एजकेल 18

पापे ज़िम्मैंबारी आसा आपणीं

1बिधाता बोलअ मुल्है भिई इहअ, 2“मणछा, इज़राईला दी आसा अह कहाबत मशूर,

‘मिल्‍ली दाख खाई ईजै-बाबै अर

खाखा कल़ुई लागी आजू तिन्‍नें शोहरू।’1

3“तिन्‍नां का खोज़ इहअ कि हुंह परमेशर बिधाता बोला तिन्‍नां लै इहअ, ‘मंऐं खाऐ आपणैं सोह कि आजू निं इज़राईला दी कहाबत बोल़णीं।’ 4सोभ ज़िऊंदै ज़ीब आसा मेरै। ईजा-बाबे शाह दी आसा मेरअ हक अर तिन्‍नें शोहरू-शोहरीए शाह दी बी आसा मेरअ ई हक। मरनअ सह ई ज़ुंण पाप करे।

5“ज़ुंण असली दी धर्मीं होए, सह करा भलअ अर शुचअ नसाफ। 6सह निं धारा मुहुर्ती लै बल़ीदान किई दी शिखा खाणां लै साझ़ू हंदअ। सह निं तिन्‍नां पाखलै देअए मुहुर्ती सेटा अरज़ करदअ ज़हा होर इज़राईली पूज़ा। सह निं होरीए बेटल़ी संघै सुत्ती कंज़रैई करदअ। नां सह तेभै आपणीं बेटल़ी संघै सुत्तदअ ज़ेभै सह ज़ुठै झिकल़ै धोई छ़ोतली हआ। 7सह निं होरी लै नर्दैई हंदअ। ऋणा पिछ़ू ज़ुंण तेऊ का बांधअ हआ डाहअ द, ज़ांऊं ऋण भरी छ़ेक्‍कअ, तेऊ बांधै दैआ सह नढैऊऐ बापस। रैनै-गरीबा लै दैआ सह खाणां लै रोटी अर बान्हणां लै झिकल़ै। 8सह निं ऋण दैनै दै ढब्बैओ बैज़ बी मांगदअ। सह रहा बूरै करनै का दूर। सह करा सोभी लै भलअ अर शुचअ नसाफ। 9मेरै बधान अर बिधी मना सह शुचअ-पाक्‍कअ रही ज़िहअ खोज़अ द आसा तिहअ ई। इहअ मणछ हआ धर्मीं अर सह रहणअ ज़िऊंदअ। अह गल्‍ल डाही मंऐं बिधाता बोली, ज़ुंण सोभिओ मालक आसा।2

10“ज़ै तेऊ धर्मीं मणछो शोहरू आजू कदुष्ट होए ज़ुंण उपद्रभ करे अर पाप करनै आल़अ होए, 11ज़ै सह धारा मुहुर्ती लै बल़ीदान किई दी शिखा खाणां लै साझ़ू होए, होरीए बेटल़ी संघै सुत्ती छ़ोत लाए, 12ज़ुंणीं रैनै-गरीब हंतै अर लोग लुटै होए, लोगा का ढाकअ द बांधअ बापस निं दैनअ होए, मुहुर्ती पूज़ा करा होए अर होर च़िल़्हखरै काम किऐ होए, 13लोगा लै ऋण दैई साबा का बाधू बैज़ खाअ होए, इहअ कदुष्ट मणछ निं ज़िऊंदअ रहणअ ई आथी। अह इहअ मणछ ज़ुंणी इहै च़िल़्हखरै काम किऐ सह हणअ तेऊओ आपणअ कशूर कि सह पाअ मारी।

14“पर ज़ै एऊ पापी मणछो शोहरू आजू भाल़े कि तेऊए बाबै किऐ इहै पाप। सह तेते बारै बच़ार करे अर सह मुंह बिधाते डरा हेठै रही आपणैं बाबा ज़ेही पापी ज़िन्दगी नांईं ज़िऊए, 15धारा मुहुर्ती लै बल़ीदान किई दी शिखा खाणां लै साझ़ू नांईं होए, ज़ै सह तिन्‍नां पाखलै देअए मुहुर्ती सेटा अरज़ करदअ ज़हा होर इज़राईली पूज़ा, ज़ै सह होरीए बेटल़ी संघै सुत्ती कंज़रैई करी छ़ोतलअ नांईं होए, 16ज़ै सह रैनै-गरीबा नांईं ठगे अर लोगा नांईं लुटे, ज़ै सह ऋणा पिछ़ू डाहअ द बांधअ दैए, ज़ै रैनै-गरीबा लै सह खाणां लै रोटी अर बान्हणां लै झिकल़ै दैआ होए, 17ज़ै सह ऋण दैनै दै ढब्बैओ बैज़ निं ढाकदअ। सह बूरै करनै का दूर रहा होए। ज़ै सह मेरै बधान अर बिधी शुचअ-पाक्‍कअ रही ज़िहअ खोज़अ द आसा तिहअ ई मना। सह मणछ रहणअ ज़िऊंदअ। सह भलअ मणछ निं तेऊए बाबे पापा पिछ़ू मरनअ। 18सह त तेऊओ बाब ज़ुंणीं रैनै-गरीब हंतै, आपणैं भाई-बंध लुटै अर तिंयां किऐ तेऊ लोगा लै बूरै काम। तिन्‍नां पापे सज़ा भेटणीं तेऊ ई अर मरनअ बी सह ई।

19“तम्हैं सका रहैन हई इहअ पुछ़ी, ‘तेऊ शोहरू आपणैं बाबे पापा पिछ़ू सज़ा किल्है निं भेटी?’ तेऊ निं तेते सज़ा भुगतणी लागदी ज़ै सह भलै काम करे अर मेरै बधान अर बिधी ज़िहअ खोज़अ द आसा तिहअ ई मने। सह रहणअ ज़िऊंदअ। 20मरनअ सह ई ज़ुंण पाप करे। शोहरू निं आपणैं ईजा बाबे पापा पिछ़ू सज़ा भुगतणे ज़रुरत आथी। नां ईजा-बाबा पल़णीं आपणैं शोहरूए पापा पिछ़ू सज़ा भुगतणी। धर्मीं मणछा भेटणअ तिन्‍नें धर्मीं कामें साबै फल अर पापी मणछा भेटणअ तिन्‍नें पापी कामें साबै फल।3

21“ज़ै कुंण कदुष्ट मणछ पाप करनअ छ़ाडे अर मेरअ बधान मने अर भलअ करे। तिंयां बी निं मरनै आथी। 22तेखअ करनै तिन्‍नें पाप माफ ज़ुंण तिन्‍नैं तधा का आजी किऐ तै, तेखअ रहणैं तिंयां तेते साबै ज़िऊंदै ज़ुंण तिन्‍नैं धर्मीं काम किऐ। 23हुंह आसा मालक बिधाता, हुंह निं बूरै मणछा मरना लै बी खुश हंदअ। हुंह हआ एता लै खुश कि तिंयां पाप करनै का पिछ़ू हटे अर ज़िऊंदै रहे।4

24“पर ज़ै कुंण भलअ मणछ पाप अर इहै कामां करदअ लागे ज़ेता का हुंह नफरत करा, तिंयां निं तेखअ ज़िऊंदै रहणैं! तेखअ निं तिंयां गल्‍ला आद रहणीं कि तेऊ केतरै भलै काम किऐ, तेऊ भेटणीं तेखअ तेऊए पापा पिछ़ू मौत। किल्हैकि तेऊओ कशूर आसा इहअ कि तेऊ किअ विश्वास घात।

25“तम्हैं इज़राईली बोला, ‘मालक निं शुचअ नसाफ करदअ!’ ऐबै शूणां तम्हैं मेरी, हुंह करा सदा शुचअ नसाफ, पर थारै बभारा दी निं नसाफ आथी। 26ज़ै कुंण धर्मीं मणछ पाप करदअ लागे, सह मरनअ तिन्‍नां पाप करनै पिछ़ू। किल्हैकि पाप करनैओ फल आसा मौत। 27ज़ै कदुष्ट मणछ पाप करनअ छ़ाडे अर सह भलै काम करे, तेता करै बच़ाऊंणी तेऊ आपणीं ज़िन्दगी। 28किल्हैकि तेऊ किअ आपणैं बूरै कामें बारै बच़ार संघा छ़ाडै पाप करनै। सह जाणअ बच़ी अर सह निं मरदअ। 29तज़ी बी हआ तम्हैं इज़राईले आद-लुआद इहअ बोल्दै लागै दै, ‘मालक निं शुचअ नसाफ करदअ!’ तम्हैं शूणां, हुंह करा सदा शुचअ नसाफ, पर थारै बभारा दी निं नसाफ आथी।

30“हुंह मालक बिधाता बोला तम्हां इज़राईली लै, ‘मुंह करनअ तम्हां मांझ़ै हरेकीओ नसाफ ज़िहै तम्हैं कर्म किऐ तेऊ साबै। अज़ी बी बोला हुंह तम्हां लै पाप करनै का हटा पिछ़ू, थारै पापा निं तम्हां बरैबाद करनै दैआ। 31तिंयां पाप करनै छ़ाडा ज़ेता तम्हैं करदी आऐ, आपणैं मन्‍नैं सोठा भलअ, आप्पू भितरी नऊंईं आत्मां संघै ज़िऊआ ज़िन्दगी। तम्हैं इज़राईली किल्है आसा मरनअ हिछ़अ द? 32हुंह निं कोही मरना लै राज्ज़ी हंदअ। तम्हैं छ़ाडा पाप करनअ, संघा रहा ज़िऊंदै। अह गल्‍ल डाही मंऐं मालक बिधाता बोली।’”