ईशायाह 45

बिधाता आसा राज़अ कुस्रू छ़ांटअ द

1फारसी राज़अ कुस्रू आसा बिधाता आप्पै राज़अ छ़ांटअ द।

तेऊ आसा खास्सै देशा प्रैंदै राज़ करना लै डाहअ द,

बिधाता छ़ाडा तेऊ जुधा करदै कि सह देशा-देशे राज़ै आंघै-जैंघै करे,

बिधाता घुआल़ा तेऊ लै नगरी-नगरीए प्रऊल़ी एही कि तेखअ निं तिंयां बंद हंदी।

राज़ै कुस्रू लै बोला बिधाता इहअ,

2“ताह आजू-आजू डेऊणअ मुंह आप्पै,

उछ़टी-उछ़टी धारा बशैल़णीं मुंह धरनीं सरली।

नगरीए गहल़े बडी-बडी कांस्से प्रऊल़ी पाणीं मुंह पेच़ी अर

तेते द्रींड पाणै मुंह चोल़ी।

3ताल्है दैणैं मुंह तिंयां खज़ानै ज़ुंण गुप्त ज़ैगा न्हैरै दी आसा हाल़्है डाहै दै।

तेखअ ज़ाण्हनअ ताखा बी कि हुंह आसा सह बिधाता अर

इज़राईलो परमेशर ज़ुंणीं तूह नाअं बोली शादअ।1

4मंऐं आसा तूह डाहअ द कि तूह मेरै दास याकबे आद-लुआद इज़राईलीए मज़त करे

ज़ुंण मंऐं आप्पू लै आसा छ़ांटै दै।

तूह, निं मुंह बछ़ैणदअ पर

मंऐं किअ तूह बडी पदबी दी बशैल़ी खास्सअ मशूर।

5हुंह आसा बिधाता अर मुखा सुआई निं होर कोहै परमेशर आथी।

तूह ता निं मुंह बछ़ैणदअ पर

तज़ी बी दैणअ ताल्है जुधा करना लै ज़िहअ ताह लोल़ी तिहअ बल।

6तेखअ लागणअ पुर्बा ओर्ही पछ़मा तैणीं

संसारे सोभी लोगा का थोघ कि

हुंह आसा बिधाता अर

मुखा सुआई निं होर परमेशर आथी ई।

7प्रैश्शअ अर न्हैरअ आसा मंऐं ई बणाअं द,

खरी अर सुबधी दैणैं आल़अ बी आसा हुंह ई।

हुंह आसा बिधाता अर सोभ गल्‍ला करा हुंह ई।

8हुंह छ़ाडा ज़ीत सरगा का पाणीं ज़ेही,

धरती घुआल़ा तेता ढाकणा लै खाख,

तेखअ पज़ा तेता का धर्म अर नसाफ।

इना सोभी गल्‍ला करनै आल़अ आसा हुंह बिधाता।”

माट्टअ अर खमार

9हे इज़राईल! ताल्है भाल़ केही घोर आफ़त पल़णीं ज़ुंण आपणैं बणाणैं आल़ै संघै हठ करा!

तूह आसा माट्टे भांडे फुटै दै ठिक्‍करै ज़िहै धरनीं पल़अ द।

माट्टअ कै खमारा लै इहअ बोली सका,

“तूह किल्है आसा इहअ करदअ लागअ द! तूह निं बणाईं ज़ाणदअ?”

10एक च़ूई झुटदअ लान्हअ कै आपणैं ईजा-बाबा लै इहअ बोली सका,

“तम्हैं किल्है किअ हुंह पैईदा, हुंह इहअ किल्है बणाअं?”

11ताह बणाणैं आल़अ बिधाता ज़ुंण इज़राईलो पबित्र परमेशर आसा, सह बोला इहअ,

“तम्हां निं मेरी आपणीं परज़े बारै सुआल पुछ़णेंओ हक आथी

नां तम्हां लागदअ खोज़णअ कि मुंह किज़ै करनअ!

12हुंह आसा सह ज़ुंणीं धरती बणाईं अर

मणछ बी बणाऐं मंऐं ई कि तेथ बस्से।

आपणीं शगती करै आसा मंऐं सारअ भ्रमंड डाहअ द फुआरी,

सुरज़, ज़ोथ अर तारै आसा मंऐं काबू डाहै दै।

13मुंह करनअ कुस्रू खल़अ अर जुध ज़ितणा लै दैणअ मुंह तेऊओ साथ।

तेऊ लै करनीं मुंह सोभै बाता आज़री।

तेऊ च़िणनी मेरी एरुशलेम नगरी भिई।

मेरी परज़ा आसा तिन्‍नें देशा का दूर निंईं दी,

पर तेऊ करनै तिंयां गलामी का आज़ाद अर

तेते बदल़ै निं तेऊ किछ़ मांगणअ।”

अह गल्‍ल डाही स्वर्गे सारी सैने मालक बिधाता बोली।

14बिधाता बोला इज़राईला लै इहअ,

“मिसर अर कूश देशे धन-माया हणीं थारी,

शेबा नगरीए दैंत्तर मणछ हणैं थारै गलाम,

तिंयां आणनैं तम्हां शांघल़ी करै बान्हीं आप्पू पिछ़ू।

तिन्‍नां बोल़णअ तम्हां सेटा माथअ टेक्‍की करै इहअ,

‘परमेशर आसा तम्हां संघै अर तेऊ का सुआई निं होर परमेशर आथी ई।2

15हे इज़राईले परमेशर, असली दी आसा हाम्हां बच़ाऊंणै आल़अ तूह ई,

तूह करा इहै काम ज़ेतो कोही का थोघ निं हंदअ।

16ज़ुंण मुहुर्ती बणाआं, तिन्‍नां पल़णअ आप्पू मांझ़े झाख अर तिन्‍नां पल़णअ शर्मिंदै हणअ,

तिन्‍नां सोभिए हणीं बेइज़ती।

17पर इज़राईल हेरअ बिधाता बच़ाऊई,

तिन्‍नें हणीं सदा लै ज़ीत, अर

तिन्‍नां निं कधि शर्मिंदै पल़णअ हणअ।’”

18बिधाता आसा सारअ भ्रमंड बणाअं द,

सह ई आसा एक ज़ुंण परमेशर आसा!

पृथूई आसा तेऊ ई बणाईं दी अर

सह आसा तेऊ सदा लै पाक्‍की डाही दी टकैल़ी।

सह निं तेऊ उज़र अर शुन्‍नीं डाही,

पर सह बणाईं तेऊ एही कि तेथ मणछ बस्सी सके।

सह आसा परमेशर ज़ुंण इहअ बोला,

“हुंह आसा बिधाता, मुखा सुआई निं होर कोहै परमेशर आथी।

19मंऐं निं किछ़ै गल्‍ला च़ोरी डाही,

नां आपणैं काम गुप्त डाहै।

मंऐं निं आपणीं परज़ा याकबे आद-लुआदा लै एही मांग किई कि

तम्हैं रहा मुंह बृथा ज़ैगा लोल़ै लागी।

हुंह आसा बिधाता अर हुंह खोज़ा सत्त,

हुंह करा सदा भली ई गल्‍ला।”

संसारो मालक अर बाबेल देशे मुहुर्ती

20परमेशर बोला इहअ,

“सोभी देशे लोग करा झाल़अ,

ज़ुंण तम्हैं बाबेल देशा का आसा बच़ै दै।

सोभै ज़ुल़ा कठा संघा एछा मुंह सेटा।

ज़हा मणछा का किछ़ थोघ निं हंदअ,

तिंयां हआ काठे मुहुर्ती फेरै निखल़ै दै,

तिंयां हआ तिन्‍नां सेटा अरज़ करदै लागै दै

ज़ुंण तिन्‍नां बच़ाऊई निं सकदै!

21तम्हैं खोज़ा कि किज़ै हणअ, तम्हैं खोज़ा मुंह सेटा आपणीं पांच़ी,

तम्हैं करा एकी-दुजै का सलाह पुछ़ी गल्‍ला।

कुंणी आसा पैहलकै ई ज़मानै डाहअ द बोली कि इहअ हणअ?

कुंणी आसा डाही दी ईंयां गल्‍ला खास्सी साला पैहलै खोज़ी?

सह किअ मंऐं, हुंह आसा बिधाता।

परमेशर आसा हुंह ई, हुंह करा हर बगत भलअ,

बच़ाऊंणै आल़अ आसा हुंह ई,

मुखा सुआई निं होर कोहै परमेशर आथी।

22हुंह बोला सारै संसारा लै, मुंह बाखा फिरा,

तै जाणै तम्हैं बच़ी किल्हैकि

परमेशर आसा हुंह ई, मुखा सुआई निं होर कोहै आथी।

23मेरी गल्‍ला हआ शुची अर अटल़।

हुंह दैआ आपणैं सोह खाई ज़बान,

‘सोभ एछणैं मुंह सेटा अर सोभी टेक्‍कणअ मुंह सेटा माथअ

अर सोभी काढणैं मेरै नाओंए सोह।’3

24तिन्‍नां बोल़णअ मेरै बारै इहअ।

‘ज़ीत अर शगती आसा बिधाता ई दी।’

पर ज़ुंण मुंह संघै ज़ीद डाहा, तिन्‍नां पल़णअ शर्मिंदै हणअ।

25मुंह बिधाता बच़ाऊंणै इज़राईले आद-लुआद सोभै,

तिन्‍नां करनीं मेरी ज़ै-ज़ैकार।”