Kulvi Outer Seraji Bible
ईशायाह 3
यहूदा मुल्ख अर एरुशलेम नगरीओ नसाफ
शूणां, स्वर्गे सारी सैने मालक बिधाता लाई यहूदा मुल्ख अर एरुशलेम नगरी का तिंयां सोभ च़िज़ा दूर करी ज़ेता करै मणछ ज़िऊंदअ रहा। तेऊ लाऐ तिन्नां का नाज़, पाणीं, घोल़ै, सैना, तिन्नें पांच़, गूर, मणशाण झ़ैऊंणै आल़ै अर सैणैं, बज़ीर, कार-करिंदै, दरोगै अर ज़ादू-मत्र करनै आल़ै दूर करी। बिधाता बोलअ आजू इहअ, “मुंह यहूदे परज़ा प्रैंदै लान्हैं-सुन्हैं राज़ करनै।” सोभी लोगा करने एकी-दुजै अर आपणैं गरांईं लै ज़ुल्म। खारकै निं सैणैं अर प्रोढे इज़त करनी अर बृथा मणछ उझ़णअ मनै-तनै दै मशूर मणछे बेइज़ती करदअ।
एक बगत एछणअ इहअ कि तम्हां मांझ़ै ई ढाकणअ कहा आपणैं ई भाईए हाथ संघा बोल़णअ इहअ, “ताखा आसा अज़ी बी बान्हणां लै, तूह बण ऐहा खरीए पलका म्हारअ प्रधान राज़अ संघा कर हाम्हां सोभी प्रैंदै राज़।”
पर तेऊ दैणअ तैहा धैल़ी तिन्नां लै ज़बाब, “हुंह निं थारअ किछ़ भलअ करी सकदअ! एता का लाऊआ नां मुखा झिकल़ै आथी अर नां मुखा नाज़ आथी! हुंह निं थारअ प्रधान बणी सकदअ!”
बिधाता बोला इहअ, “हाँ, ज़ाथी हणअ इहअ ई, एरुशलेम नगरी लागणै झ़लारै! यहूदा मुल्ख हणअ पठी बरैबाद! आपणीं गल्ला अर कामां करै करा तिंयां बिधाता लै द्रोह! तिंयां दैआ बिधाते मुंहैं तेऊए बेइज़ती करी। तिन्नें जाआ मुंहां ई भाल़ी थोघ लागी कि तिंयां करा शौहरै आम तिहअ ई पाप ज़िहअ सदोम नगरीए लोग करा तै। तिन्नां लै पल़ी घोर आफ़त अर अह आफ़त पाई तिन्नैं आप्पू लै आप्पै।
“धर्मीं मणछ रहणअ खुश अर तेऊओ निं किछ़ै बूरअ हणअ। तिन्नां जाणअ आपणैं भलै कर्मो फल भेटी। पर कदुष्ट मणछा लै आसा आफ़त, ज़ुंण बूरअ तिन्नैं होरी लै किअ, सह फिरनअ तिन्नां लै बापस!
“लान्हैं सैणैं हंती मेरी परज़ा अर तिन्नें बेटल़ी करा मेरी परज़ा प्रैंदै राज़।
“मेरी परज़ा, तम्हां पाआ थारै ईंयां सैणैं कबाता, ताकि तम्हां का थोघ ई नां लागे कि तम्हां कैहा बाता डेऊणअ!”
बिधाता करा आपणीं परज़ो नसाफ
बिधाता लाअ मकदमैंओ फैंसलअ करी, सह आसा सोभी देशा-देशे लोगो नसाफ करना लै खल़्हुअ द। बिधाता पुछ़णअ आपणीं परज़े सैणैं अर नेतै का सुआल, तेऊ लाणअ तिन्नां लै इहअ दोश, “तम्हैं खाई दाखे बागा का दाख अर रैनै-गरीबा का लुटी करै भरै तम्हैं आपणैं घअर!” स्वर्गे सारी सैने मालक बिधाता बोला इहअ, “तम्हैं पिशी मेरी परज़ा, तम्हैं ढुशै रैनै-गरीब धरनीं।”
एरुशलेम नगरीए बेटल़ी लै चतैनगी
बिधाता बोला इहअ, “एरुशलेम नगरीए बेटल़ी भाल़ केही घमंडी हुई! तिन्नैं हआ उझै खल़अ नाक डाहअ द करी। घुंढी दी पणज़ेबा बान्हीं हआ तिंयां बाता हांढदी लोगा लभाऊंदी लागी दी। पर मुंह थारै मालक बिधाता दैणीं तिन्नां लै एही सज़ा कि तिन्नें मुंडे शराल़ अल़णैं पठी अर झिकल़ै बाझ़ी हणीं तिंयां नांगी।”
एक धैल़ी एछणी एही कि मालक बिधाता करनीं एरुशलेम नगरीए बेटल़ी का तिंयां सोभै च़िज़ा दूर ज़ेतो तिन्नां घमंड आसा त: ज़ुंण हार शंगार तिंयां बान्हां, तिंयां पणज़ेबा, च़ाक, हार, च़ंदर हार, झ़ुमकू, घुंढू, टोपी, बंद, कुछी पेटी, सैंट, मुंदल़ी, नाके बाल़ू, झ़लमल करदै झिकल़ै, घाघरै, च़ादरू, ढब्बे थैल्लू, शिश्शै, बाछे रमाल, धाठू अर घुंढू। इना सोभिए शोभा करनीं मुंह तिन्नां का दूर।
सैंटे शोभली बास्से बदल़ै लागणीं तिन्नां का चजैन्ह, कुछी गाचीए बदल़ै पल़णीं तिन्नां राश्शी बान्हणीं, तिन्नें मुंडै करिशी दी बांबल़ा बाझ़ी हणैं तिंयां ताम्बल़ै। झ़लमलै घाघरे ज़ैगा लागणै तिन्नां खिंथल़ै1 बान्हणैं। मुंहैं हणैं दाग पल़ै दै अर तिंयां हणीं हेरनी कदर्शणीं।2
नगरीओ सोभी का ज़बर जोधअ मर्ध बी पाणअ जुधा दी मारी। सियोन नगरीए प्रऊल़ी सेटा हणअ मखाण अर शोग पल़अ द, अह नगरी बी हणीं एही बेटल़ी ज़ेही ज़ुंण बरैबाद करी धरनीं खुल्है दी नांगी आसा डाही दी शोटी।
Source notes (2)
- Footnote खिंथल़ै शोग प्रगट करना लै, सबर डाहणां लै अर शर्मिंदै हई करा तै इहअ।
- Cross-reference मूल. 37:34; 1 राज़. 21:27; एज. 7:18
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.