Kulvi Outer Seraji Bible
ईशायाह 32
धर्मीं राज़
आजू एछणअ एक धर्मीं राज़अ अर तेऊए कार-करिंदै बी करनअ शुचअ नसाफ डाही राज़।1 नऊंअ राज़अ अर तेऊ कार-करिंदै हणैं ढिश-बागर अर पाणींए छ़ाल्लै का लुआर्हना लै आडा ज़िहै। सह धर्मीं राज़अ हणअ उज़र रेगीस्तानै पाणींए गाडा ज़िहअ। सह हणअ रेगीस्तानै पल़ै दै दहंदै-प्लुशदै धुप्पै का बच़णा लै धरनीं पल़ी दी बडी टोल्हे छ़ैल्ली ज़िहअ। तेभै ज़ुंण कांणै नांईं होए, तिन्नां हेरनअ भाल़ी अर ज़ुंण टौणैं नांईं होए तिन्नां शुणनअ धैन दैई। ज़हा मणछा डअर-भगैर हआ तिन्नां एछणी सोर-समझ़। थाभल़ी गल्ला करनै आल़ै चिंजणअ राम्बल़अ। तेभै निं कमुर्खो अदर कोही करनअ अर नां कहा कमिन्नै मणछे इज़त करनीं। कमुर्खा करा गल्ला ई ऐडी अर तिन्नां हआ कदुष्ट कामें ई सोठ पल़ी दी। तिंयां निं भलअ करनअ ई च़ाहंदै। तिंयां डाहा बिधाते बारै बी झ़ुठी गल्ला घल़ी। तिंयां नां भुखै लै रोटी दैंदै अर नां नचिशै लै पाणीं दैंदै। कदुष्ट मणछ करा छ़ल़-कपट, तिंयां निं रैनै-गरीबा लै कधू भलअ पाछदै! नां तिन्नों हक छ़ाडदै। पर भलअ मणछ सोठा भलअ ई अर सह रहा शुचै लै पाक्कअ टेक्की।
एरुशलेम नगरीए बेटल़ी लै खरी
तम्हैं बेटल़ी ज़ुंण आल-मस्ती दी आसा ज़िऊंदी लागी दी, ज़ेही तम्हैं निहंचै आसा बेठी दी, तम्हैं शूणां कि हुंह किज़ै बोला! एभै आसा तम्हैं निहंचै अर तम्हां निं हैल़अ नां फिकर आथी, पर कोई साल भर बाद एछणअ इहअ बगत कि तम्हैं लुक्कणी देशा दूर किल्हैकि नां दाखे फसल हणीं अर नां तम्हां फल़ भेटणैं। तम्हैं आसा आल-मस्ती दी ज़िऊंदी लागी दी, नां तम्हां हैल़अ-फिकर आथी, पर ऐबै लागा तम्हैं डरै काम्बदी! आपणैं च़ोल़ै शोटा पोर्ही संघा बान्हां कुछी खिंथल़ै। रज़दै-पज़दै खेचा अर दाखे बागे बरैबादी भाल़ी पल़णअ तम्हां शोग अर तम्हां पटाक्कणी आपणीं हिक्का। मेरी परज़े नगरीए ज़ैगा बाझ़णैं कांडै-रिंडे झ़ाकल़। तिन्नां सोभी घअरा लै लाआ लेरा ज़ेथ लोग खुश रहा तै अर तैहा नगरी ज़ेथ ज़िन्दगी थिई। राज़ैओ मैहल बी डाहणअ शोटी अर राज़धानी हणीं पठी शुन्नीं। नगरीए गहल़ अर तेते पहरीए पुंडरी हणीं सदा लै शुन्नीं अर तेथ रहणैं बणें गाधै हांढदै-फिरदै लागी अर सारी ज़ैगा हणीं डागै-भेडे हेल़्ही च़ारना लै घैहणीं।
पर ज़ांऊं परमेशरा स्वर्गा का हाम्हां लै आत्मां छ़ाडणीं, तेखअ हणीं सह बंज़र हुई दी ज़ैगा भिई रज़दी-पज़दी अर तेथ लागणीं तेखअ भिई बधिया साल-फसल। तेखअ हणैं ऐहा ज़ैगा सोभ धर्मीं अर सोभी लै हणअ नसाफ। ज़ांऊं सोभ धर्मीं हणैं अर ज़ांऊं सोभी भलै काम करनै, तेखअ हणअ सदा लै मेल़-ज़ोल़ अर निहंचअ।2 तेखअ निं परमेशरे परज़ा किछ़ हैल़अ-फिकर हणअ अर तेखअ रहणैं तिंयां राज्ज़ी-राम्बल़ै अर मौज़ी ज़िऊंदै लागी। पर सरगा का सका बडै-बडै शरू पल़ी अर तेता करै ढुल़णै बडै-बडै गहल़-कोट अर नगरी अर घणैं बण हणैं खतम। तम्हैं भाल़ किहै खुशी हणैं ज़हा का साल-फसल बऊंणा लै बतेर्हअ पाणीं हणअ अर गाधै अर बल्दा च़रना लै हणीं फेर-फिरदी बतेर्ही ज़ैगा।
Source notes (2)
- Cross-reference प्रका. 19:11; इब्रा. 1:8,9
- Cross-reference रोम. 14:7; याक. 3:18
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.