Kulvi Outer Seraji Bible
ईशायाह 17
बिधाता दैणीं अरामी लै सज़ा
बिधाता खोज़अ इहअ, “दमिश्क नगरी हणीं पठी खतम, एथ रहणीं सिधी पात्थरे डिंगरी। अरोर नगरीए गराअं बी हणैं मणछा बाझ़ी शुन्नैं, तेथ रहणैं डागै-भेडे हेल़्ही च़रदी लागी अर तिन्नां निं कुंण पोर्ही छ़ेल़्हणै आल़अ हणअ। इज़राईले नगरी निं फेर-फिरदै गहल़ रहणैं, दमिश्क हणअ गलाम, ज़ुंण अरामी बच़ै दै हणैं, तिन्नें हणीं इज़राईली ज़ेही बूरी दशा। अह गल्ल डाही मंऐं स्वर्गे सारी सैने मालक बिधाता बोली।”
बिधाता बोला इहअ, “ज़ेभै ईंयां धैल़ै एछे, तेभै हणीं याकबे शान-शोभा खतम, इज़राईल ज़ुंण सेठ आसा, सह हणअ बाख दुबल़अ तेऊए खाल बी शाचणी हाडकै दी। इज़राईल हणअ रपाई खागे शुन्नैं खेचा ज़िहअ ज़ेथ नाज़ लऊई हेरअ अर धरना का सील बी हेरै पठी च़ुंघी। तेथ रहणैं सिधै धख ज़िहै लोग ज़िहै जैतूने बूटा का शोठी करै सारै फल़ धरना लै झ़णाटा पर तज़ी बी रहा च़ार-पांज़ दाणैं किधी मांझ़ै शाण्हटी दी एही। अह गल्ल डाही मंऐं इज़राईले परमेशर बिधाता बोली।”
ज़ेभै ईंयां धैल़ै एछे, तेखअ भाल़णअ मणछा तेऊ बाखा लै ज़ुंणी तिंयां बणाऐं दै आसा, तिन्नां रहणीं तेखअ सिधी इज़राईले पबित्र परमेशरे आशा। तेखअ निं तिन्नां धारा आपणैं हाथै बणाऐं दै अशेरा देबीए डौंडा बाखा भाल़णअ अर नां तेथ बेदी दी धूप ज़ाल़णअ। तिन्नां छ़ाडणीं इना गान-स्ताने पूज़ा-गाज़ा करनीं।
“ज़ेभै ईंयां धैल़ै एछे, तेभै हणीं बडी-बडी गहल़ा आल़ी नगरी शुन्नीं अर बरैबाद, ज़ेही इज़राईली डरै हिब्बी अर अमोरी लोगै इज़राईली डरै आपणीं नगरी शुन्नीं डाही ती शोटी अर आप्पू ठुर्है तै तेता का दूर।”1
इज़राईलीओ, तम्हैं पाअ आपणअ परमेशर बिस्सरी ज़ुंण तम्हां बच़ाऊआ अर ज़ुंण तम्हां लै बडी टोल्हा ज़िहअ शरण लणा लै थिअ। तेऊ छ़ाडी लाऐ तम्हैं परदेसी देअआ पूज़णा लै फूले बाग। तम्हैं च़ाऐ फूल रोही करै बाल़-शोहल़ लाए अर दुजै धैल़ै तिंयां फूल खिली बी जाए, पर तम्हां निं तिंयां च़ुंघणैं भेटणैं। तम्हां लै हणीं आफ़त अर दाहे झोशा ई।
दुशमण देशे हार
तिन्नां देशा लै भाल़ केही घोर आफ़त एछणी ज़ुंण हाम्हां मारदै चुटी पल़ा! तिन्नें सैना करा एही छ़ेल़ कि समुंदर आसा क्रुंगदअ लागअ द। तिन्नां देशा लै भाल़ा केही आफ़त हणीं ज़ुंण हाम्हां संघै जुध छ़ेल़ा! तिंयां एछा घ्रोहल़णै आल़ी बडी-बडी छ़ाल्ली ज़िहै! पर ज़ांऊं परमेशरा तिन्नां लै एक झ़ाहल़ काढणीं, तिंयां ठुर्हनै देशा दूर, तिंयां दरल़ाऊंणै बिधाता इहै ज़िहै धारठी प्रैंदै भुखलै अर धूल़ै माट्टै कुर्लू बागी च़का। सान्हां हणैं दुशमण देश इज़राईली डरैऊंदै लागै दै, पर राच भैणै का आजी जाणैं तिंयां खतम हई! ज़ुंणी म्हारअ यहूदा मुल्ख बरैबाद किअ, तिन्नें हणीं एही ई बूरी दशा।
Source notes (1)
- Cross-reference मिक. 5:13,14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.