Kulvi Outer Seraji Bible
ईशायाह 27
लिबतान1 नाओं समुंदरो बडअ ज़ीब लागअ तैहा सज़ा दैणें धैल़ी बच़णा लै लरुगदअ अर ठुहर्दअ, पर बिधाता पाणअ सह बडअ शपैल़ आपणीं तिछी अर महान शगती आल़ी तलबारा करै मारी।
तैहा धैल़ी बोल़णअ बिधाता आपणैं शोभलै दाखे बागा लै इहअ, “मुंह बिधाता करनअ एऊ बागो हाल़्हअ-पहरअ अर एथ रहणअ मुंह पाणीं दैंदै लागी, मुंह करनीं एते धैल़-राच फाज़त कि दुशमण एथ नकसान नां करे। एऊ बागा लै निं मुंह ऐबै रोश्श करनै। ज़ै एथ कांडै-रिंडे झ़ाकल़ पज़े, मुंह काटणै तिंयां पोर्ही संघा चैल़णीं तेथ आग। ज़ै मेरी परज़े दुशमण मेल़-ज़ोल़ करनअ च़ाहे, तिन्नां दैणअ मुंह आप्पू सेटा शरण लणैं।
“एक धैल़ी एछणी एही कि इज़राईली परज़ा दी याकबे आद-लुआदा मांझ़ै टिर्खणी टीर अर तेथ लागणै बझ़ी करै खील-फूल। तेता का पज़ै दै फल़ा करै भर्हनीं सारी धरती।
“मंऐं बिधाता निं इज़राईली लै तेही सज़ा दैनी ज़ेही मंऐं तिन्नें दुशमणा लै सज़ा दैई तिंयां ज़ात पठी मारी पाऐ। इज़राईली लै सज़ा ती एही कि मंऐं दैनअ तिन्नां संघै जुध हणैं संघा दैनअ तिन्नां आपणअ देश छ़ाडी गलामी दी डेऊणैं। मेरै रोश्शै काढै तिंयां पुर्बा बाखा लागी दी ढिश-बागरी ज़िहै दूर फर्ल़ाऊई। याकबे आद-लुआदे पाप-दोशो प्राश्त सका सिधी एकी गल्ला करै हई कि तिंयां पराऐ देबतै लै बणाईं दी बेदीए पात्थरो च़ुन्नें पात्थरा ज़िहै फाल़ी तेतो छ़ार बणाऐं अर आजू कधि बी तेही बेदी नांईं बणाऐं अर अशेरा देबीए डौंड खल़ै नांईं करे।”2
गहल़ा आल़ी नगरी3 हुई मणछा बाझ़ी शुन्नीं, तिंयां हुई रेगीस्ताना ज़ेही उज़र। तिंयां नगरी हुई डागै-भेडा च़ारना लै बण अर बाछ़ू लै जगैल़ करने ज़ैगा। ज़ेभै डाल़ा-बूटे शाण्हीं शुक्की धरनीं अल़ा, बेटल़ी निंयां तेता झ़ुका लै झाल़ी। पर लोग आसा इहै कमुर्ख कि तिन्नां निं समझ़ ई एछदी कि ज़ुंणीं परमेशरै तिंयां बणाऐं दै आसा, तेऊ निं तिन्नां लै किछ़ झींण लाई करी।
एक धैल़ी एछणी एही कि बिधाता करनीं आपणीं इज़राईली परज़ा होरी लोगा का ज़ुदी। तेऊ झाल़णैं एक-एक इज़राईली सोभ। तेऊ करनै तिंयां एप्रात दरैऊआ पोर्ही मिसर देशे सिऊंआं तैणीं ज़ुदै ज़िहअ शूपा दी फल़ाक्की घाह कसार पोर्ही काढी नाज़ टाल़ा।
ज़ेभै ईंयां धैल़ै एछणैं, तेभै बाज़णअ नर्शिंगअ, कि तेता शूणीं तिंयां इज़राईली बापस फिरी एछे ज़ुंण अश्शूर अर मिसर देशै गलामी दी आसा। तेखअ एछणअ तिन्नां एरुशलेम नगरी लै फिरी संघा टेक्कणअ तिधी पबित्र धारा बिधाता सेटा माथअ।4
Source notes (4)
- Cross-reference लिबतान ईशा. 23:4; 30:7
- Cross-reference रोम. 11:27
- Cross-reference गहल़ा आल़ी नगरी ईशा. 25:2
- Cross-reference मोत्त. 24:31
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.