ईशायाह 19

बिधाता दैणीं मिसर देशा लै सज़ा

1मिसर देशा लै आसा इहअ समाद खोज़अ द कि बिधाता एछणअ सोभी का छ़ेक्‍कै ठुर्हनै आल़ै बादल़ा प्रैंदै शुंआर हई मिसर देशा लै।

मिसरी लोगे देअए मुहुर्ती छ़ुटअ बिधाते डरै दर्छ़णअ अर मिसरी लोगा निं हैल़ी-हांस ई रहअ।1 2बिधाता बोला इहअ, “मुंह डाहणैं मिसरी आप्पू मांझ़ै काठदै-मारदै लाई, भाई-भाई अर गरांईं हणैं आप्पू मांझ़ै च़िखदै लागै दै। मिसर देशे नगरी-नगरी अर देशा-देशा छ़ेल़णअ एकी-दुजै संघै जुध। 3ज़ुंण मिसरी सोठी आसा डाहअ द, तिन्‍नां गल्‍ला दी पाणअ मुंह झाख अर तिन्‍नां हारनी खिरी हिम्मत ई। तिंयां डेऊणैं आपणैं देअआ मुहुर्ती, च़ेल्‍लै अर मणशाण झ़ैऊंणै आल़ै पुछ़दै। 4पर मुंह पाणै मिसरी एकी नर्दैई अर कदुष्ट राज़ेए बशै। हुंह आसा स्वर्गे सारी सैनो मालक बिधाता, मंऐं डाही ईंयां गल्‍ला बोली।”2

5तेखअ शुक्‍कणअ नील नदीओ पाणीं पठी, सह हणीं शुक्‍की ज़ैगा ज़ेही। 6मिसर देशे होर गाडा नाल़ी बी शुक्‍कणीं पठी अर तेथ बी लागणीं बास्स-चजैन्ह अर तेते बाढै लागअ द कछैरो घाह अर नगाल़ै शुक्‍कणीं पठी। 7नील नदीए बाढा बाती खेच हणैं पठी बंज़र अर तेते सोभ डाल़-बूट शुक्‍कणैं पठी। 8ज़ुंण नील नदी का म्हाछ़ली ढाकी आपणअ ज़िऊंण करा तै, तिन्‍नां बी लागणीं लेरा-पकारा अर तिन्‍नें म्हाछ़ली ढाकणें कांडै अर ज़ज़ाल़ निं किछ़ू कामें रहणैं। 9ऊने झिकल़ै अर शल़ूईए मांदरी बुणनै आल़ैओ हैअ बी चुटणअ पठी। 10मिसर देशे बुणनै आल़ै अर ज़ाण-प्रबीण कारीगीरा लै बी पल़णअ दुख।

11सोआन नगरीए कार-करिंदै आसा ऐडै! मिसर देशे अक्ली आल़ै बज़ीरा बी दैणीं ऐडी सलाह! ऐबै निं तिंयां बोली सकदै कि तिंयां आसा अक्ली आल़ै, हाम्हैं आसा पैहलकै ज़मानें मशूर अक्ली आल़ै शास्त्री अर माहा राज़ेए आद-लुआद। 12मिसर देशे राज़ैआ! ऐबै किधी आसा तेरै तिंयां अक्लीए सलाह दैणैं आल़अ? झ़ाणीं तिंयां खोज़ी हेरे कि मिसर देशा लै स्वर्गे सारी सैने मालक बिधाता आजू किज़ै लाअ करी।3 13सोआन अर नोप नगरीए कार-करिंदै आसा कमुर्ख अर ठगणै आल़ै। मिसर देशो राज़अ अर परज़ा ती तिन्‍नें भरोस्सै पर तिन्‍नैं पाअ सारअ मिसर देश कबाता। 14बिधाता दैनअ इहअ हणैं कि तिंयां आपणीं सलाह करै मिसर देशै झाख पाए। एतो नतिज़अ निखल़अ इहअ कि मिसर देशै किऐ सोभ काम उंबल़ै अर तेऊ आसा शराबी ज़िहै धाक्‍कै फर्नैक्‍कै लागै दै अर सह आसा उल़्टी करदअ लागअ द। 15मिसर देशै निं कोह किछ़ करनै जोगी रहअ, नां सेठ नां गरीब, नां खास मणछ नां आम मणछ किज़ू करनै जोगी आथी।

मिसर देशा बी फिरनअ बिधाता बाखा

16एक बगत एछणअ इहअ कि मिसरी लोग हणैं बाख दुबल़ै। स्वर्गे सारी सैने मालक बिधाता ज़ांऊं सज़ा दैणा लै आपणीं बाह आजू करनी, तिन्‍नां छ़ुटणअ डरै दर्छ़णअ। 17यहूदा मुल्खा पाणीं मिसर देशा लै डअर। मिसरी लोगा छ़ुटणअ यहूदा मुल्खो नाअं शूणीं दर्छ़णअ। स्वर्गे सारी सैने मालक बिधाता आसा मिसर देशा लै इहअ ई करनअ सोठअ द।

18एक बगत एछणअ इहअ कि मिसर देशे पांज़ा नगरी दी हणीं कनान देशे इब्रानी बोली-भाषा। तेथ बस्सै दै लोगा खाणैं बिधाते नाओंऐं सोह। तिन्‍नां मांझ़ै पल़णअ एकी नगरी नाअं, “सुरज़पूर4।”

19ज़ेभै ईंयां धैल़ै एछे, मिसर देशै हणीं बिधाता लै एक बेदी अर मिसर देशे सिऊंआं दी हणअ बिधाता लै पात्थरो एक ओडअ खल़अ किअ द। 20सह हणअ नछ़ैण कि स्वर्गे सारी सैनो मालक बिधाता आसा मिसरी जैंदरी बी। ज़ेभै कुंण देश मिसर देशे लोगा हारदअ-मारदअ एछे, तेभै मांगणी मिसर देशे लोगा बिधाता सेटा अरज़ करी मज़त अर बिधाता हेरनअ कुंण नां कुंण तिन्‍नां बच़ाऊंदअ छ़ाडी। 21बिधाता हणअ मिसर देशे लोगा लै प्रगट अर तिन्‍नां बी समझ़णअ तेखअ कि बिधाते पूज़ा-गाज़ा लागा एही करनी। तिन्‍नां दैणैं तेखअ बिधाता लै भैंट अर बल़ीदान अर मानत बी डाहणीं तिन्‍नां बिधाता लै। 22बिधाता दैणीं मिसर देशा लै सज़ा ज़रूर, पर ज़ांऊं तिन्‍नां बिधाता बाखा फिरनअ अर तेऊ सेटा अरज़ करनीं, तेखअ करनै तिंयां तेऊ नरोगै।

23ज़ेभै अह बगत पुजे, तेभै हणीं मिसर देशा का अश्शूर देशा लै डेऊणा लै एक खुल्ही राज़ सल़क। इना दुही देशे लोग रहणैं ओर्ही पोर्ही एछदै नांहंदै लागी अर पूज़ा-गाज़ा बी करनीं इना दुही देशे लोगा कठा। 24ज़ेभै अह बगत पुजणअ, तेऊ ज़मानै डेऊणअ इज़राईल इना दुही देशे साथा अर तेखअ हणैं इज़राईल, मिसर अर अश्शूर ईंयां चअन देश सारै संसारा लै बर्गत। 25स्वर्गे सारी सैने मालक बिधाता दैणीं इना लै इहअ बोली बर्गत, “मिसरी आसा मेरी परज़ा, अश्शूरी आसा मंऐं बणाऐं दै अर इज़राईली आसा मंऐं आप्पू लै छ़ांटै दै।”