Kulvi Outer Seraji Bible
ईशायाह 9
तिन्नां निं तैहा खरी का छ़ुटणां लै बात ई भेटणीं।
मेल़-ज़ोल़ करनै आल़ै टिक्कैओ ज़ल्म
एकी ज़मानै करा तै ज़बलून अर नप्ताली गोत्रे ज़ैगा लै नफरत, पर आजू हणीं मांझ़ समुंदरा उझै जरदण नदी पुर्बा बाखा अर गलील मुल्खे खास्सी इज़त ज़ेथ पराई ज़ातीए मणछ आसा बस्सै दै।
ज़ुंण लोग न्हैरै दी थिऐ हांढदै लागै दै,
तिन्नां का शुझुअ खास्सअ प्रैश्शअ।
तिंयां थिऐ एही ज़ैगा बस्सै दै ज़िधी नटिप्प न्हैरअ थिअ,
पर ऐबै हुअ तिन्नां लै प्रैश्शअ।1
ओ म्हारै बिधाता, तंऐं बणाअं आपणअ देश बलबान।
ताह करै हुई तेरी परज़ा नाच़णै जोगी खुशी अर
तिन्नैं मनाऊंअ ऐहा खुशी इहअ थैर,
ज़िहअ लोग लऊंणींए बगती अर
सैना आप्पू मांझ़ै लुटी दी धन-माया बांडी खुशी मनाऊंआं।
तंऐं चोल़णअ तिन्नैं कैल़ै का गलामीओ जूँ अर
ताह काढणअ तिन्नें कान्हा का गर्कअ बोझ़अ पोर्ही।
ज़हा शोठी करै तिन्नां मार पल़ा, सह पाणीं ताह एही चोल़ी,
ज़िहअ तंऐं एकी ज़मानै मिद्यानी सैना खतम किई ती।
जुधा दी लोहू करै लभेल़ै दै सोभ झिकल़ै अर
जोधे पोलल़ै पाणै सोभ आगी जैंदरी दहई।
हाम्हां लै हुअ एक लान्हअ पैईदा!
हाम्हां लै दैणअ एक शोहरू!
सह हणअ म्हारअ राज़अ।
तेऊओ नाअं पल़णअ “महान सलाहकार,”
“महान परमेशर” अर “सदकअ बाब”
“मेल़ ज़ोल़ करनै आल़अ राज़ कुंआर।”
तेऊओ बल निं कधि खतम हणअ,
तेऊए राज़ा दी रहणीं सदा शांती।
तेऊ च़लाऊंणअ राज़ै दाबेदो राज़ आजू,
तेऊए राज़ा दी हणअ धर्म अर नसाफ
सह रहणअ आझ़ा पोर्ही सारी सदा लै।
इहअ दैनअ स्वर्गे सारी सैने मालक बिधाता हणैं।2
बिधाता दैणीं इज़राईली लै सज़ा
म्हारै मालक बिधाता हेरअ इज़राईला देशा लै फैंसलअ करी ज़ुंण याकबे आद-लुआद आसा। सोभी एप्रैमी अर सामरी नगरी बस्सै दै सोभी इज़राईली का जाणअ थोघ लागी ज़ुंण शरेरै अर घमंडी आसा। तिंयां बोला इहअ, “ईंटा करै च़िणीं दी कोठी गई ढूल़ी, पर हाम्हां बणाणैं तेते ज़ैगा काटुऐ पात्थरे कोठी। च़नारे काठ चुटै पर हाम्हां लाणीं तेते बदल़ै केल़ुईए काठे चाची।”
बिधाता दैनअ इज़राईली संघै रसीने दुशमणा जुधा लै एछणैं। पुर्बा बाखा अरामी अर पछ़मा बाखा खोल्ही पलिश्ती खाखा कि तिंयां इज़राईली घुटे। इधी बी निं बिधातो रोश्श फांभअ हुअ, सह रहअ तिन्नां लै सज़ा दैंदअ लागी।
स्वर्गे सारी सैने मालक बिधाता बाखा निं इज़राईली अज़ी बी फिरै, बिधाता दैनी तिन्नां लै सज़ा पर तिंयां निं तज़ी बी पचताऐ। एक धैल़ी एछणी एही कि बिधाता दैणीं इज़राईली परज़ा अर तिन्नें सैणैं लै एही सज़ा कि तेऊ पाणै खज़ूर अर कांडै-रिंडै ज़िहै तिन्नें लिंघणैं-मूंड काटी। नेतै अर सैणैं आसा तिन्नें मूंड अर झ़ुठी गल्ला खोज़णैं आल़ै गूर आसा तिन्नें लिंघणैं। किल्हैकि ईंयां ई करा इना प्रैंदै राज़ अर ईंयां ई पाआ परज़ा जैंदरी झाख संघा पाआ तिन्नां कबाता। तैही निं मालक कोही खारकै बी छ़ुटणैं दैणअ, तेऊ निं तेखअ बिधबा बेटल़ी अर छ़ुटै-मुक्कै दै लान्हें झींण बी डाहणीं! किल्हैकि तिंयां आसा सोभै पापी अर कदुष्ट हुऐ दै, तिंयां करा ऐडी ई गल्ला। इधी बी निं बिधातो रोश्श फांभअ हणअ, तेऊ रहणअ तिन्नां लै सज़ा दैंदै खिंच़ुई।
कदुष्ट लोगे कदुष्ट काम हुऐ इहै खतम ज़ेही कांडै-रिंडै अर ज़ोल़्ठै दी आग शाचा, तिंयां दझ़णैं बणैं शाची दी आगी ज़िहै ज़ेता का उझै धूँए मोरी हआ लागी दी। किल्हैकि स्वर्गे सारी सैने मालक बिधाते रोश्शा करै शाची सारै इज़राईल देशे आग, लोग दहै झ़ुका ज़िहै, तिंयां निं आपणैं सक्कै भाई-भाऊ लै बी झींण करदै। लोग हुऐ बशाचा ज़िहै, तिन्नैं लाअ आप्पू फेर कज़ोही का खाणअ-पिणअ छ़ड़ैऊई अर खाई, पर तज़ी बी निं तिन्नों पेट रज़दअ, इधी तैणीं कि तिन्नैं खाऐ आपणैं शोहरू-माठै बी! मनिश्शे अर एप्रैम गोत्र लागै आप्पू मांझ़ै एकी-दुजै हारदै-मारदै, तेखअ ज़ुल़ै दुहै यहूदा मारदै! इधी बी निं बिधातो रोश्श फांभअ हुअ अर सह रहअ तिन्नां लै सज़ा दैंदअ लागी।
Source notes (2)
- Cross-reference मोत्त. 4:15; लूक. 1:79
- Cross-reference लूक. 1:32,33; जेर. 23:5
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.