Kulvi Outer Seraji Bible
ईशायाह 16
मोआब देशे बूरी दशा
मोआब देशे रेगीस्ताने सेला नगरी आल़ै दैआ एक मिम्मूं भैंट ज़ुंण एरुशलेम धारा राज़ करा। मोआब देशे बेटल़ी आसा खोऐ दै कोल्हा का छिंघुऐ दै होछ़ै-होछ़ै च़ेल्लू ज़ेही अर्नोन गाडा टपदी लागी दी।
मोआबी दूत बोला यहूदा मुल्खे लोगा लै इहअ, “हाम्हां किहअ करनअ ऐबै! तम्हैं करा म्हारी इहै बूटा ज़ेही फाज़त ज़ुंण खरै दपहरे चटाक्क धुप्पै का ठांढी छ़ैल्ली दैआ, हाम्हां दैआ आपणीं छ़ैल्ली दी शरण लणैं! हाम्हां डाहा एही ज़ैगा च़ोरी ज़ेथ हाम्हैं कोही निं भेटे। हाम्हां दैआ तम्हैं आपणैं देशै बस्सणै। हाम्हां मोआबी बच़ाऊआ तिन्नां का ज़ुंणीं हाम्हैं मारी पठी खतम लाऐ करी।”
तेखअ हणीं अह काट-मार खतम, ज़ुंणी सारअ देश हंतअ, तिंयां जाणैं तेखअ डेऊई। बिधाता काढणअ राज़ै दाबेदे आद-लुआदा मांझ़ै एक ज़ण्हअ राज़अ, तेऊ करनअ शुचअ-पाक्कअ रही राज़ अर सह झ़ूरनअ सोभी लै। सह हणअ भलै करना लै आजू अर तेऊ करनअ नसाफ।
यहूदा मुल्खे लोग बोला इहअ, “हाम्हैं आसा शूणअ द कि मोआबी किहै घमंडी आसा। हाम्हां का आसा थोघ कि तिंयां किहै ल़ेल़ै अर शरेरै फिरा, पर ऐबै हुई तिन्नें बडी-बडी गल्ला करनीं बृथा।”
मोआब देशे लोगा लागणीं लेरा ज़ुंण तिंयां खरी काटदै आसा लागै दै। तिन्नां लाणीं हिंह करै लेरा ज़ांऊं तिन्नां आद फिरनी कि तिंयां कीर-हेरेस नगरीए दाखे टिक्की केही खाआ तै। हेशबोन नगरीए खेच अर सिबमा नगरीए दाखे बाग हुऐ पठी शुक्कै, ज़हा बागे दाखे शराब देशा-देशै राज़ करनै आल़ै झुटा तै, तिन्नां दाखे बेल ती एकी ज़मानै ज़जार नगरी तैणीं पुजी दी, पुर्बा बाखा ती रेगीस्ताना तैणीं अर पछ़मा बाखा खारै समुंदरे दुजै बाढा बाखा पुजी दी। तैही करनअ मुंह सिबमा नगरीए दाखे बागा लै शोग, ज़िहअ ज़जार नगरी लै किअ। हेशबोन, एलीला नगरी लै बी लाणीं मुंह आशूए छ़ो-छ़ंद लाई लेरा किल्हैकि तेथ निं लऊंणे सिज़ना लै फसल ई बच़ी कि लोग खुशी मनाओए। रज़दी-पज़दी ज़ैगा निं ऐबै कोह खुश आथी। ऐबै निं दाखे बागा दी ज़ोरै-ज़ोरै गिहा लांदअ कोहै आथी। नां कोफरी दाखे रसा काढदअ आथी लागअ द। ऐबै आसा सोभ नड़क्क हुऐ दै! मोआब देश अर कीर-हेरेस नगरीए लोगा लै ज़ेही खरी पल़ी, तेता करै आसा हुंह दिलै खास्सअ दुखी हुअ द। धारा आपणैं देहुरै मोआब देशे लोगे पूज़ा-गाज़ा करनीं हणीं बृथा, तेता करै निं तिन्नों किछ़ भलअ हणअ।
ईंयां गल्ला ती बिधाता मोआब देशे बारै खोज़ी डाही दी। पर ऐबै बोला बिधाता इहअ, “चिई साला भितरी हणीं मोआब देशे धन-माया अर ज़ैदात खतम। इना एतरै खास्सै मणछा मांझ़ै बच़णैं थोल़ै ई अर तिन्नां बी निं ज़ोर-ज़ाहण किछ़ै रहणअ।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.