Kulvi Outer Seraji Bible
ईशायाह 18
कूश देशे बरैबादी
तैहा ज़ैगा लै भाल़ा केही आफ़त पल़णीं, ज़ेते किश्ती माहूँए गौणा ज़ेही आसा! अह ज़ैगा आसा कूश1 देशै गाडा पार। मिसर देश छ़ाडा तैहा ज़ैगा लै नील नदी का उझै कछैरे किश्ती दी। छ़ेक्कै ठुर्हनै आल़ै दूतो, तम्हैं डेओआ घअरा लै फिरी! तम्हैं डेओआ आपणैं लोगा सेटा ज़ुंण लाम्मै-पल़ामै अर हेरनै बित्तै आसा, ज़हा का पैहलै ओर्ही सोभ मणछ डरा, ज़ुंण शूरबीर जोधै आसा अर ज़सरी बोली-भाषा हाम्हां सोभी का होरी रंगे आसा अर ज़ुंण देश कई गाडा करै बांढुअ द आसा।
संसारे सोभ लोग दैआ धैन! तम्हैं सोभै शूणां ज़ुंण पृथूई दी आसा बस्सै दै! धारा हणअ एक जुधो फ्रहरअ खल़अ। तम्हां का जाणअ सह शुझुई। नर्शिंगै बाज़णें छ़ेल़ बी जाणीं तम्हां का शुण्हुंई। बिधाता बोला मुल्है इहअ, “मुंह रहणअ स्वर्ग आपणैं बसेरै का च़ुपच़ाप ज़ेठा-शाहल़े गरमीं दी ठांढै बादल़ा ज़िहै भाल़ै लागी।” ज़िहअ दाख चोल़णैं का आजी ज़ांऊं बेला दी फूल अल़ा अर दाख पाक्कदी लागा, बिधाता करनअ कूश देश पठी बरैबाद ज़ेही दाखे बेला दी लागी दी नऊंईं प्लीरा दाची करै लऊंणीं सान हआ। कूश देशे सैने ल्हासा हणीं काअ-गरली अर बणें ज़ीबा लै कज़िधल़ी पल़ी दी। काअ-गरली काटणै तिन्नां च़ोच़ल़दी-च़ोच़ल़दी गरमींए धैल़ै अर बणें ज़ीबा काटणअ तिन्नां खांदी-खांदी सारअ हिंऊंद।
ज़ेभै ईंयां धैल़ै एछे, तेभै आणनीं एऊ देशा का बिधाता लै भैंट ज़ुंण सोभी प्रैंदै राज़ करा। भैंट आणनीं तिन्नां कूश देशे मणछा ज़ुंण लाम्मै-पल़ामै अर हेरनै बित्तै आसा, ज़हा पैहलै ओर्ही सोभ लोग डरा, ज़ुंण शूरबीर जोधै आसा अर ज़सरी बोली-भाषा हाम्हां सोभी का होरी रंगे आसा अर ज़ुंण देश कई गाडा करै बांढुअ द आसा। तिंयां एछणैं सियोन 2धारा लै भैंट पजैल़ै ज़िधी स्वर्गे सारी सैने मालक बिधाते पूज़ा-गाज़ा हआ।
Source notes (2)
- Footnote कूश इथोपिया
- Footnote सियोन एरुशलेम
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.