ईशायाह

ईशायाह

ईशायाह गूरै खोज़ी दी गल्‍ला ज़ुंण आजू निभणी

भेत

लिखणैं आल़अ: ईशायाह

सन: 740 का 680 ईसा आजी

ईशायाह किई यहूदा देशे राज़ेए ज़मानै बिधाता संघै गल्‍ला। तेऊ ज़मानै त च़ाल़्ही साला तैणीं अश्शूरी राज़अ आपणैं राज़ा बढेरदअ लागअ द। कई देश हुऐ अश्शूरी राज़ै संघै मकाबलै करदै कठा, पर खिरी किअ अश्शूरी राज़ै इज़राईल देशै अर ओर्ही-पोर्ही होरी देशा दी कबज़अ। तिन्‍नां देशा का निंयैं हज़ारो मणछ कैद करी, पर यहूदा देशा दी नांईं त पठी कबज़अ हुअ पर तिन्‍नां लै लाअ अश्शूरी राज़ै खास्सअ कारअ।

ऐहा कताबा दी एकी का उन्ताल़ी धैऊआ तैणीं खोज़ा ईशायाह गूर खासकर इहअ कि बिधाता किहअ पबित्र आसा अर सह सारै संसारा प्रैंदै किहअ करा राज़ै ज़िहअ राज़। पबित्र राज़ै बिधाता आई यहूदा देशे परज़ा लै रोश्शै ज़ुंण तिन्‍नैं पाप किअ त, तिन्‍नें सरकारी अफसर तै भ्रष्ट हुऐ दै, हर ज़ैगा ती काट-मार अर नसाफ निं किधी भेटदअ त। बिधाता बोलअ इहअ कि तेऊ तिन्‍नां लै अश्शूरी अर बाबेल देशे राज़ै का यहूदा देशे परज़ा सज़ा बझ़ैल़ी दैणैं। पर दैनअ आपणीं परज़ा लै इहअ हैअ कि, ज़ै कधू आजू तिंयां बिधाता बाखा फिरे अर भरोस्सअ करे, तै जाणैं तिंयां बच़ी।

ऐहा कताबा दी आसा च़ाल़्ही का पजुंजा धैऊआ दी लिखअ द कि बिधाता खोज़अ तिन्‍नां लोगे बारै ज़हा सज़ा भेटी। तिन्‍नों त हैअ चुटी गअ द पर बिधाता दैनी तिन्‍नां लै आशा, पर बिधाता च़ाहा त इहअ कि तिन्‍नां का थोघ लागे कि मुहुर्ती, मैहरै दी निं शगती आथी असली परमेशर सह आसा एक्‍कै। ज़ै इज़राईली परज़ा तेऊ बाखा फिरे, तै हेरनै तेऊ तिंयां बाबेल देशे गलामी का अर तिन्‍नां होरी देशा मांझ़ा का बच़ाऊई काढी ज़ेथ तिंयां ज़ैगै-ज़ैगै छिंघुऐ दै आसा तै। बिधाता डाही तिन्‍नां लै महान करार कि तिंयां एछणैं आपणैं देश अर आपणीं ज़ैगा लै फिरी अर तेऊ दैणीं तिन्‍नां लै बर्गत अर तिंयां करनै तेऊ सफल।

ऐहा कताबे खिरीए धैअ छपुंजा का छाहठ धैऊआ दी करा बिधाता एही करार कि आजू हणअ तिन्‍नों भलअ ई भलअ खासकर तिन्‍नों ज़ुंण बिधाता लै भरोस्सैमंद आसा, तिंयां च़ाऐ यहूदा देशे परज़ा का सुआई होर बी किल्है निं होए। एता करै खुल्ही होरी लै बी एही बात कि तिंयां सका बिधाते परज़ा बणी अर आजू हणअ एक नऊंअ संसार ज़ेथ सोभ खुश हणैं अर दुख-तकलिफी का दूर:

“मुंह बणाईं नऊंईं पृथूई अर नऊंअ भ्रमंड। ज़ुंण बी एता आजी आसा ती, तिंयां बिस्सर्नी पठी। खुश हआ अर सदा करा नंद। ज़ुंण नऊंअ एरुशलेम मुंह बणाणअं, तेथ हणीं नंद अर तैहा नगरीए लोग रहणैं सोभ खुश। हुंह बी हणअ एरुशलेम नगरी अर तेते परज़ा करै खुश। तेथ निं तेखअ कधि लेर-पकार अर दुख-तकलिफी हणीं।”

(65:17-19)

कताबे बांड

यहूदा देशे बारै 1:1—12:6

पराई ज़ातीए बारै 13:1—23:18

दाह-दुख 24:1—27:13

इज़राईल अर यहूदा 28:1—35:10

हिजकिया अर ईशायाह गूरो इतिहास 36:1—38:22

बाबेल देशे बारै 39:1—47:15

परमेशरे मेल़-ज़ोल़ करने सोठ 48:1—66:24