एजकेल

एजकेल

एजकेल गूरै खोज़ी दी गल्‍ला ज़ुंण आजू निभणी

भेत

लिखणैं आल़अ:

सन: 593 का 570 ईसा आजी

एजकेल थिअ प्रोहत अर बिधातो गूर। सह बी निंयं त यहूदा मुल्खा का होरी यहूदी संघै बाबेल देशे गलामी लै कैद करी। अह कताब बी आसा तेऊ बाबेल देशे गलामी दी रहंदी लिखी दी।

बिधाता काढअ एजकेल आपणअ गूर कि गलामी दी डेऊई दी बिधाते परज़ा अर तिन्‍नां का बिधातो समाद खोज़े ज़ुंण अज़ी बी एरुशलेम थिऐ बस्सै दै।

एजकेल त इज़राईलीए बेघै बूरी अर कदुष्ट पोस्ती लै बिधाते च़ाकरी करदअ लागअ द। सह रहअ तेऊ ज़मानें लोगा लै बोल्दअ लागी कि, ज़ै आझ़ तिंयां पाप करनै का तिन्‍नों मन्‍न पिछ़ू हटे, तै जाणअ आजू तिन्‍नां लै भलअ हई।

बिधाता बोलअ इहअ, “एजकेल, इज़राईली हुऐ मूंऐं दै मणछे हाडकै ज़िहै। तिंयां बोला इहअ, ‘म्हारै हाडकै शुक्‍कै पठी, हाम्हां निं आजू आशा ई रही! हाम्हैं हुऐ पठी खतम।’ तूह बोल तिन्‍नां लै इहअ कि परमेशर आसा राज़अ, सह बोला इहअ, ‘ज़ेथ तम्हैं दाबै दै आसा, तिंयां घोरी तिंयां शोधणी मुंह पोर्ही संघा काढणैं मुंह तम्हैं बागै। तम्हैं पजैल़णैं मुंह इज़राईल मुल्खै बापस। ज़ेभै ईंयां गल्‍ला हणीं, तेभै ज़ाण्हनअ तम्हां का कि हुंह आसा बिधाता। मुंह पाणअ आपणअ शाह तम्हां भितरी अर तेखअ हणैं तम्हैं भिई ज़िऊंदै। तम्हैं पजैल़णैं मुंह थारै आपणैं घअरै बापस, तेखअ लागणअ तम्हां का थोघ कि हुंह करा आपणीं ज़बान पूरी। अह गल्‍ल डाही मंऐं बिधाता बोली।’”

(37:11,12,14)

कताबे बांड

एजकेल काढअ बिधाता गूर 1:1—3:27

एरुशलेम अर यहूदा मुल्खे बारै गल्‍ला प्रगट करनी 4:1—24:27

देशा-देशा लै परमेशरो नसाफ 25:1—32:32

इज़राईलीए बारै गल्‍ला प्रगट करनी 33:1—39:29

भिई ज़िऊंदै हणें बारै गल्‍ला प्रगट करनी 40:1—48:35