Kulvi Outer Seraji Bible
एजकेल 44
पुर्बा बाखा प्रऊल़ी बाती काम-काज़
तेऊ मणछै निंयं हुंह पुर्बा बाखा भबने बाघली दुआलीए प्रऊल़ी सेटा। सह प्रऊल़ ती हूल़ी डाही दी। तिधी बोलअ मुल्है बिधाता इहअ, “अह प्रऊल़ डाहणीं एही ई हूल़ी, अह निं कधि घुआल़णीं। एसी बाती निं कोह मणछ लोल़ी भितरा लै आअ किल्हैकि एसी बाती एछा हुंह इज़राईलो परमेशर। तैही डाहणीं अह कबल्ली हूल़ी। सिधअ इज़राईला प्रैंदै राज़ करनै आल़अ राज़अ सका मुंह बिधाता सम्हनै प्रऊल़ी भितरी बाखा बेठी करै भोज़न खाई। तेता लै एछै सह भितरा बाखा ऐहा प्रऊल़ीए च़ऊंरै बाती अर तेखअ डेओऐ तेस्सी ई बाती बापस।”
भबना भितरी डेऊणा लै बधान
तेखअ निंयं तेऊ मणछै हुंह उतर दिशा बाखे प्रऊल़ी सेटा भबने ताटी। हुंह लागअ तिधी भाल़अ, तिधी शुझुअ मुखा कि बिधातो भबन त बिधाते धुप्पै करै भर्हुअ द। मंऐं टेक्कअ तिधी धरनीं उटै पल़ी बिधाता सेटा माथअ।1 बिधाता बोलअ मुल्है इहअ, “मणछा, राम्बल़ै करै भाल़ संघा शुण धैन दैई। मंऐं लाअ ताखा भबने बारै बधान अर सूल डाही खोज़ी। एतो डाहै धैन कि भबना भितरा लै कहा प्रऊल़ी बाती एछणअ अर कहा प्रऊल़ी बाती डेऊणअ बागा लै।
“तूह डाहै मुल्है द्रोह करनै आल़ै इज़राईली का खोज़ी कि हुंह परमेशर बिधाता निं तिन्नें च़िल़्हखरै कामां मंदअ ज़ुंण तिंयां करदै आसा लागै दै। तिंयां दैआ तै परदेसी मणछा मेरै भबना भितरी एछणैं ज़ुंण मुंह निं मंदै अर ज़ुंणीं खतैर निं आथी किअ द! इहअ करै लाई तिन्नैं मेरै भबने छ़ोत। तिंयां करा तै इहअ, ज़ेभै तिंयां मुल्है भोज़न, च़र्बी अर लोधल़अ अर्पण करा तै। मेरी परज़ा निं तिहअ किअ ज़ेही मंऐं तिन्नां संघै करार थिई किई दी, तिंयां रहै मुंह बाखा पिठ फरेऊई च़िल़्हखरै कामां करदै लागी।2 तिन्नैं निं मेरै भबनै पबित्र च़िज़ो धैन-खैल बी डाहअ। आपणैं बदल़ै डाहै तिन्नैं तेते हाल़्है-पहरै लै तिंयां परदेसी मणछ लाई।
“हुंह मालक बिधाता बोला इहअ कि मेरै भबना भितरी निं इहअ कोह परदेसी लोल़ी डेऊअ ज़ुंणी खतैर निं आथी किअ द अर ज़ुंण मुंह निं मंदै। सह मणछ च़ाऐ मेरी इज़राईली परज़ा मांझ़ै ई किल्है निं होए बस्सअ द।”
लेबी गोत्रे आद-लुआद ई डाहै प्रोहत
बिधाता बोलअ मुल्है इहअ, “मंऐं लाई तिन्नां लेबी लै सज़ा दैई ज़ुंण होरी इज़राईली लोगा संघै मुंह छ़ाडी मुहुर्ती पूज़ा करदै लागै तै। ऐबै बी सका तिंयां मेरै भबने मेरी च़ाकरी करी। तिंयां सका मेरै भबने प्रऊल़ी पहरअ करी, तिन्नां हूम बल़ीदाने पशू बी सका तिंयां काटी ज़ेता लोग मुल्है आणे। तिंयां सका तिन्नां लोगे च़ाकरी करी ज़ुंण मेरै भबनै मुंह सेटा एछणैं। पर ज़ुंण तिन्नैं मुंह छ़ाडी मुहुर्ती पूज़ा करी पाप किअ, ज़ेता करै सारै इज़राईली पाप करदै लागै, तेता लै डाही मंऐं परमेशर बिधाता ज़बान दैई कि तिन्नां लै लणी मुंह ज़रूर सज़ा दैई। तिंयां निं मेरी प्रोहतच़ारी ऐबै करी सकदै। नां तिंयां मेरी पबित्र च़िज़ा छ़ुंहीं सकदै अर नां तिंयां मेरी खास पबित्र ज़ैगा एछी सकदै। अह हणीं तिन्नां लै तेते सज़ा ज़ुंण च़िल़्हखरै काम तिन्नैं किऐ। पर तिंयां सका मेरै भबनो होर काम अर हाल़्हअ-पहरअ करी।”
प्रोहत
मालक बिधाता बोलअ इहअ, “लेबी गोत्रा का ज़ुंण सदोक प्रोहते आद-लुआद रहै मेरै भबनै च़ाकरी मेरी च़ाकरी करदै लागी ज़धू होर इज़राईली मुखा दूर हुऐ तै। ऐबै सका तिंयां ई मेरी खास पबित्र ज़ैगा एछी अर मुल्है बल़ीदाने च़र्बी अर लोधल़अ छ़ाडणें च़ाकरी करी। सिधै तिंयां ई सका मेरै भबना भितरी एछी अर मेरी बेदी सेटा च़ाकरी करी अर ज़ुंण च़िज़ा मुल्है पबित्र आसा, तेतो हाल़्हअ-पहरअ बी करै तिंयां ई। ज़ेभै तिंयां मेरै भबना भितरी ताटीए च़ऊंरै बाती एछे, तिन्नैं लोल़ी बाछे किम्मती झिकल़ै हुऐ बान्हैं दै। तिंयां निं ऊने झिकल़ै तेभै बान्हीं ज़ेभै तिंयां मेरै भबने भितरली ताटी मेरी च़ाकरी करदै होए। मुंडै लोल़ी तिन्नैं बाछे साफै हुऐ लाऐ दै अर कुछी बाछे ज़ांघी। तिंयां निं कुछी गाची या इहै झिकल़ै बान्हीं ज़ेता करै प्रसिन्नअ छ़ुटा। मेरी पबित्र ज़ैगा च़ाकरी करी बाघली ताटी लोगा जैंदरी डेऊणैं का आजी लऐ तिंयां तिन्नां झिकल़ै पोर्ही खोल्ही संघा डाहै तिन्नां खुडी ज़ुंण पबित्र आसा डाही दी। बागै लोगा जैंदरी डेऊणा लै बान्हैं तिंयां होर झिकल़ै ताकि तिन्नां पबित्र झिकल़ै कोह निं छ़ुंए।
“सदोके आद-लुआद ज़ुंण मेरै प्रोहत हणैं, तिंयां निं आपणैं मूंड छाम्बी ताम्बल़ै करी, नां मुंडे शराल़ खास्सै लाम्मै दैई हणैं। तिन्नां करै ज़ेतरी धख लाम्मै हुऐ, तेतरी आजू-आजू का शराल़ काटी। भितरली ताटी लै निं प्रोहत नशै आल़अ दाखो रस झुटी डेऊई। नां प्रोहत छ़ाडी दी बेटल़ी अर बिधबा संघै बैह करी। प्रोहत करै कुंआरी शोहरी संघै बैह ज़ुंण इज़राईली होए। ज़ै कहा प्रोहते ई बेटल़ी बिधबा होए हुई दी, तैहा संघै बी सका सह बैह करी।
“अह आसा प्रोहते ज़िम्मैंबारी कि तिंयां डाहै खोज़ी कि पबित्र अर ज़ुंण च़ीज़ पबित्र निं आथी तेथ किज़ै फरक आसा, अर कुंण च़ीज़ बधाने साबै शुची आसा अर केथ दी छ़ोत आसा। ज़ै केभै मेरी परज़ा मांझ़ै झ़गल़अ होए, तेता लै करै प्रोहत मेरै बधाने साबै तिन्नों नसाफ। तिंयां करै तिह-थैर तेऊ ई साबै ज़िहअ मंऐं तेता लै बधान खोज़अ द आसा अर तिंयां डाहै मेरी बशैघे धैल़ी पबित्र।
“प्रोहत निं मुल्दै छ़ुंहीं आप्पू लै छ़ोत लाई। हाँ ज़ै तिन्नें आपणैं घअरै ईज-बाब, शोहरू-शोहरी, भाई-बैहणी मांझ़ै कुंण मरे, तिन्नां मणछे ल्हास सका तिंयां छ़ुंहीं। ज़ै कहा प्रोहता मुल्दै छ़ुंहीं छ़ोत लागे, तेऊ लागणीं बधाने साबै आपणीं शुधी करनी। शुधी हणैं बाद डेओऐ सह साता धैल़ी बाद भबने भितरली ताटी लै संघा करै सह आपणैं पापे प्राश्त करना लै पाप बल़ीदान। तेखअ सका सह मेरी पबित्र ज़ैगा भिई च़ाकरी करी। अह गल्ल डाही मंऐं मालक बिधाता बोली।
“प्रोहते निं होरी इज़राईली संघै ज़ैदाता दी किछ़ै हेस्सअ हणअ। किल्हैकि तिन्नें ज़ैदात आसा हुंह आप्पै ज़ुंण पोस्ती दर पोस्ती तिन्नें हणीं। तिन्नां लै निं ज़िम्मीं-ज़ैगा दैंदै लागी किल्हैकि तिन्नें जदी ज़ैगा आसा हुंह आप्पै। लोगा ज़ुंण नाज़ बल़ी, पाप बल़ी, दोश बल़ी मुंह सेटा दैणीं, तेता सका प्रोहत खाई। ज़ुंण बी इज़राईली मांझ़ै मुल्है मानत मनी अर्पण करे, तिंयां भेटणीं तिन्नां। साल-फसला मांझ़ै आणै पैहलअ भाग मेरी परज़ा मुल्है अर्पण करनै लै सह हणअ प्रोहतो। नऊंऐं नाज़ो पिठअ मुछ़ी दी पैहली आरी बी दैऐ प्रोहता लै। तेता करै हणीं थारै घअरै खास्सी बर्गत।3 ज़ुंण च़ेल्लू-पखीरू, अर पशू आप्पै मूंअ द होए, कि कुंणी बणें ज़ीबै मारअ द होए, तेते शिखा निं प्रोहत खाई आथी।”4
Source notes (4)
- Cross-reference प्रका. 15:8
- Cross-reference एज. 1:28
- Cross-reference लेब. 26:10
- Cross-reference लेब. 22:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.