Kulvi Outer Seraji Bible
ईशायाह 50
बिधाता पुछ़अ इज़राईली का,
“लान्हैंओ! तम्हैं कै सोठा कि मंऐं आपणीं परज़ा छ़ाडी दैनी
ज़िहअ कुंण मणछ आपणीं बेटल़ी बैईदाऊअ लिखी छ़ाडा?
तै किधी आसा तिंयां बैईदाऊअ लिखै दै कागद?
मंऐं कै तिहै बेच़ी पाऐ ज़िहअ कुंण मणछ
आपणैं शोहरू गलाम हणां लै बेच़ा?
मंऐं निं तम्हां लै इहअ किछ़ किअ, तम्हैं डेऊऐ आपणैं पापा पिछ़ू दूर,
तम्हैं छ़ुटै थारै कदुष्ट कामां पिछ़ू।
हुंह रहअ तम्हां लै बोल्दअ लागी
पर तम्हैं निं ज़बाब ई दैनअ!
ज़ेभै मंऐं तम्हां लै बोलअ, तम्हैं किल्है निं ज़बाब दैनअ?
मुखा कै तम्हां बच़ाऊंणै जोगी ज़ोर आथी निं?
मेरै एकी बैणा बोल्दी शुक्का बडै-बडै समुंदर अर
बडै-बडै दरैअ शकेऊई बणाअं तेथ शुक्कअ रेगीस्तान,
पाणीं बाझ़ी निं तेथ एक म्हाछ़ली बी ज़िऊंदी बच़दी।
हुंह सका सरगै पठी नटिप्प न्हैरअ करी,
ज़िहअ शोग करनै आल़अ काल़ै झिकल़ै बान्हां।”
शुणनै मनणै आल़अ दास
सोभिओ मालक बिधाता खोज़अ मुखा इहअ कि तूह लऐ इहअ खोज़ी
ताकि ज़हा मणछो हैअ होए चुटअ द, तेऊ लोल़ी हिम्मत भेटी।
सह रहअ मुंह कबल्लअ दोत्ती चतैन करदअ लागी कि
हुंह तिन्नां गल्ला शुणें ज़ुंण सह मुखा खोज़णअ च़ाहा।
मेरै मालक बिधाता दैनी मुल्है समझ़,
मंऐं निं तेऊ लै द्रोह किअ
अर नां तेऊ का दूर डेऊअ।
च़िक्कणै आल़ै बाखा डाही मंऐं आपणीं पिठ ढोही,
तिन्नां दैनअ मंऐं मेरअ मूंड बच़ोटणैं अर
मेरै थोथरै च़ैंडै बाहणैं, मंऐं निं तिन्नां का
आपणअ किछ़ बी बच़ाअ किअ।1
सोभिओ मालक बिधाता किई मेरी मज़त अर तिन्नें बेइज़ती करनै करै बी निं मेरअ किछ़ बिगल़अ,
मंऐं निं छ़ाड छ़ाडी अर मंऐं काढी तिंयां गल्ला ज़िरी।
किल्हैकि मुखा आसा थोघ कि
बिधाता निं मुंह शर्मिंदै दैंदअ हणैं।
मेरी फाज़त करनै आल़अ परमेशर आसा मुंह नेल़,
तेऊ करनी अह गल्ल पाक्की कि मेरअ निं किछ़ै दोश आथी।
तेऊ सेटा निं कोह मणछ खल़ै टेक्कणै ज़ुंण मुल्है दोश लाई सके।
च़ाल्ला हाम्हां डेऊणअ दालता लै संघा!
ज़ुंण मुल्है दोश लाणअ च़ाहा सह एछा आजू!2
मेरअ मालक बिधाता हणअ मुंह बाखा आप्पै
तेखअ कुंण आसा मुल्है दोश लाणैं आल़अ?
मुल्है दोश लाणैं आल़ै लुक्कणै पठी,
तिंयां हणैं ल्हऐ खाऐ दै झिकल़ै ज़िहै खतम।
ज़ेतरै तम्हैं बिधातो अदर करा अर
ज़िहअ तेऊओ दास बोला तिहअ करा,
च़ाऐ तम्हैं नटिप्प न्हैरै दी बी हांढदै होए लागै द,
तम्हैं रहै आपणैं परमेशर बिधाते आसरै अर तेऊ दी डाहै विश्वास।
ज़ेतरै बी तम्हैं ज़ुंण होरी बरैबाद करने कनित्ती सोठा,
तम्हैं हणैं आपणीं तिन्नां ई कनित्ती करै खतम।
मुंह बिधाता दैणअ इहअ आप्पै हणैं,
थारी हणीं बूरी दशा।
Source notes (2)
- Cross-reference मोत्त. 26:67; इब्रा. 12:2
- Cross-reference रोम. 8:33,34
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.