभिषेक किऐ दै प्रोहत अर तिन्‍नों संस्कार थिअ प्रोहते कामां करना लै हुअ द।

लेबी गोत्रे ज़िम्मैंबारी

4पर बिधाता पाऐ नादाब अर अबीहू सीनाई धारे शुन्‍नैं रेगीस्तानै मारी। किल्हैकि तिन्‍नैं किई ती बिधाता लै एही आग भैंट ज़ेता बिधाता नांईं मंदअ त। तिन्‍नें नांईं ती आजू आद-लुआद आथी, इहअ करै रहै आजू एलीआजर अर ईतामार आपणैं बाब हारणे ज़ैगा प्रोहते काम काज़ करदै लागी।3

5बिधाता बोलअ मोसा लै इहअ, 6“लेबी गोत्रे टोली आण हारण प्रोहता सेटा ताकि तिंयां तेऊए मज़त करे। 7ज़ुंण बी काम हारण तिन्‍नां का सभाल़े तेते हेर-सभाल़ रहै तिंयां सोभी इज़राईली टोलीए तैणीं मेल़-ज़ोल़े खिम्भा दी करदै लागी। 8लेबी करै मेल़-ज़ोल़ आल़ै खिम्भे सोभी समाने अर इज़राईली लै सभाल़ी दी सोभी च़िज़े हेर-सभाल़, एऊ ई साबै करे तिंयां मेरै मेल़-ज़ोल़े खिम्भा दी च़ाकरी। 9लेबी मणछा सभाल़ हारण अर तेऊए शोहरूए मज़त करना लै। 10हारण अर तेऊए शोहरू लै दै प्रोहते पदबी, ज़ै कुंण होर प्रोहत हणअ च़ाहे, तेऊ पाऐ मारी।”

11तेखअ बोलअ बिधाता मोसा लै, 12“शुण, मंऐं छ़ांटै सोभी इज़राईली मांझ़ै आप्पू लै लेबी तिंयां हणैं मेरै खास। 13ज़धू मंऐं बिधाता मिसरीए ज़ेठै शोहरू अर पैहलै सोए नर पशू मारी पाऐ तै, तधू बच़ारी ती मंऐं अह गल्‍ल कि इज़राईलीए सोभ ज़ेठै मणछ अर डागै-धणे पैहलै सोए नर पशू आसा मेरै। पर ऐबै मनै मंऐं इज़राईलीए ज़ेठे ज़ैगा लेबी खिंबे मणछ आप्पू लै पबित्र।”4

लेबी गोत्रे गणांई

14तेखअ बोलअ बिधाता सीनाई धारे शुन्‍नैं रेगीस्तानै मोसा का इहअ, 15“ऐबै च़ाहा हुंह इहअ तूह गण लेबी गोत्रे लान्हैं उझै प्रोढै तैणीं बेटल़ी छ़ाडी सोभी मणछा तिन्‍नें दादा-बाबे खिंब अर टोलीए साबै।” 16ज़िहअ बिधाता बोलअ त मोसा गणै तेऊ ई साबै तिंयां सोभ।

17लेबीए शोहरूए नाअं थिऐ, गर्शोन, कहात अर मरारी। 18गर्शोने शोहरू थिऐ लिब्नी अर शिमी। 19कहाते शोहरू थिऐ अमराम, इसहार, हेब्रोन अर उज्जीएल। 20मरारीए थिऐ आजू महली अर मूशी। ईंयां थिऐ लेबीए आजू आद-लुआद अर इना ई का च़लै आजू लेबी गोत्रे ज़ुदै-ज़ुदै खिंब।

21गर्शोने बणी आजू दूई टोली लिब्ना अर शिमी, 22इने टोली दी थिऐ गणी करै होछ़ै का बडै तैणीं 7,500 मर्ध अर लान्हैं। 23गर्शोनी टोली आल़ै पाऐ मेल़-ज़ोल़े खिम्भे पछ़मा बाखा डेरै, 24अर तिन्‍नों मूल़ सैणअ बणअ लीलो शोहरू एल्यासाप। 25तिन्‍नों काम थिअ मेल़-ज़ोल़े खिम्भा दी बागा भितरा संघी खिम्भे हेर-भाल़ करनी, खिम्भे प्रऊल़ीए पल्दै, 26बाघली ताटी छ़ड़ाऊऐ दै पल्दै, बेदी फेर अर तेथ लागै दै पल्दै अर तेते दुआरे पल्दै अर तिंयां सोभ ज़ेऊल़ै ज़ुंण तेता लाणा लै लागा तै, तिन्‍नां सोभिए हेर-सभाल़ करनी।

27कहाते बणी च़ार टोली, अमरामी, इसहारी, हेब्रोनी, अर उज्जीएली। 28इने टोली दी थिऐ गणी करै होछ़ै का बडै तैणीं 8,600 मर्ध अर लान्हैं। 29कहातीए टोली पाऐ बिधाते मेल़-ज़ोल़े खिम्भे दखणा बाखा आपणैं डेरै। 30कहाती खिंबो मूल़ सैणअ हुअ उज्जीएलो शोहरू एलीसापान। 31तिन्‍नें ज़िम्मैंबारी थिई मणशू, पलग, सदीअ, बेदी अर पबित्र ज़ैगा च़ाकरी करनैओ सारअ समान, पबित्र ज़ैगा सम्हनेओ पल्दअ लाणअ अर काढणअ।

32हारण प्रोहतो शोहरू एलीआजर लोल़ी हुअ लेबी खिंबे सोभी सैणैं प्रैंदै प्रधान अर ज़हा-ज़हा का पबित्र ज़ैगो काम आसा सभाल़अ द, तिन्‍नों सैणअ बी लोल़ी सह ई हुअ।

33मरारी का हुई आजू दूई टोली महली अर मूशी। 34इने टोली दी थिऐ गणी करै होछ़ै का बडै तैणीं 6,200 मर्ध अर लान्हैं। 35मरारी खिंबो मूल़ सैणअ मणछ हणअ अबिहेलो शोहरू सुरीएल, ईंयां पाऐ पबित्र ज़ैगे उतर दिशा बाखा आपणैं डेरै। 36ज़ुंण च़िज़ा मरारी खिंबा आल़ै लै सभाल़णीं तिंयां आसा, बिधाते मेल़-ज़ोल़े खिम्भे चकाठी, थुम्हणीं, थाम्ह, खुर्शी अर सारअ समान ज़ुंण तेथ कामैं एछा, 37अर ताटी च़ऊ बाखे थाम्ह अर तेते खुर्शी, खुंढै अर राशीए ज़िम्मैंबारी।

38मेल़-ज़ोल़े खिम्भा मतलब बिधाते मेल़-ज़ोल़े खिम्भा सम्हनै पुर्बा दिशा बाखा पाऐ मोसा हारण अर तिन्‍नें शोहरू डेरै अर इज़राईलीए बदल़ै करै पबित्र ज़ैगे हेर-सभाल़, ज़ै कुंण होर तेता नेल़ डेओए, तेऊ पाऐ मारी।

39बिधातो हुकम शूणीं गणै मोसा अर हारणै लेबी खिंबे सोभी टोली दी होछ़ै का बडै तैणीं अर तिंयां सोभै थिऐ 22,000 मर्ध अर लान्हैं।

ज़ेठी ज़ैगा भेटी लेबी लै

40तेखअ बोलअ बिधाता मोसा का, “ज़ेतरै बी इज़राईलीए टोली दी होछ़ै का प्रोढै तैणीं ज़ेठै आसा तिन्‍नां सोभी गण तिन्‍नें नाअं बोली। 41तिंयां सोभै आसा मुंह बिधाते, पर मंऐं मनै तिन्‍नां सोभिए बदल़ै ऐबै लेबी, मुंह मनणै ऐबै इज़राईलीए पैहलै सोए नर पशूए बदल़ै लेबीए पशू।”

42ज़िहअ बिधाता मोसा बोलअ तिहै ई गणै तेऊ इज़राईलीए सोभ ज़ेठै मणछ। 43होछ़ै का प्रोढै तैणीं निखल़ै तिंयां 22,273 मर्ध अर लान्हैं।

44तेखअ बोलअ बिधाता मोसा लै इहअ, 45“लेबी आसा ऐबै मेरै अर तिंयां आसा ऐबै इज़राईलीए सोभी ज़ेठे मणछे बदल़ै अर तिन्‍नें पशू हणैं ऐबै इज़राईलीए सोभी पैहलै सोए नर पशूए ज़ैगा। 46पर इज़राईली मांझ़ै आसा अज़ी बी गणांई दी लेबी का खास्सै ज़ेठै मर्ध अर लान्हैं, बाकी 273 मर्ध अर लान्हैं आसा अज़ी बी मुल्है आणना लै बाकी। 47हरेकीए बदल़ै दैऐ तूह पबित्र ज़ैगे च़लणें साबै पांज़ च़ंदीए सिक्‍कै। 48इना ढब्बै दैऐ तूह हारण अर तेऊए शोहरू लै ज़रूरी।”

49मोसा किऐ 273 ज़ेठै मर्ध अर लान्हैं का च़ंदीए सिक्‍कै कठा, 50तिंयां हुऐ 1,365 च़ंदीए सिक्‍कै ज़ेतो च़लण पबित्र ज़ैगा थिअ। 51तेखअ दैनै मोसा तिंयां च़ंदीए सिक्‍कै5 हारण अर तेऊए शोहरू लै, ज़िहअ बिधाता हुकम किअ त।