Kulvi Outer Seraji Bible
एजकेल 2
परमेशरै बोलअ मुल्है, “एजकेल, मणछा, खल़अ उझ़ू; मंऐं लाई ताह संघै गल्ला करी।”1
सह त गल्ला करदअ ई लागअ द कि परमेशरे आत्मां किअ हुंह आपणैं बशै, संघा किअ हुंह मेरी आपणीं ज़ांघा खल़अ, तेखअ लागी मुखा आजू एही गल्ला शुण्हदी, “मणछा, मंऐं लाअ तूह इज़राईली लोगा सेटा लै छ़ाडी। तिन्नैं किअ मुल्है विश्वास घात अर तिंयां आसा मुखा दूर हुऐ दै, तिंयां आसा आझ़ बी मुल्है तिहै ई द्रोह करदै लागै दै ज़िहै तिन्नें दाद-बाब थिऐ। तिंयां आसा हठू अर तिंयां निं मेरअ अदर करदै, तैही लाअ मंऐं तूह तिन्नां सेटा लै छ़ाडी कि तूह तिन्नां का खोज़े कि हुंह परमेशर बिधाता तिन्नां लै किज़ै बोला। तिंयां द्रोही च़ाऐ तेरी शुणें च़ाऐ नां शुणें, एतरअ, जाणअ तिन्नां का थोघ लागी तिन्नां जैंदरी निखल़अ कुंण मुंह बिधातो गूर।
“पर तूह मणछो शोहरू निं तिन्नां का डरी आथी च़ाऐ तिंयां ज़िहअ बी बोले। तिन्नां समझ़णअ तूह बृथा अर ताल्है सका तिंयां उपद्रभ करी, सह हणअ ताल्है कांडे झ़ाटै अर बिंच़ू जैंदरी रहणैं ज़िहअ! तज़ी बी निं तूह तिन्नां द्रोही का डरी आथी। तूह लऐ तिन्नां का मेरी गल्ला ज़ेही मंऐं बोली तेही ई खोज़ी, च़ाऐ तिंयां शुणें च़ाऐ नां शुणें। तूह डाहै आद कि तिंयां किहै द्रोही आसा।
“एजकेल, मणछा, तूह शुण कि हुंह किज़ै बोला। तूह निं तिन्नां ज़िहअ द्रोही हई। आपणीं खाख खोल्ह संघा घुट तेता ज़ुंण मंऐं ताल्है दैई लाअ।”2 मुखा शुझुअ इहअ कि मुंह बाखा आअ एक हाथ अर तेथ ती एक जंतरी।3 तेऊ हाथै खोल्ही सह जंतरी मेरै मुंहां आजू अर सह ती दोहरी बाखा लिखी दी। तेथ तै दुख अर शोगे बैण लिखै दै।
Source notes (3)
- Cross-reference शधा. 26:16
- Cross-reference जेर. 15:16
- Cross-reference प्रका. 5:1
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.