Kulvi Outer Seraji Bible
गणांई 13
कनान देशो भेख लंदै बारा मणछ
तेखअ बोलअ बिधाता मोसा लै, “कनान देश ज़ुंण मुंह इज़राईली लै दैणअ, तेऊ देशो भेख लणा लै छ़ांट मणछ, हर गोत्रे सैणैं मांझ़ै छ़ांटै एक-एक मणछ।”
बिधाता ज़िहअ हुकम दैनअ त, तिहअ ई मनी छ़ाडै मोसा सोभी इज़राईली मांझ़ै सैणैं मणछ परान रेगीस्ताना का कनान देशे भेख लंदै।
इज़राईले बारा गोत्रा का कनान देशे भेख लणैं आल़ै तै:
रूबेन गोत्रा का जक्कूरो शोहरू शम्मू,
शमौन गोत्रा का हूरीओ शोहरू शापात,
यहूदा गोत्रा का यपुन्नेंओ शोहरू कालेब,
इस्साकार गोत्रा का युसुफो शोहरू ईगाल,
एप्रैम गोत्रा का नूनो शोहरू होशे,
बिन्यामीन गोत्रा का रापूओ शोहरू पलती,
ज़बलून गोत्रा का सोदीओ शोहरू गदेल,
युसुफे खिंबा दी मनिश्शे गोत्रा का सूसीओ शोहरू गाद्दी,
दान गोत्रा का गमलीओ शोहरू अमीएल,
आशेर गोत्रा का मिकाईलो शोहरू सतूर,
नप्ताली गोत्रा का बोप्सीओ शोहरू नहूबी अर
गाद गोत्रा का माकीओ शोहरू गूएल।
ज़ुंण मणछ मोसा तेऊ देशे भेख लणा लै छ़ाडै, तिंयां थिऐ ईंयां ई मणछ। नूने शोहरू होशे नाअं डाहअ मोसा ज़ैहसू। कनान देशे भेख लणा लै ज़ांऊं मोसा तिंयां छ़ाडै, मोसा बोलअ तिन्नां लै कि इधा का डेओआ दखण रेगीस्ताना बाती। संघा भाल़ै धारा बाखे मुल्खा बाती डेऊई तेऊ देशा कि तेथ किहअ मुल्ख आसा। संघा भाल़ै इहअ बी कि तेऊ देशै केतरै लोग आसा अर तिंयां केतरै जोधै आसा। इहअ बी भाल़ै कि तेऊ देशे लोगो रहणअ बस्सणअ किहअ आसा। तिन्नें नगरी फेर खुल्हअ आसा कि फेर-फिरदै गहल़ आसा च़िणैं दै? अर इहअ बी भाल़ै कि ज़िम्मीं रज़दी-पज़दी आसा कि नांईं अर तेथ किहै-किहै डाल़ बूट आसा। अह बगत आसा दाखा पाकणेंओ, तेऊ देशा का करै भाल़णा लै धख भाग पज़ैआ मांझ़ै आणने कोशिश।
इना गल्ला शूणीं लागै तिंयां हांढदै। हमाते बाता डेऊऐ तिंयां सीन नाओंए रेगीस्ताना बाती रहोब नगरी तैणीं, सह सारअ देश भाल़ी लई तिन्नें तेऊ देशे सारी भेख। दखणा बाती डेओए तिंयां हेब्रोन नगरी तैणीं, तिधी रहा तै आहीमान, शेशै अर तलमाई नाओंए अनाक खिंबे लोग। हेब्रोन नगरी थिई मिसर देशे नगरी सोआना का साता साला पैहलै गई दी बस्सी। तेखअ डेऊऐ तिंयां एशकोल नाओंए नाल़ा तैणीं। तिधा का आणी तिन्नैं एक दाखे शाण्हटी तेते लुम्बरा संघी चोल़ी। सह आणी दूई मणछै डांगा दी बान्हीं आजू-पिछ़ू कान्हा च़की। नारदाणैं अर फेडू मांझ़ै बी आणै तिन्नैं धख-धख चोल़ी। ज़ुंण दाखे लुम्बर तिन्नैं इज़राईली तिधा का आणै तै, तेता करै पल़अ तैहा ज़ैगो नाअं एशकोल नाल़। च़ाल़्ही धैल़ै बाद पुजै तिंयां तेऊ देशो भेख लई, परान रेगीस्तानै कादेश नाओंए नगरी दी मोसा, हारण अर होरी सोभी इज़राईली टोली सेटा बापस फिरी। सोभै गल्ला खोज़ी तिन्नैं तिन्नां का संघा रहैऊऐ तेऊ देशा का आणै दै फल़।
तिन्नैं खोज़ी सारी गल्ला इहअ बोली, “ज़ेऊ देशा लै तंऐं हाम्हैं छ़ाडै तै, हाम्हैं आऐ तिधा का हांढी, तेऊ देशे ज़िम्मीं आसा सच्च़ी रज़दी-पज़दी। ईंयां फल़ आसा हाम्हैं तेता मांझ़ै रहैऊंणा लै आणै दै। पर तिधे रहणैं आल़ै लोग आसा ज़बर ज़ोरा आल़ै अर तिन्नें बडी-बडी नगरी फेर आसा बडै-बडै उछ़टै गहल़ च़िणैं दै। तेखअ भाल़ै हाम्हैं तिधी अनाक खिंबे लोग बी। दखण रेगीस्ताना बाखा आसा अमोलकी बस्सै दै, अर धारा बाखे मुल्खै आसा हित्ती, जबेशी अर अमोरी बस्सै दै। समुंदरे बाढै जरदण नदी नेल़ आसा कनानी बस्सै दै।”
लोग लागै मोसा लै नांह करी बोल्दै, पर कालेबै किऐ तिंयां इहअ बोली च़ुप्पी, “हाम्हां करनअ तेऊ देशै डेऊई जुध संघा गिम्मणअ सह देश हाम्हां आप्पू लै, किल्हैकि इहअ करनै जोगी बल आसा हाम्हां का।”
पर ज़ुंण मणछ तेऊ संघै भेख लंदै तै डेऊऐ दै तिन्नैं बोलअ, “तिन्नां मणछा संघै जुधा करने तागत निं हाम्हां का आथी, किल्हैकि तिंयां आसा हाम्हां का ज़ादै ज़ोरा आल़ै।”
तिंयां लागै होरी इज़राईली सेटा इहअ बोली होर बी हुधदै, “ज़ेऊ देशो भेख लंदै हाम्हैं डेऊऐ तै, तेऊ देशै निं किछ़ै पज़दअ अर लोग आसा बडै-बडै दैंत्तर मर्ध। होर ता होर, तिधी भाल़ै हाम्हैं नपीली ज़ाती आल़ै अनाक खिंबे दैन्तर मणछ बी अर हाम्हैं आसा तिन्नां सम्हनै रैट्टै ज़िहै होछ़ै।”1
Source notes (1)
- Cross-reference मूल. 6:4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.