Kulvi Outer Seraji Bible
ईशायाह 46
बाझ़ी शाहे मुहुर्ती अर ज़िऊंदअ परमेशर
ईशायाह बोलअ,
“बाबेल देशे देअ-देबी बेठै ठुंईऐं!
ज़हा बेल अर नेबो देअए मुहुर्ती रगाऊंदै हआ तै,
तिंयां आसा ऐबै गाधै प्रैंदै लादी दी,
तिंयां हुई ऐबै तिन्नें थकै दै डागै प्रैंदै गर्कै बोझ़ै।
बाल अर नेबो देअए मुहुर्ती बेठी ठुंईऐं,
तिंयां निं आप्पू बी बच़ाऊई सकी,
तिंयां निंईं बान्हीं करै परदेसा लै!”
बिधाता बोलअ इहअ,
“याकबे आद-लुआद, ज़ुंण तम्हैं मेरी परज़ा इज़राईली मांझ़ै ज़िऊंदै आसा बच़ै दै,
तम्हैं शूणां कि हुंह बिधाता किज़ै बोला।
हुंह आसा हुऐ ज़ल्मां ओर्ही तम्हां भोसल़ै रगाऊंदअ लागअ द।
तम्हैं खास्सै प्रोढै बी होए अर थारै मूंड पल़ू करै शेतै हणैं तैणीं
रहणअ मुंह इहै ई रगाऊंदै लागी।
किल्हैकि थारअ परमेशर आसा हुंह,
तम्हैं आसा मंऐं बणाऐं दै अर धाचणै बी तम्हैं मुंह ई।
तम्हैं डाहणैं मुंह इहै ई ढाकी अर बच़ाऊई।
तम्हां किज़ै बोल़णअ कि हुंह कहा ज़िहअ आसा?
इहअ आसा बी कुंण ज़ुंण मुंह ज़िहअ होए? ज़ाथी निं कोह!
लोग खोल्हा आपणैं थैल्लू संघा तेरैल़ा तेता का सुन्नअ,
तिंयां तोला तराकल़ी दी च़ंदी,
संघा आणा सनार शादी सह दैआ तिन्नां लै तेतो देअ बणाईं,
तिंयां टेक्का तेखअ तेता सेटा माथअ।1
तिंयां च़का तेता आपणीं कान्हा संघा रहा रगाऊंदै लागी,
तेखअ बशैल़ा तिंयां तेता एही ज़ैगा ज़िधी सह टेक्की सके,
सह निं तिधा का ओर्ही-पोर्ही च़ुकदअ फुरदअ आथी।
ज़ै कुंण तेऊ देअआ सेटा अरज़ करे, सह देअ निं शुणदअ आथी
नां खरीए पलका तिन्नां बच़ाऊंदअ आथी।
पापी मणछो! तम्हैं डाहै ऐहा गल्ला आद,
एता निं तम्हैं बिस्सरी आथी!
आद करा कि सोभी का पैहलकै ज़मानै किज़ै हुअ,
हुंह ई आसा परमेशर अर मुखा सुआई निं होर कोहै आथी,
नां मुंह ज़िहअ कुंण होर आथी।
मंऐं आसा आजू हणैं आल़ै गल्ला शुरू ई दी डाही दी खोज़ी।
ज़ुंण हुंह बोला सह गल्ल हआ अटल़।
हुंह लआ तिन्नां सोभी गल्ला करी ई
ज़ुंण हुंह करनी सोठा।
मुंह शादणअ पुर्बा बाखा एक मणछ,
तेऊ पल़णअ काअ-गरली ज़िहै चुटी।
तेऊ करनीं मेरी तिंयां गल्ला पूरी ज़ुंण मंऐं करनी आसा सोठी दी।
अह गल्ल डाही मंऐं बोली अर मुंह करनअ ज़िहअ मंऐं बोलअ तिहअ पूरअ।
हठू मणछो, ज़ुंण तम्हैं भलै करनै का खास्सै दूर आसा,
तम्हैं शूणां धैन दैई कि हुंह किज़ै बोला।
हुंह एछणअ तम्हां बच़ाऊंदअ छ़ेक्कै।
ऐबै निं हुंह तम्हां का खास्सअ दूर आथी अर
मुंह एछणा लै निं खास्सी बल़ैग आथी।
एरुशलेम बच़ाऊंणअ मुंह संघा
रहैऊंणअ मुंह इज़राईली का आपणअ प्रतप्प।”
Source notes (1)
- Cross-reference लुआ. 32:2-4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.